Навіны
Калегія ЕЭК ухваліла даклад аб выніках маніторынгу рынку прамысловай прадукцыі ў ЕАЭС за 2020 год
«Падрыхтоўка дакумента прадугледжана ключавым стратэгічным дакументам у сферы прамысловасці – Асноўнымі напрамкамі прамысловага супрацоўніцтва ў рамках Саюза, – адзначыў міністр па прамысловасці і аграпрамысловым комплексе ЕЭК Артак Камалян. – Даклад змяшчае ў сабе комплексны аналіз параметраў рынку прамысловай прадукцыі ЕАЭС».
У дакладзе, па словах міністра ЕЭК, адлюстраваны таксама вынікі дэталёвага аналізу кааперацыйных паставак як паміж дзяржавамі інтэграцыйнага аб’яднання, так і ў гандлі з трэцімі краінамі.
Артак Камалян адзначыў, што ў 2020 годзе ёмістасць рынку апрацоўчай прамысловасці Саюза ў вартасным выражэнні склала амаль 782 млрд долараў, аднак пад уплывам пандэміі каранавіруса COVID-19 скарацілася ў параўнанні з 2019 годам на 93 млрд долараў, або на 10,6%. У сваю чаргу аб’ём рынку ў фізічным выражэнні павялічыўся на 0,3%.
Аб’ём прадукцыі, вырабленай у дзяржавах ЕАЭС, склаў 510 млрд дол., г. зн. 65,3% рынку, узаемных паставак – 41 млрд дол., або 5,2%, імпарту з трэціх краін – 231 млрд дол., або 29,5% прадукцыі, прадстаўленай на рынку ЕАЭС.
Найбольшае нарошчванне долі нацыянальнай вытворчасці на рынку Саюза адбылося ў ключавых для прамысловасці краін галінах: фармацэўтычнай прамысловасці (на 9,1%), металургіі (на 5,3%), дрэваапрацоўцы (на 3,5%), хімічнай прамысловасці (на 3,3%), аўтамабілебудаванні (на 2,1%), а таксама вытворчасці адзення (на 1,2%).
«У 2020 годзе фізічны аб’ём вытворчасці прадукцыі апрацоўчай прамысловасці, нягледзячы на негатыўны ўплыў неспрыяльнай эканамічнай кан’юнктуры, абумоўленай уздзеяннем пандэміі каранавіруса COVID-19, у цэлым па ЕАЭС павялічыўся на 1,4%, – адзначыў Артак Камалян. – Пры гэтым прасочваецца тэндэнцыя павелічэння аб’ёму вытворчасці ў галінах, попыт на прадукцыю якіх асабліва моцна ўзрос ва ўмовах пандэміі. Гэта фарміндустрыя, тэкстыльная вытворчасць, цэлюлозна-папяровая і мэблевая прамысловасць».
У цэлым па выніках 2020 года нарошчванне аб’ёмаў прамысловай вытворчасці зафіксавана ў большасці галін апрацоўчай прамысловасці. Прадстаўлены ў дакладзе аналіз рынку на ўзроўні канкрэтных таварных пазіцый дазволіць дзяржаўным органам, а таксама вытворцам і спажыўцам краін Саюза атрымаць інфармацыю аб патрэбах і вытворчых магчымасцях партнёраў па інтэграцыйным аб’яднанні, дапаможа ў пошуку партнёраў для развіцця вытворчай кааперацыі.
Ухвалены Калегіяй даклад будзе накіраваны ва ўрады краін ЕАЭС.
