Նազարենկո Վիկտոր Վլադիմիրի
Կենսագրություն
Ծնվել է 1958 թվականի հուլիսի 1-ին Գոմելի մարզի Կալինկովիչսկի շրջանի Ալեքսանդրովկա գյուղում։
1976 թվականին գերազանցությամբ ավարտել է Գոմելի մեքենաշինական տեխնիկումը, 1981 թվականին նույնպես գերազանցությամբ ավարտել է Գոմելի պոլիտեխնիկական ինստիտուտը «մեքենաշինության տեխնոլոգիա, մետաղակտրող հաստոցներ և գործիքներ» մասնագիտությամբ՝ ստանալով ինժեներ-մեխանիկի որակավորում։
1999 թվականին Բելառուսի նախագահին առընթեր Կառավարման ակադեմիան գերազանցությամբ ավարտելուց հետո ստացել է տնտեսագետ-միջազգայնագետի որակավորում, իսկ 2006 թվականին նույն ուսումնական հաստատության ասպիրանտուրան ավարտելուց հետո նրան շնորհվել է տնտեսական գիտությունների թեկնածուի գիտական կոչումը։
Ունի տեխնիկական կարգավորման, հավաստագրման, չափագիտության, որակի կառավարման (մենեջմենթի), ինչպես նաև պետական ծառայության մեծ գործնական փորձ։ Իր աշխատանքային կենսագրությունն սկսել է 1981 թվականին՝ որպես «Գոմսելմաշ» արտադրական միավորման վարպետ։ Զինված Ուժերում ժամկետային ծառայությունն ավարտելուց հետո՝ 1983 թվականից մինչև 1986 թվականն աշխատել է որպես Գոմելի ձուլվածքների և նորմալների գործարանի ավագ վարպետ, ցեխի վարիչի տեղակալ, իսկ 1986 թվականից մինչև 1998 թվականը՝ կրկին «Գոմսելմաշ» ԱՄ-ում, որտեղ անցել է ճանապարհ՝ պետական ընդունման ներկայացուցչից մինչև որակի գծով գլխավոր տնօրենի տեղակալ։
1998 թվականից մինչև 2006 թվականը զբաղեցրել է «Բելառուսի ստանդարտացման և հավաստագրման պետական ինստիտուտ» հանրապետական ունիտար ձեռնարկության տնօրենի տեղակալի պաշտոնը։
2006 թվականից մինչև 2012 թվականն աշխատել է որպես Բելառուսի Հանրապետության Ստանդարտացման պետական կոմիտեի նախագահի առաջին տեղակալ։
2012 թվականից զբաղեցրել է Բելառուսի Հանրապետության Ստանդարտացման պետական կոմիտեի նախագահի պաշտոնը։
2018 թվականի սեպտեմբերի 12-ից Եվրասիական տնտեսական հանձնաժողովի տեխնիկական կարգավորման հարցերով Կոլեգիայի անդամ (նախարար) է։
Ակտիվ մասնակցություն է ցուցաբերել Բելառուսի Հանրապետության նախագահին առընթեր Կառավարման ակադեմիայում, Բելառուսական ազգային տեխնիկական համալսարանում և Ստանդարտացման, չափագիտության և որակի կառավարման գծով կադրերի որակավորման բարձրացման և վերապատրաստման բելառուսական պետական ինստիտուտում գիտական և դասախոսական գործունեությանը։ Հեղինակել է ստանդարտացման, համապատասխանության գնահատման և որակի կառավարման հարցերին նվիրված մի շարք գիտական աշխատանքներ։
Արտադրանքի մի շարք տեսակների և որակի կառավարման համակարգերի համապատասխանության գնահատման հարցերով փորձագետ-աուդիտոր է։
2015 թվականին պարգևատրվել է «Աշխատանքային վաստակի համար» և «Եվրասիական տնտեսական միության ստեղծման գործում ներդրման համար» շքանշաններով։ Խրախուսանքների է արժանացել Բելառուսի Հանրապետության Նախարարների Խորհրդի, Բելառուսի Հանրապետության Ազգային ժողովի, Բելառուսի Հանրապետության Արդյունաբերության նախարարության և Բելառուսի Հանրապետության մի շարք պետական մարմինների կողմից։
