Жүйеге кіру
ЕАЭО-да электрондық рұқсат беру құжаттарымен трансшекаралық алмасу механизмін іске асыру басталды, жеке пайдалануға арналған экспресс-жүктерді декларациялау тәртібі оңайлатылды

ЕАЭО-да электрондық рұқсат беру құжаттарымен трансшекаралық алмасу механизмін іске асыру басталды, жеке пайдалануға арналған экспресс-жүктерді декларациялау тәртібі оңайлатылды

15.01.2020

14 қаңтарда Еуразиялық экономикалық комиссия (ЕЭК) Алқасы сауда, кедендік ынтымақтастық, техникалық реттеу, дәрілік заттардың ортақ нарығының жұмыс істеуі, Еуразиялық экономикалық одақ (ЕАЭО) елдері экономикаларын ақпараттандыру, ішкі нарықтың жұмыс істеуі және бірқатар басқа бірқатар саладағы мәселелерді қарады.

ЕЭК Алқасы Одақтың интеграцияланған ақпараттық жүйесі құралдарын іске асыру кезінде ақпараттық өзара іс-қимылды регламенттейтін «ЕАЭО-ға мүше мемлекеттердің уәкілетті органдары сыртқы және өзара сауданы реттеу кезінде ресімдейтін, соның ішінде тыйым салулар мен шектеулерді сақтауды растау үшін кедендік операцияларды жасау кезінде ұсынылатын құжаттардың дерекқорын пайдалану» жалпы процесінің техникалық құжаттарын бекітті.

Бұл жалпы процесті іске асыру, ең алдымен, ЕАЭО Кеден кодексінің 80-бабының орындалуын қамтамасыз етуге бағытталған, соның ішінде Одақ елдерінің кедендік және бақылаушы органдарының кедендік операцияларды жасау үшін қажетті құжаттар туралы мәліметтерді алу процесіндегі трансшекаралық ақпараттық өзара іс-қимылын көздейді және «бірыңғай терезе» механизмін дамыту және қолдану үшін негіз қалайды. Іс жүзінде, сөз электрондық рұқсат беру құжаттарымен трансшекаралық алмасу механизмін іске асыруды бастау туралы болып отыр.

Жалпы процесті ендіру құжаттардың белгілі бір түрлеріне қатысты, ЕАЭО құқығында құжаттардың электрондық түрде ұсынылған мәліметтерінің құрамы мен құрылымының регламенттелу шамасына қарай кезең-кезеңмен жүргізілетін болады.

ЕЭК Алқасының өкімімен бір мезгілде тоғыз ай мерзім белгіленген, осы уақыт ішінде ЕАЭО техрегламенттерінің талаптарына немесе санитариялық-эпидемиологиялық қадағалауға (бақылауға) жататын өнімге қойылатын Бірыңғай санитариялық-эпидемиологиялық және гигиеналық талаптарға сәйкестігін бағалау туралы құжаттардан мәліметтермен трансшекаралық электрондық алмасуға көшу жүзеге асырылуға тиіс.

Комиссияның жедел тасымалдаушылардың жеке пайдалануға арналған тауарлар ретінде жеткізетін экспресс-жүктерін кедендік декларациялауға қатысты кейбір шешімдеріне өзгерістер мақұлданды.

Өзгерістер тауарлардың бұл санатын декларациялау тәртібін жетілдіруге және жеңілдетуге көмектеседі. Экспресс-жүктер үшін жолаушылар кеден декларациясын және төлеу құжатын толтыру тәртібі оңтайландырылды. Атап айтқанда, алдын ала кедендік декларациялау кезінде алдыңғы құжат туралы мәліметтерді толтырмау мүмкіндігі көзделген, тауарлардың массасын көрсету кезінде дөңгелектеу тәртібі нақтыланған және т.б. Төлеу туралы құжатты толтыру кезінде кедендік төлемдерді, өсімпұлдарды төлеу (өндіріп алу) туралы мәліметтерге қатысты кейбір бөлімдерді толтырмау мүмкіндігі көзделген.

ЕЭК Алқасы кедендік баждарды, салықтарды төлеу бойынша міндеттердің орындалуын қамтамасыз ету сертификатының құрылымы мен форматын айқындады.

Құжат ЕАЭО-да кеден органдары мен сыртқы экономикалық қызметке қатысушылар арасындағы біріздендірілген электрондық құжат айналымын дамытуға бағытталған.

Электрондық құжат түріндегі кедендік баждарды, салықтарды төлеу бойынша міндеттің орындалуын қамтамасыз ету сертификаты ЕАЭО-дағы тауарлардың кедендік транзиті бірыңғай жүйесінің ажыратылмас бөлігі болып табылады.

Құжат электрондық құжат түріндегі қамтамасыз ету сертификатын қалыптастыру үшін қажетті құрылымы мен форматын, сондай-ақ егер ол кеден органына қағаз тасығыштағы құжат түрінде ұсынылатын болса, оның электрондық түрін жасауды сипаттайды.

ЕЭК Алқасының тиісті шешімінің күшіне ену мерзімі Одақ мемлекеттерінде ақпараттық жүйелерді пысықтау үшін қажетті уақытты ескере отырып айқындалған.

ЕЭК Алқасы өнеркәсіптік субсидияларды Комиссиямен келісу үшін бірлесіп өндірілген тауарды дайындауға қатысатын ЕАЭО мемлекеттері өндірушілерінің ең аз саны бойынша шарыттарды екі жылға ұзартты.

Тауарды Одақтың мүше мемлекеттерімен бірлесіп өндірілген деп тану тәртібі ЕЭК Алқасының 2019 жылғы 11 маусымдағы № 93 шешімімен бекітілген және Комиссиямен осындай тауарға қатысты ерекшелікті субсидияны келісу мүмкіндігі болу үшін ЕАЭО елдерінің тауарды бірлесіп өндірілген деп қалай танитынын регламенттейді.

ЕЭК Алқасы Ересектерде, жасөспірімдерде және балаларда болатын демікпені және ересектерде болатын өкпенің созылмалы обструктивті ауруын емдеу үшін қолданылатын ингаляцияға арналған дәрілік препараттарға қатысты клиникалық құжаттарды дайындау (клиникалық зерттеулер жүргізу, терапиялық баламалылығын растау) жөніндегі нұсқаманы қабылдады.

Құжат ингаляцияға арналған дәрілік препараттардың баламалығына клиникалық зерттеулерді жоспарлау мен жүргізудің, сондай-ақ құрамында бір әсер ететін зат бар ингаляцияға арналған бірегей және көшірілген дәрілік препараттардың арасындағы баламалықты растаудың бірыңғай тәсілдемелерін белгілейді.

Нұсқама дәрілік препараттардың осындай топтарын зерттеуге қойылатын қазіргі заманғы талаптарды ескере отырып әзірленген. Ол мұндай зерттеулердің басы артық қосарласуын Одақтың әрбір мемлекетінде, сондай-ақ дәрі-дәрмектерді шетелдік нарықтарға шығару кезінде болдырмауға мүмкіндік береді.

ЕАЭО елдеріне Нұсқаманы Одақтың сайтында жарияланған күнінен бастап алты ай өткеннен кейін қолдану ұсынылды.

Жалпы өндірістік (технологиялық) желілерде әртүрлі дәрілік заттарды өндіру кезінде тәуекелдерді сәйкестендіру мақсатында денсаулыққа әсер етудің рұқсат етілген шектерін белгілеу жөніндегі нұсқама бекітілді.

Өндірістік циклдарды алдыңғы өндірістік циклдар шеңберінде өндірілетін дәрілік препараттардың қалдықтарынан тазартудың бірыңғай тәсілдемелері белгіленді. Бұл мұндай қалдықтардың персонал мен пациенттердің денсаулығына тигізетін теріс әсерін болдырмай отырып, олардың кейінгі өндірістік циклдерге көшірілуін болдырмауға мүмкіндік береді.

Тазалау деңгейін бағалауға қойылатын бірыңғай тәсілдемелерді қолдану да өндірісті GMP сәйкестігіне инспекциялау шеңберінде желілерді қайталап тазарту рәсімдерінің қосарласуын болдырмауға көмектеседі және сол арқылы дәрі-дәрмек өндірушілердің шығындарын азайтады.​