Եվրասիական միջկառավարական խորհրդի նիստում Եվրասիական տնտեսական միության երկրների կառավարությունների ղեկավարները պայմանավորվել են 2026 թվականին մի շարք անդամ պետություններ ներմուծվող էլեկտրոմոբիլների համար մաքսատուրքից ազատման տեսքով սակագնային արտոնություն տրամադրելու մասին:

Խոսքը 20 հազ. հատ քանակությամբ Բելառուս ներմուծվող «մաքուր էլեկտրիչկաների» (ԵԱՏՄ ԱՏԳ ԱԱ 8703 80 000 3 ծածկագիր), ինչպես նաև 15 հազ. հատ քանակությամբ Հայաստան ներմուծվող և 15 հազ. հատ քանակությամբ Ղրղզստան ներմուծվող «մաքուր էլեկտրիչկաների» և «հետևողական հիբրիդների» մասին է (ԵԱՏՄ ԱՏԳ ԱԱ 8703 80 000 5):

«Մաքսասակագնային կարգավորման միջոցն արդեն դրական արդյունք է ցուցաբերել իր գործողության նախորդ տարիներին: Ակնկալում ենք, որ այն հետագայում ևս կնպաստի էլեկտրամոբիլների շուկայի ձևավորմանը և լիցքավորման ենթակառուցվածքի զարգացմանը, ինչպես նաև Եվրասիական տնտեսական միության տարածքում էկոլոգիապես մաքուր տրանսպորտի բաժնի ավելացմանը», — նշել է ԵՏՀ առևտրի նախարար Անդրեյ Սլեպնյովը:

Մաքսատուրքերից ազատումը տրամադրվում է միայն Հայաստանում, Բելառուսում և Ղրղզստանում մշտապես բնակվող քաղաքացիներին: Ընդ որում, Ղազախստանում կամ Ռուսաստանում քաղաքացիություն և (կամ) մշտական բնակության վայր ունեցող անձանց էլեկտրամոբիլների տիրապետման, օգտագործման և տնօրինման իրավունքների փոխանցում չի թույլատրվում։ «Հետևողական հիբրիդների» դեպքում արգելքը վերաբերում է նաև Բելառուսում քաղաքացիություն և (կամ) մշտական բնակության վայր ունեցող անձանց իրավունքների փոխանցմանը: