Sign In
ЕБ жана ЕАЭБ фармакопеяларынын жакындашуусу – сапаттуу дарылардын тоскоолдуксуз рыногунун ачкычы

ЕБ жана ЕАЭБ фармакопеяларынын жакындашуусу – сапаттуу дарылардын тоскоолдуксуз рыногунун ачкычы

28.04.18

Евробиримдигинин жана Евразиялык экономикалык биримдиктин (ЕАЭБ) өлкөлөрүнүн жарандарын жеткиликтүү баадагы сапаттуу, натыйжалуу жана коопсуз дарылар менен камсыздоо абзел, ал эми эки Биримдиктин фармацевтикалык ишканалары дүйнөлүк рынокто атаандаштыкка жөндөмдүү болушу керек. Бул жалпы милдеттер жана континенттин дары рыногун жөнгө салуу чөйрөсүндө кызматташтыкты жолго коюу зарылчылыгы туурасында Евразиялык экономикалык комиссиянын (ЕЭК) Коллегиясынын мүчөсү (министр) Валерий Корешков Брюсселде өткөн “ЕБ жана ЕАЭБ аймактык фармацевтикалык рыноктору – жалпы тренддер, жөнгө салуу жана чакырыктар” эл аралык семинарынын жүрүшүндө сүйлөдү.

Европа жана Евразиялык экономикалык биримдиктин өлкөлөрүнүн фармацевтикалык коомдоштугунун, ошондой эле жөнгө салуучу органдарынын өкүлдөрү катышкан иш-чараны Фармацевтикалык өндүрүүчүлөрдүн жана ассоциациялардын европалык федерациясы (EFPIA) жана Эл аралык фармацевтикалык өндүрүүчүлөрдүн ассоциациясы (AIPM) уюштурушкан.

ЕЭК министри европалык кесиптештери менен тажрыйба бөлүшүп, Евразиялык экономикалык комиссия маселелерди кандайча чечкендиги жөнүндө билдирди. “ЕАЭБте дарылардын жалпы рыногунун ишин камсыздаган документтерди иштеп чыгууда биз дүйнөлүк мыкты тажрыйбаларды изилдедик жана колдондук, – деп Валерий Корешков панелдик сессияда чыгып сүйлөгөн сөзүндө баса белгиледи. Сессиянын модератору EFPIA башкы директору Натали Молл болду. – Эл аралык уюмдардын, жөнгө салуучу органдардын жана фармацевтикалык өнөр жайларынын алдыңкы эксперттеринин тажрыйбасы эске алынды. Бул кыска мөөнөттүн ичинде масштабдуу улуттан жогорку ченемдик базаны түзүүгө мүмкүндүк берди”.

ЕЭК министри Евразиялык экономикалык биримдиктин бардык өлкөлөрүндө ЕЭК чечимдеринин түздөн-түз таасирине өзгөчө көңүл бурду. Валерий Корешковдун сөздөрү боюнча, жакында ЕАЭБ мамлекеттери эки процедураны – өз ара таануу процедурасы боюнча каттоону жана буга чейин катталган дары препараттарынын каттоо досьесин Биримдиктин укугу менен шайкеш келтирүүгө даярдыгын тастыкташты. 2018-жылы дарыларды бирдиктүү эрежелер боюнча каттоо боюнча жигердүү иш башталды. Азыркы учурда GMP-инспекциялоону Биримдиктин эрежелери боюнча өткөрүү жөнүндө маселе толугу менен жолго коюлган: мисалы, фармөндүрүүчү өзүнүн аймактык жайгашуусуна көз карандысыз, ЕАЭБ мүчө мамлекеттеринин инспектораттарынын кайсынысына болбосун билдирме жөнөтө алат.

Комиссиянын ишинин максаттары жөнүндө кеп кылууда Валерий Корешков ЕЭК Европа биримдигиндегидей, саламаттыкты сактоонун жана эл аралык сооданын талаптарына жооп берген, сапаттуу препараттарынын эркин жүгүрүшүнө жетишүүгө аракет кылып жаткандыгын баса белгиледи. Европалык тажрыйбаны колдонуу, анын ичинде ЕАЭБте GMP-инспекциялоо процедурасын жүргүзүүдө тобокелге багытталган ык-амалды кеңири жайылтуу, көзөмөлдөө функцияларын оптимизациялоо жана башкалар бул иште жардам берет.

Валерий Корешков ошондой эле Дары каражаттарынын сапаты жана саламаттыкты сактоо боюнча Европалык директораттын (EDQM) өкүлү Эммануэль Чартон менен жолугушуу өткөрүп, аны менен кол коюуга даярдалып жаткан ЕЭК жана EDQM ортосунда өз ара түшүнүшүү жөнүндө меморандумдун долбоорун жана андан аркы кызматташтыктын маселелерин талкуулады. Эске салсак, документке кол коюу туурасында макулдашуу буга чейин – ЕЭК министринин жана EDQM директору Сюзанн Кайтелдин мындан мурдагы сүйлөшүүлөрүнүн учурунда жүргүзүлгөн.

Маалымат

Фармецевтикалык өндүрүүчүлөрдүн жана ассоциациялардын европалык федерациясы (EFPIA) ЕБ өлкөлөрүнүн фармацевтикалык өндүрүшүнүн өкүлдөрүн бириктирет. EFPIA курамына 33 улуттук ассоциация жана 39 алдыңкы фармацевтикалык компания кирет. Ассоциация Дары каражаттары боюнча европалык агенттик (EMA) менен өз ара иштешет жана ЕБте изилдөөлөргө жана иштеп чыгууларга, ошондой эле заманбап дарыларды рынокко чыгарууга адистешкен 2000ден ашык компаниялардын кызыкчылыктарын көрсөтөт, бул бүткүл дүйнөдөгү бейтаптардын саламаттыгын жана сапатын жакшыртууга олуттуу салымын кошот.

Эл аралык фармацевтикалык өндүрүүчүлөрдүн ассоциациясы (AIPM) 1994-жылы түзүлгөн жана Россия Федерациясынын аймагында, аткаруу бийлигинин федералдык органдар менен өз ара иштешүүдө алдыңкы эл аралык фармацевтикалык компаниялардын натыйжалуу, коопсуз жана сапаттуу заманбап дары препараттарынын өндүрүүчүлөрүнүн жана иштеп чыгуучуларынын кызыкчылыктарын көрсөтөт. Бүгүнкү күндө AIPM үлүшүнө дүйнөлүк фармацевтикалык өндүрүштүн 80% дан ашыгы жана Россияга киргизилген дары каражаттарынын көлөмүнүн 60% дан ашыгы туура келген 60тан ашык эл аралык компанияларды бириктирет.

Дары каражаттарынын сапаты жана саламаттыкты сактоо боюнча европалык директорат (EDQM) 1964-жылдагы Европа фармакопеясын түзүү жөнүндөгү конвенциянын жоболорун жүзөгө ашыруунун алкагында, 1996-жылы Европа Кеңешине караштуу негизделген. EDQM негизги максаты дарылардын жана медициналык жардамдын сапатын жана жеткиликтүүлүгүн камсыздоо, Европалык фармакопеяны иштеп чыгуу жана кайра кароо. Европа фармакопеясына 38 катышуучу: Европа кеңешинин жана Европа биримдигинин мүчө мамлекеттери кол коюшкан. 30 мамлекет EDQM ишинде байкоочу катары катышышат, анын ичинде Армения, Беларусь, Казакстан жана Россия.