Հուլիսի 22-ին ուժի մեջ է մտնում Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Մոնղոլիայի միջև անցյալ տարի ստորագրված Ժամանակավոր առևտրային համաձայնագիրը։
Այդ պահից յուրաքանչյուր կողմի համար կզրոյացվեն կամ կնվազեցվեն 367 ապրանքային ենթադիրքի նկատմամբ մաքսատուրքերը, որոնց մասով առևտուրը կազմում է ամբողջ ապրանքաշրջանառության շուրջ 90%-ը։ Համաձայնագիրը կնքվել է երեք տարի ժամկետով՝ գործողությունը ինքնաբերաբար ևս երեք տարով երկարաձգելու հնարավորությամբ:
Միաժամանակ Միության շուկա արտոնյալ ռեժիմով մատակարարվելու են բարձրորակ մսամթերքը, հանրահայտ մոնղոլական քիշմիրը, այլ արդյունաբերական և գյուղատնտեսական ապրանքներ։«Եվրասիական տնտեսական միության երկրների մատակարարների համար եզակի պայմաններ են ստեղծվել. Մոնղոլիան տարածաշրջանում այլ նման համաձայնագրեր չունի։ Մեր արտադրողների համար հասանելի են դառնում մի լայն շարք պարենային և արդյունաբերական ապրանքներ՝ կաթնամթերքը, ըմպելիքները, հրուշակեղենը և շոկոլադը, ավտոմեքենաները և բեռնատարները, կոսմետիկան և օծանելիքը, այլ սպառողական ապրանքներ», — հայտնել է Եվրասիական տնտեսական հանձնաժողովի առևտրի նախարար Անդրեյ Սլեպնյովը։
Համաձայնագրի գործարկման նախօրեին Հանձնաժողովը կողմերի բիզնեսի և պատասխանատու գերատեսչությունների հետ միասին համաձայնեցրել է մատակարարումների հետագա աճի ապահովմանն ուղղված մի շարք առանցքային քայլեր։ Մասնավորապես, պայմանավորվածություններ են ձեռք բերվել ագրոարդյունաբերական համալիրի ոլորտում համագործակցության ընդլայնման վերաբերյալ, ներառյալ մսի և մսամթերքի մատակարարումների ավելացումը, միմյանց շուկաների հասանելիության տեխնիկական խոչընդոտների վերացումը, էլեկտրոնային առևտրի զարգացումը։
«Համաձայնագրի ուժի մեջ մտնելուց առկա ակնկալիքներով կողմերի բիզնեսն ակտիվացրել է գործարար շփումները և այս տարվա սկզբին 2025 թվականի նույն ժամանակահատվածի համեմատ մեկ երրորդով ավելացրել փոխադարձ առևտուրը, — նշել է ԵՏՀ նախարարը։ — Համոզված եմ, որ փաստաթղթով ստեղծվող պայմանները թույլ կտան հարաբերությունները բերել որակապես նոր մակարդակ»։
Անդրեյ Սլեպնյովը գործարար համայնքին կոչ է արել ակտիվորեն օգտագործել ստացված առանձնաշնորհները և զարգացնել մոնղոլական կողմի հետ համագործակցությունը։
