ԵՏՀ ինտեգրման և մակրոտնտեսության նախարար Դանիյար Իմանալիևի և Կուբայի Հանրապետության գերատեսչությունների և կազմակերպությունների ղեկավարների մի շարք աշխատանքային հանդիպումների շրջանակներում քննարկվել են ոլորտային փոխգործակցության հարցեր:
Կուբայի կողմը հետաքրքրություն է հայտնել դեղամիջոցների և բժշկական արտադրատեսակների գրանցման, ապրանքների մակնշման, էլեկտրոնային առևտրի և արտադրանքի տեխնիկական կանոնակարգերի մշակման ոլորտի ԵԱՏՄ-ի փորձի նկատմամբ: Նաև հայտնել են այդ փորձը մինչև 2030 թվականն ընկած ժամանակահատվածում Կուբայի տնտեսական և սոցիալական զարգացման ազգային պլանի իրագործման, ինչպես նաև Կուբայի կողմից առաջարկվող նախագծերի իրագործման շրջանակներում օգտագործելու մտադրության մասին:
Օրինակ՝ ներկայացվել է «Մարիել» զարգացման հատուկ գոտում լոգիստիկ հանգույցի նախագիծը, որը արտոնյալ պայմաններ է առաջարկում ԵԱՏՄ երկրների ընկերությունների համար: Կուբայի ներկայացուցիչների կարծիքով՝ այս նախագծի իրագործումը կարող է դառնալ ոչ միայն Կուբայի հետ առևտրի ուժեղացման խթան, այլև տարածաշրջանում Միության տնտեսական ներկայության ընդլայնման հարթակ:
Դանիյար Իմանալիևը նշել է տվյալ նախաձեռնության հեռանկարային լինելը և ընդգծել, որ ԵԱՏՄ երկրների և Կուբայի միջև առևտրատնտեսական համագործակցության ներուժի իրագործման առանցքային պայման է տրանսպորտալոգիստիկ հարցերի լուծումը, ինչպես նաև վճարումների նկատմամբ ավելի ճկուն մոտեցումների մշակումը: Այս ոլորտի նախաձեռնությունների իրագործման համար կպահանջվի ծավալուն փորձագիտական աշխատանք պետական կառավարման մարմինների և գործարար շրջանակների ներկայացուցիչների մասնակցությամբ:
«Նշում ենք ԵԱՏՄ-ի և ԵՏՀ-ի հետ լայն տնտեսական օրակարգով երկխոսության ընդլայնման վերաբերյալ կուբացի գործընկերների հարցումը, նրանք հետաքրքրված են ինչպես կարգավորիչ փոխգործակցության հարցերով, այնպես էլ արդյունաբերության, ԱԱՀ, տրանսպորտի և լոգիստիկայի, սանիտարա-բուսասանիտարական և անասնաբուժական միջոցների ոլորտներում գործարար շրջանակների գծով նախագծային գործունեությամբ, ինչպես նաև զբոսաշրջության ոլորտում փոխգործակցության տնտեսական ասպեկտների քննարկմամբ», — ընդգծել է ԵՏՀ նախարարը:
Հավանայում աշխատանքային հանդիպումներ են տեղի ունեցել մի արտաքին առևտրի և օտարերկրյա ներդրումների, արտաքին գործերի, տրանսպորտի, գյուղատնտեսության, արդյունաբերության, զբոսաշրջության նախարարությունների և կազմակերպությունների ղեկավարների հետ: ԵՏՀ պատվիրակությունը նաև բանակցություններ է վարել Կուբայի առևտրի պալատի, «Մարիել» զարգացման հատուկ տնտեսական գոտու և «ՄիոկուբաՖարմա» ընկերության ղեկավարության հետ: