Եվրասիական տնտեսական հանձնաժողովի խորհուրդը հավանություն է տվել արդյունաբերական կոոպերացիայի ֆինանսավորման մեխանիզմի շրջանակներում երկու նոր նախագծի իրականացման համար Եվրասիական տնտեսական միության բյուջեից սուբսիդիաների տրամադրմանը:

Նախագծերի մեկն իրականացնում է Ռուսաստանի «Բեշտաու Էլեկտրոնիկս» ընկերությունը՝ Բելառուսի «Ներո Էլեկտրոնիկս» ՍՊԸ-ի և Ղրղզստանի «Կըրգըզէլեկտրոնիկա» ՍՊԸ-ի հետ համատեղ, և ուղղված է անհատական համակարգիչների համակարգային բլոկների արտադրությանը:

Երկրորդ նախագծի շրջանակներում Հայաստանի «Մետալստրոյ» ՍՊԸ-ի և Բելառուսի «Ռուխսերվոմոտոր» ՍՊԸ-ի հետ համագործակցությամբ «Վոյաժ» ՆՊՕ ընկերությունը Ռուսաստանի Դաշնության տարածքում կգործարկի երկաթուղային տրանսպորտի բաղադրիչների բարձր տեխնոլոգիական արտադրություն՝ ներառյալ բարձր արագության գնացքները:

Երկու նախագծերն էլ լիովին համապատասխանում են Կոոպերացիոն նախագծերի ընտրության մասին հիմնադրույթով նախատեսված անհրաժեշտ չափորոշիչներին:

«Հանձնաժողովի խորհրդի որոշումը մեզ համար շատ կարևոր է, — նշել է Գոհար Բարսեղյանը: — Սա ֆինանսավորման նոր վերազգային գործիքի իրականացման մեր աշխատանքի աճող արդյունքն է: Այս տարի արդեն հավանություն ստացած երեք նախագծին ևս երկուսն է ավելացել: Կարևոր է, որ նախագծերին մասնակցում են բոլոր անդամ պետությունները: Համոզված եմ, որ ընդունված նախաձեռնությունների իրականացումը կնպաստի գլխավոր խնդրի լուծմանը՝ մեր երկրների միջև կայուն տնտեսական շփումների ձևավորմանը»: