Եվրասիական տնտեսական հանձնաժողովի առևտրի նախարար Անդրեյ Սլեպնյովը և Մոնղոլիայի կառավարության նախագահի առաջին տեղակալ, էկոնոմիկայի և զարգացման նախարար Ժադամբա Էնհբայարը հայտարարել են, Եվրասիական տնտեսական միության և Մոնղոլիայի միջև ժամանակավոր առևտրային համաձայնագիրն ուժի մեջ է մտնում 2026 թվականի հուլիսի 22-ին:
Հանդիպման ընթացքում Անդրեյ Սլեպնյովը Ռուսաստանի Դաշնությունում Մոնղոլիայի արտակարգ և լիազոր դեսպան Դուլամսուրեն Դավաային հանձնել է ԵԱՏՄ-ի կողմից Ժամանակավոր առևտրային համաձայնագրի ուժի մեջ մտնելու համար անհրաժեշտ ընթացակարգերն ավարտելու մասին հայտագիր: Մոնղոլիայի կողմից համապատասխան ընթացակարգերն արդեն ավարտված էին:
Համաձայնագրի արդյունավետ կիրարկման ապահովման համար կողմերը նախապատրաստել են միջոցառումների պլան, որն արդեն իրականացվում է:«Սկսվում է Եվրասիական տնտեսական միության և Մոնղոլիայի միջև համագործակցության զարգացման նոր փուլ: Կարևոր է առավելագույնս օգտագործել մեր առջև բացվող հնարավորությունները», - նշել է Անդրեյ Սլեպնյովը:
Հանդիպման արդյունքում համատեղ հայտարարություն է ստորագրվել:«Կարծում ենք, որ այսօրվա հանդիպումը ոչ միայն Համաձայնագիրն արագ ուժի մտնելու փաստը նշանավորող իրադարձություն է, այլև կարևոր մեկնակետ դրա իրականացումը գործնական բովանդակությամբ լցնելու համար», - ընդգծել է Ժադամբա Էնհբայարը, որը երկխոսությանը մասնակցել ՏԿԿ ռեժիմով:
Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Մոնղոլիայի միջև ժամանակավոր առևտրային համաձայնագիրը ստորագրվել է 2025 թվականի հունիսի 27-ին Մինսկում կայացած Եվրասիական տնտեսական բարձրագույն խորհրդի նիստի շրջանակներում: Համաձայնագրի ուժի մեջ մտնելու պահից 367 ապրանքային ենթադիրքի նկատմամբ յուրաքանչյուր կողմ կզրոյացնի կամ կնվազեցնի մաքսատուրքերը:
Համաձայնագիրը կնքվել է երեք տարի ժամկետով՝ գործողությունը ևս մեկ եռամյա ժամանակահատվածով ինքնաշխատ երկարաձգման հնարավորությամբ: Առաջին եռամյա ժամանակահատվածի ավարտից հետո կողմերը մեկ տարվա ընթացքում կսկսեն վերանայել Համաձայնագիրը առևտրի գործնականորեն ամբողջ անվանացանկի նկատմամբ ընթացակարգերի պարզեցման և տուրքերի և այլ սահմանափակող կանոնների վերացման նպատակով:
