Калегія ЕЭК 23 снежня ўхваліла планы мерапрыемстваў для гарманізацыі асобных працэдур па афармленні і выдачы спецыяльных дазволаў на праезд цяжкавагавых і буйнагабарытных транспартных сродкаў і на перавозку небяспечных грузаў пры ажыццяўленні міжнародных аўтамабільных перавозак па аўтамабільных дарогах, уключаных у спіс еўразійскіх транспартных калідораў і маршрутаў.

Мяркуецца, што мерапрыемствы пройдуць па трох асноўных напрамках. Гэта вызначэнне максімальных тэрмінаў выдачы і дзеяння спецыяльнага дазволу; узгадненне формы заявы і пазначаных у ёй звестак, а таксама збліжэнне патрабаванняў да іх мінімізацыі; аўтаматызацыя працэдуры падачы заявы на афармленне спецыяльнага дазволу і яго атрымання ў электронным выглядзе па месцазнаходжанні заяўніка.

Рэалізацыя гэтых мерапрыемстваў дасць магчымасць спрасціць працэс афармлення і атрымання перавозчыкамі спецыяльных дазволаў, а таксама ліквідаваць абмежаванне, уключанае ў рэестр перашкод («Белую кнігу»), якія дзейнічаюць на ўнутраным рынку ЕАЭС.