Եվրասիական տնտեսական հանձնաժողովի կոլեգիան արդյունաբերական ճարպային սպիրտների համար (ԵԱՏՄ ԱՏԳ ԱԱ 3823 70 000 0 ծածկագիր) մինչև 2028 թվականի հոկտեմբերի 31-ը ներառյալ 0%-ի չափով ներմուծման մաքսատուրք է սահմանել: Ներկայումս դրույքաչափը կազմում է 5%:

Այդ ապրանքները սկզբնական հումք են հանդիսանում մակերևութաակտիվ նյութերի ստացման համար, որոնք օգտագործվում են հեղուկ լվացող և մաքրող միջոցների, ինչպես նաև կոսմետիկայի արտադրության ժամանակ, մետաղագործության, մանածագործական, կաշվի, լաքաներկային, թղթի, սննդի արդյունաբերության մեջ, արդյունաբերության բժշկական ճյուղում և գյուղատնտեսությունում։

Ներկայումս Եվրասիական տնտեսական միությունում արդյունաբերական ճարպային սպիրտներ չեն արտադրվում, ուստի առկա պահանջարկը բավարարվում է ներմուծման մատակարարումների շնորհիվ։

«Ընդունված մաքսասակագնային կարգավորման միջոցը կօգնի աջակցել Միության երկրներում մակերևութաակտիվ նյութեր արտադրողներին, նվազեցնել պատրաստի արտադրանքի ինքնարժեքը, ինչպես նաև բարձրացնել դրանց մրցունակությունը ԵԱՏՄ ներքին շուկայում»,– նշել է ԵՏՀ մաքսասակագնային և ոչ սակագնային կարգավորման վարչության տնօրեն Վահագն Ղազարյանը:

Որոշումն ուժի մեջ կմտնի պաշտոնական հրապարակման օրվանից 30 օրացուցային օր հետո։