Еўразійская эканамічная камісія фарміруе на афіцыйным сайце тэматычны раздзел аб еўразійскіх турыстычных маршрутах, які ўключыць у сябе звесткі пра больш чым 400 турыстычных аб'ектаў краін Еўразійскага эканамічнага саюза. Пра гэта паведаміла намеснік дырэктара Дэпартамента развіцця прадпрымальніцкай дзейнасці ЕЭК Лусінэ Багратуні падчас сесіі «Лічбавы вектар еўразійскага турызму: стратэгіі інтэграцыі і росту» на Кыргызска-Расійскім эканамічным форуме 14 жніўня ў Бостэры (Кыргызстан).

Па словах прадстаўніка Камісіі, у сусветнай эканоміцы турызм з'яўляецца адной з высокадаходных галін, якія дынамічна развіваюцца. На долю турызму прыпадае каля 10% сусветнага валавога нацыянальнага прадукту, больш за 7% сусветных інвестыцый.

«Улічваючы геаграфічную блізкасць краін ЕАЭС, супрацоўніцтва ў гэтай сферы можа стаць каталізатарам эканамічнага росту, важным фактарам стварэння працоўных месцаў і развіцця прадпрымальніцтва, – падкрэсліла Лусінэ Багратуні. – Нашы дзяржавы маюць каласальны рэкрэацыйны патэнцыял — ад горных азёр і стэпаў да гарадоў і культурных цэнтраў сусветнага ўзроўню з багатай гісторыяй. Але, каб гэты патэнцыял быў запатрабаваны, мы павінны гаварыць на адной мове з турыстам XXI стагоддзя – мове лічбавых тэхналогій».

Створаны раздзел аб'яднае даныя нацыянальных турыстычных парталаў, прапануе інтэрактыўныя карты, маршруты і актуальную інфармацыю для падарожнікаў па краінах ЕАЭС.