Եվրասիական տնտեսական հանձնաժողովի տեխնիկական կարգավորման և հավատարմագրման վարչության փոխտնօրեն Չինարա Մամբետալիևան Մոսկվայում կայացած «Կարգավորող պրակտիկա և դեղամիջոցների գրանցում – ՌեգԼեկ-2024» գիտագործնական խորհրդաժողովի ընթացքում խոսել է դեղերի ընդհանուր շուկային անցումն ապահովելու նպատակով Եվրասիական տնտեսական միության իրավունքի կատարելագործման և այդ շուկայի շրջանակներում ԵԱՏՄ երկրների փոխգործակցության գործիքների մասին:
Խորհրդաժողովի լիագումար նիստում Չինարա Մամբետալիևան նշել է, որ 2024 թվականի դեկտեմբերին լրանում է Դեղամիջոցների շրջանառության կարգավորման ընդհանուր սկզբունքների և կանոնների մասին համաձայնագրի ստորագրման 10 տարին։
Վերջին երկու տարում նկատվում է ԵԱՏՄ գրանցման կանոններին համապատասխան դիմումների ներկայացման և գրանցման վկայականների տրամադրման աճ։ Լավ տեմպերով են ընթանում նաև դեղագործական ստուգումների իրականացման և GMP հավաստագրերի տրամադրման աշխատանքները։
Այս տարի պարզեցվել են գրանցման կանոնները, այդ թվում՝ օպտիմալացվել է դոսյեում փոփոխություններ կատարելու ընթացակարգը։ Բացառվել է իրազեկման կարգի փոփոխություններ կատարելիս փորձաքննություն կատարելու անհրաժեշտությունը:
Ներկայումս մշակվում է նախագիծ, որը նախատեսում է, որ մինչև 2025 թվականի դեկտեմբերի 31-ն ԵԱՏՄ կանոններին համապատասխանեցնելու ընթացակարգն սկսած արտադրողները լրացուցիչ երեք տարի կստանան, որոնց ընթացքում իրենց դեղամիջոցները կարող են շրջանառվել
շուկայում ազգային գրանցման վկայականներով: Դա թույլ կտա ավարտին հասցնել շուկայի միութենական հատվածին անցումը՝ միաժամանակ պահպանելով Միության այն երկրների շուկաներում դեղերի շրջանառության հնարավորությունը, որտեղ ընթացակարգերը դեռ ավարտված չեն:
Կարևորվել է ԵԱՏՄ պետությունների լիազոր մարմինների միջև միմյանց և դեղագործական բիզնեսի ներկայացուցիչների հետ փոխգործակցության առկա մեխանիզմները և գործիքները։ Ներկայացվել են տեղեկատվական ռեսուրսները, որոնց օգնությամբ ապահովվում է դեղերի ընդհանուր շուկայի գործունեությունը և գործնականում իրականացվում է միատեսակ կիրառումը։
Նշվել է, որ 2024 թվականին Հանձնաժողովի հարթակում մեծ աշխատանք է տարվել դեղամիջոցների ընդհանուր շուկայի կարգավորման ոլորտի ակտերի արդիականացման և կատարելագործման ուղղությամբ։
