Аб гэтым заявіў міністр па інтэграцыі і макраэканоміцы Еўразійскай эканамічнай камісіі Сяргей Глазьеў падчас незалежнага дыялогу «Розныя курсы – адзіная мэта» ў падтрымку Саміту па харчовых сістэмах – 2021 ААН, які прайшоў 18 мая ў Маскве.

Як паведаміў Сяргей Глазьеў, у Еўразійскім эканамічным саюзе забяспечана харчовая бяспека. Нягледзячы на пандэмію COVID-19, па выніках 2020 года ў краінах Саюза зафіксаваны рост вытворчасці сельскагаспадарчай прадукцыі на 2,3%.

«Развіццё аграпрамысловага комплексу і забеспячэнне харчовай бяспекі закладзена ў Стратэгіі-2025. Гэта, напрыклад, меры і механізмы, звязаныя з павышэннем эфектыўнасці раслінаводства і жывёлагадоўлі, з імпартазамяшчэннем, з рэалізацыяй сумесных праграм развіцця аграпрамысловага комплексу ў рамках ЕАЭС», – сказаў міністр ЕЭК.

У той жа час Сяргей Глазьеў падкрэсліў, што не ўсе краіны свету змаглі пазбегнуць крытычнага дэфіцыту харчовых тавараў.

«Разлік магчымасцяў сучасных сельскагаспадарчых тэхналогій, які праводзіўся ў МДУ, паказаў, што пры цяперашнім стане тэхналагічнай базы сельскай гаспадаркі можна пракарміць больш за 20 млрд чалавек – у два разы больш за насельніцтва Зямлі. Праблема не ў тым, што людзей занадта шмат ці не хапае глебаў і эфектыўных тэхналогій, а ў адсутных механізмах размеркавання сельскагаспадарчых тавараў», – адзначыў Сяргей Глазьеў.

Ён назваў тры прычыны неэфектыўнага размеркавання тавараў: сацыяльная няроўнасць, злоўжыванне манапольным становішчам на рынку з боку буйных карпарацый, недасканаласць сучаснага міжнароднага гандлю, які схілены да маніпулявання.

Для вырашэння сусветнай харчовай праблемы Сяргей Глазьеў прапанаваў распрацаваць глабальную інвестыцыйную праграму для ліквідацыі вузкіх месцаў, звязаных, перш за ўсё, з забяспечанасцю вадой. Акрамя таго, на яго думку, неабходна ліквідаваць прыгнятальнае ўздзеянне зніжэння пакупніцкай здольнасці нацыянальных валют і маніпулявання рынкам.

«Мы ў Еўразійскім эканамічным саюзе разглядаем магчымасць развіцця біржавой прасторы і ў якасці першага пілотнага праекта будзем распрацоўваць інструменты біржавога гандлю збожжам. У перспектыве паспрабуем стварыць міжнародную сістэму гандлю збожжам, якая грунтавалася б на біржах ЕАЭС і была б адкрытай у першую чаргу для афрыканскіх дзяржаў, якія сутыкнуліся з абвастрэннем харчовай праблемы», – заявіў Сяргей Глазьеў.

У рамках незалежнага дыялогу генеральны сакратар Асамблеі народаў Еўразіі Андрэй Бельянінаў прапанаваў унесці карэктывы ў канцэпцыю сусветнай харчовай бяспекі.

«Штодня ў свеце 25 тысяч чалавек паміраюць ад недаядання і хвароб, звязаных з голадам. Аднак да гэтага часу канцэпцыя харчовай бяспекі ў асноўным сканцэнтравана на харчовых калорыях, а не на якасці прадуктаў харчавання. Надышла пара ўносіць у яе карэктывы», – падкрэсліў Андрэй Бельянінаў.

 Даведка

Незалежны дыялог быў арганізаваны Міжнародным саюзам няўрадавых арганізацый «Асамблея народаў Еўразіі» напярэдадні Саміту па харчовых сістэмах — 2021, які адбудзецца ў лістападзе па ініцыятыве Генеральнага сакратара ААН. Удзельнікамі абмеркавання сталі прадстаўнікі дзяржаўных органаў, міжнародных арганізацый і эксперты.

Мэтай маючага адбыцца саміту з'яўляецца заклік да дзейных намаганняў сусветнай супольнасці, накіраваных на змяненне метадаў вытворчасці і спажывання прадуктаў харчавання ў свеце, скарачэнне колькасці захворванняў, звязаных з харчаваннем, аздараўленне планеты і дасягненне прагрэсу ў сістэмнай рэалізацыі 17 Мэт устойлівага развіцця ААН.