Հունվարի 27-ին Եվրասիական տնտեսական հանձնաժողովի կոլեգիան հավանություն է տվել ԵՏՀ խորհրդի «Արժեթղթերի շուկայի կարգավորման ոլորտում կիրառվող հիմնական հասկացությունների և սահմանումների և արժեթղթերի շուկայում շուկայական միջնորդներին (բրոքերներին) ներկայացվող պահանջների սահմանման մասով անդամ պետությունների օրենսդրությունը ներդաշնակեցնելու համաձայնեցված առաջարկությունների մասին» հանձնարարականի նախագծին:
Հանձնարարականը և համաձայնեցված առաջարկությունները մշակվել են ԵԱՏՄ մասին պայմանագրին, Պայմանագրի N 17 հավելվածին (Ֆինանսական ծառայությունների մասին արձանագրություն), Ընդհանուր ֆինանսական շուկայի ձևավորման հայեցակարգին, Օրենսդրության ներդաշնակեցման մասին համաձայնագրին և Միության պետությունների ֆինանսական շուկայի ոլորտի օրենսդրության ներդաշնակեցման միջոցառումների պլանին համապատասխան։
Փաստաթուղթը Միության պետություններին հանձնարարականներ է տալիս արժեթղթերի շուկայի կարգավորման ոլորտի ազգային օրենսդրությունը կատարելագործելիս և միջազգային պայմանագրեր մշակելիս օրենսդրության հիմնական հասկացությունների և սահմանումների ներդաշնակեցման, արժեթղթերի շուկայում բրոքերներին ներկայացվող պահանջների սահմանման համաձայնեցված առաջարկները հաշվի առնելու մասին:
ԵՏՀ էկոնոմիկայի և ֆինանսական քաղաքականության նախարար Բախիթ Սուլթանովը նշել է, որ ներդաշնակեցման վերաբերյալ համաձայնեցված առաջարկները պատրաստվել են ԵԱՏՄ պետություններում գործող օրենսդրության համեմատական իրավական վերլուծության արդյունքների հիման վրա։
«Սա կարևոր քայլ է միասնական ֆինանսական տարածքի ստեղծման ուղղությամբ, որը մեր շուկայում կապահովի թափանցիկություն և փոխադարձ վստահություն», — ընդգծել է Բախիթ Սուլթանովը։
Օրենսդրության ներդաշնակեցման համաձայնեցված առաջարկներում ձևակերպված են արժեթղթերի շուկայում ֆինանսական ցուցանիշների, ռիսկերի կառավարման համակարգերի, ներքին վերահսկողության, բրոքերի կազմակերպական կառուցվածքի, հաճախորդների և կարգավորիչի հետ փոխգործակցության, ինչպես նաև հաշվետվությունների և տեղեկատվության բացահայտման մասով բրոքերներին ներկայացվող պահանջների կարգավորման առաջարկվող մոտեցումները:
Կոլեգիայի հավանությունը ստացած օրենսդրության ներդաշնակեցման վերաբերյալ հանձնարարականներն ու համաձայնեցված առաջարկները կներկայացվեն Հանձնաժողովի խորհրդի հաստատմանը:
