Sign In
26-январдагы ЕЭК Кеңешинин жыйынтыктары

26-январдагы ЕЭК Кеңешинин жыйынтыктары

161010_006.jpg
26.01.18

ЕЭК Кеңешинин отуруму 26-январда Евразия экономикалык комиссиясынын (ЕЭК) штаб-квартирасында болуп өттү. Интеграциялык өз ара аракеттешүү маселелеринин кеңири спектри талкууланды. Ветеринардык жана фитосанитардык контролдоо, соода жана өнөр жай саясат тармагында бир катар чечимдер кабыл алынды, Өкмөт аралык жана Жогорку Евразия экономикалык кеңештерде кароо үчүн документтердин долбоорлору жактырылды. 

Кеңештин мүчөлөрү ушул жылдын 2-февралында Алматыда (Казакстан) өтө турган Санариптик экономика боюнча форумдун программасын талкуулашты. ЕЭК Кеңешинин отурумуна төрагалык кылган РФ өкмөтүнүн Төрагасынын биринчи орун басары Игорь Шувалов, жалпы санариптик күн тартипти жүзөгө ашыруу Биримдиктин бардык мамлекеттери үчүн принципиалдуу маанилүү милдет болуп саналарын белгиледи.”Бизге товарлардын жалпы көзөмөлдөнүүсүн, анын ичинде маркировкалоону жайылтуунун жардамы менен жалпы соода аянтчаларын уюштурууну, ошондой эле ар кандай биргелешкен өнөр жай долбоорлорун жүзөгө ашырууда санариптик технологияларды колдонууну камсыз кылуу зарыл,” – деп белгиледи Игорь Шувалов. 

Чоң диаметрдеги  түтүктөргө (ЧДТ) (ЕАЭБ тышкы экономикалык ишинин бирдиктүү товардык номенклатурасынын коду 3901 20 900 1) заводдук үч кабаттуу коррозияга каршы каптоого арналган полиэтиленге бажы алымынын нөлдүк ченин колдонууну узартуу чечими кабыл алынды. Чара 2018-жылдын 1-январынан 30-сентябрына чейин колдонулат.

Мурда нөлдүк алым ЕЭК Кеңешинин чечими менен 2017-жылдын 1-январынан баштап 2017-жылдын 31-декабрын кошуп алганга чейин белгиленген болчу. ЧДТкө арналган полиэтилен боюнча ЕАЭБдин бирдиктүү бажы тарифинин ташып келүүчү бажы алымынын чени 6,5% ды түзөт.  
    
Чоң диаметрдеги түтүктөргө арналган полиэтилен, өткөрмө түтүктөрдү курууда, анын ичинде магистралдык газдык, мунайдык, жана мунай өнүмдөрүнүн өткөрмөлөрү үчүн арналган ширетилген болот түтүктөрдү өндүрүүдө колдонулат. Даяр өндүрүмдүн өздүк наркында полиэтилендин үлүшү 7%га жакынын түзөт.

ЕАЭБ өлкөлөрүнүн ишканаларынын өндүрүштүк кубаттуулуктары азыркы убакта бул товарга болгон ички  суроо-талапты канааттандыруу үчүн жетишсиз. 2018-жылы россиялык ЧДТ өндүрүүчүлөрдүн импорттук полиэтиленди керектөөсү түтүк өндүрүүчүлөрдүн бул материалды жыйынды керектөөсүнүн 25% (20 миң тоннадан көп) кем эмес болот. Россиядагы негизги керектөөчүлөр болуп “Түтүк металлургиялык компаниясы” ААК, “Бириккен металлургиялык компания” АК, “Челябинск трубопрокаттык завод” ААК, “Северсталь” ААК.

Бажы алымын нөлгө келтирүү, импорттук полиэтиленди сатып алууда чыгымдарды азайтуунун эсебинен чоң диаметрдеги түтүктөрдүн өздүк наркын төмөндөтүүгө, ошондой эле өндүрүмдүн бул түрүнүн ата мекендик өндүрүүчүлөрүнүн атаандашууга жөндөмдүүлүгүн жогорулатууга  жардам берет. ЧДТтү өндүрүүчүлөрдүн баалоосу боюнча, сунуш кылынган чараны киргизүү, чоң диаметрдеги түтүктөрдүн экспортун 130 миң тоннадан кем эмес көбөйтүүгө мүмкүндүк берет.   

Кылмыштуу жол менен алынган кирешелерди легалдаштырууга (изин жашырууга), жана Евразия экономикалык биримдигинин бажы чек арасы аркылуу накталай акча каражаттарын жана (же) акча аспаптарын алып өтүшүндө терроризмди каржылоого каршы аракеттер чөйрөсүндө маалымат алмашуу жөнүндө макулдашуунун долбоору жактырылган.

Документ мүчө мамлекеттерге накталай акча каражаттарын жана акча аспаптарын Биримдиктин бажы чек арасы аркылуу алып өтүшүндө билдирилген маалыматтар менен алмашууга мүмкүндүк берет.

Макулдашуунун долбоору, мүчө мамлекеттерде накталай акча каражаттарын жана акча аспаптарын алып өтүшү жөнүндө берилмелердин базасын калыптандырууга жооптуу орган, ошондой эле башка мамлекеттердин суроолоруна жооп бере турган орган аныктала тургандыгы сунуш кылат. Берилмелердин базасынын өзү, жеке адамдар тарабынан жүргүнчү бажы декларациясында жана товарлардын декларациясында билдирилген маалыматтардын негизинде калыптанат. Документте берилмелер базасынан маалыматтарды берүүгө суроолорду тариздөө тартиби, аларды аткаруу мөөнөтү жана аткаруудан баш тартуу учурлары көрсөтүлөт.

Макулдашуунун алкагында алынган маалымат, сурагандарга жана берилгендерге караганда жашыруун болуп саналат жана ушундай маалымат берген органдын жазуу жүзүндөгү макулдугу жок башка максаттарга пайдаланылбайт.

ЕЭК Кеңеши жактырган документ, мүчө мамлекеттердин ички мамлекеттик процедураларын жүргүзүү үчүн багытталат.

Өсүмдүктөрдүн карантини боюнча пункттардын (фитосанитардык контролдук туруктар, ФКТ) материалдык-техникалык жабдуусуна жана жайлаштыруусуна коюлган талаптарга өзгөртүүлөр бекитилди.

Атап айтканда, ФКТ жабдууга жалпы талаптарга арналган документтин бөлүмү, пункт менен толукталат, ага ылайык карантиндик фитосанитардык контролду жүргүзүү үчүн, фитосанитардык контролдук туруктардын имараттары, курулмалары жана турак-жайлары карантинге алынган өндүрүмдүн сакталышын камсыз кылууга тийиш.

Комиссиянын Кеңешинин тиешелүү чечиминин күчүнө кириши, Биримдиктин тышкы чек арасына өткөрүү туруктарына жана Биримдиктин мүчө мамлекеттеринин аймактарында жайгашкан ФКТдын материалдык-техникалык жабдылышына талаптарды унификациялоого мүмкүндүк берет жана карантиндик фитосанитардык контролдун натыйжалуулугун жогорулатат. Талаптар, жерлеринде түзүлүүчү ФКТнын материалдык-техникалык жабдылышы жана жайлашуусу үчүн, мүчө мамлекеттердин мыйзамдарына ылайык аныкталган укуктук негизди түзөт.

Саналып өткөн өзгөртүүлөрдү жайылтуу карантиндик зыяндуу организмдерди алып келүү жана таралуу коркунучун алдын алат жана карантинге алынган өндүрүмдү өз ара соодалашууда негизсиз административдик тосмолорду четтетүүгө мүмкүндүк берет.

Өстүрүүнүн, жыйноонун, өсүмдүктөн алынган чийки затын иштетүүнүн жана сактоонун тийиштүү түрдөгү тажрыйба эрежелери кабыл алынды. Документтин ченемдери органикалык өндүрүш эрежелери боюнча өстүрүлгөн дарылык өсүмдүк чийки затына, ошондой эле жапайы өскөн дары өсүмдүктөрдүн даярдамасына да колдонулат.

Эрежелерди колдонуу Биримдиктин мамлекеттеринде өстүрүү, жыйноо, сактоо этаптарында чийки затка болгон бирдиктүү мамилени калыптандырууга мүмкүндүк берет. Эрежелер дары каражаттар боюнча Европа агенттигинин өсүмдүктөрдөн алынган баштапкы материалдарын өстүрүү жана жыйноонун тийиштүү тажрыйбасы боюнча жетекчилик менен айкалыштырылган.

Документте дарылык өсүмдүктөрдүн чийки затын иштетүү жана сактоо үчүн турак-жайларга, жыйналган же даярдалган чийки затка, аны өстүрүү (даярдоо) тарыхын көзөмөлдөөгө мүмкүндүк берүүчү документтерди тариздөөгө талаптардын эң аз тизмеги камтылган. Өзүнчө бөлүмдө, өсүмдүк дары каражаттарды өндүрүүчү чийки затты сатып алууда келишимдерде жазылууга тийиш болгон талаптар белгиленген.

Атап айтканда, жыйналган дары өсүмдүк чийки затын иштетүү жүрүп жаткан турак-жайлар таза жана желдетилген болууга тийиш. Аларда айыл чарба жаныбарларын кармоого жол берилбейт. Жыйналган чийки зат канаттуулардан, курт-кумурскалардан жана кемирүүчүлөдөн  корголгон болууга тийиш. Дары өсүмдүк чийки заты иштетилип жаткан имараттарда, өндүрүштүк турак-жайлардан өзүнчө бөлөк кийим илүүчү жайлар жана колду жууганга мүмкүндүгү менен дааратканалар болууга тийиш.

Эрежелер өсүмдүк чийки затынын сапатын камсыз кылуунун, анын ичинен керектөөчүлөрдүн коопсуздугуна кепилдик берүүгө, түрдүү өсүмдүктөрдү өзүнчө сактоону камсыз кылууга жана курчап турган чөйрөгө зыян келтирбөөгө  мүмкүндүк берген стандарттарды жана эрежелерди орнотуунун эсебинен натыйжалуу системасын түзүүнү караштырат.