Եվրասիական տնտեսական հանձնաժողովի խորհուրդը հունվարի 26-ի նիստում, հաշվի առնելով միջազգային պրակտիկայում կիրառման փորձը և փոփոխությունները, ընդունել է Բժշկական արտադրատեսակների կլինիկական և կլինիկալաբորատոր փորձարկումների (հետազոտությունների) անցկացման կանոնների նոր խմբագրությունը։
Կանոնների թարմացված տարբերակը հստակեցնում է բժշկական արտադրատեսակների համարժեքության ճանաչման պայմանները՝ փորձարկումների արդյունքներն ընդունելու նպատակով, փորձարկումներ կատարելու թույլտվություն ստանալու կարգը, փորձարկումներ կատարելու պահանջները, բժշկական արտադրատեսակների գրանցման նպատակով դրանց հետազոտությունն իրականացնելու իրավունք ունեցող լիազոր մարմինների միասնական գրանցամատյանից բժշկական կազմակերպություններին (կլինիկական կենտրոններին) հեռացնելու հիմքերը, փորձարկումների հաշվետվությունների ձևերը: Որոշվել են բժշկական արտադրատեսակ հանդիսացող ծրագրային ապահովման համար կլինիկական տվյալներ ստանալու պայմանները, ինչպես նաև այդպիսի արտադրանքի տեխնիկական ֆայլին ներկայացվող պահանջները:
Փոփոխություններն ուժի մեջ են մտնելու պաշտոնական հրապարակման օրվանից 180 օրացուցային օրը լրանալուց հետո։ Ընդ որում, սահմանվել է Կանոնների նոր խմբագրության կիրառման սահուն անցումն ապահովող մեխանիզմ։ Գործընթացի շարունակականությունը պահպանելու նպատակով նախատեսվել է կլինիկական և կլինիկալաբորատոր հետազոտություններն այն խմբագրությանը համապատասխան կատարելու հնարավորությունը, որ գործել է բժշկական կազմակերպության հետ պայմանագիրը կնքելու պահին։ Փորձարկումների մասին հաշվետվությունները՝ տրված ըստ բժշկական կազմակերպության հետ պայմանագիր կնքելու պահին գործող ձևերի, ընդունվում են բժշկական արտադրատեսակները Միության իրավունքին համապատասխան գրանցելու համար:
