Жаңалықтар

13 қарашаның 2025 "Бестік" елдері энергоресурстардың ортақ нарықтарын құру жөніндегі жұмысты жалғастыруда 12 қарашада ЕЭК энергетика және инфрақұрылым министрі Арзыбек Қожошевтің төрағалығымен өткен ЕЭК Алқасы жанындағы Мұнай және газ жөніндегі Консультативтік комитеттің отырысында мұнай және мұнай өнімдерінің ортақ нарықтарын қалыптастыру мәселелерін, сондай-ақ Одақтың ортақ газ нарығын дамыту перспективаларын "бестік" елдерінің бейінді министрліктері мен ведомстволары басшыларының орынбасарлары талқылады. Консультативтік комитет мүшелері ЕАЭО-ның мұнай және мұнай өнімдерінің ортақ нарықтарын қалыптастыру туралы халықаралық шарттың жобасында қалған келісілмеген мәселелер бойынша пікір алмасты, тәсілдерді жақындастырудың маңыздылығын және олар бойынша түпкілікті шешімдерді тезірек қабылдау қажеттігін атап өтті. "ЕАЭО аясында мұнай саласындағы ынтымақтастықты тереңдету бүгінде мүше мемлекеттердің энергетикалық қауіпсіздігін қамтамасыз етудің басым бағыттарының бірі болып табылады", – деп атап өтті Арзыбек Қожошев. Сондай-ақ тараптар конструктивті диалогқа дайын екендіктерін білдіріп, Одақтың 2030 жылға дейінгі ортақ газ нарығын дамыту жоспарын және ЕАЭО құқығына өзгерістер енгізу жөніндегі ұсыныстарды дайындау және келісу бойынша одан әрі қадамдарды белгіледі.

13 қарашаның 2025 Андрей Слепнев: "ЕАЭО мен Қытай теміржол жүк тасымалдарын цифрландыру бойынша озық жобаны жүзеге асыруды жалғастыруда" Бұл туралы Еуразиялық экономикалық комиссияның Сауда министрі Андрей Слепнев Еуразиялық экономикалық одақ пен Қытай Халық Республикасы арасындағы сауда-экономикалық ынтымақтастық туралы келісімді іске асыру жөніндегі Бірлескен комиссия отырысының қорытындысы бойынша мәлімдеді. "Тауарларды теміржол арқылы жеткізу мерзімін қысқартудың, әкімшілік кедергілерді жоюдың және бизнестің шығындарын азайтудың негізгі шарттарының бірі – электрондық көлік және тауарларға берілетін ілеспе құжаттарға көшу", – деп атап өтті ЕЭК министрі. Бірлескен комиссияның отырысы аясында ресейлік тарап Қытай темір жолдары өкілдерімен консультациялар өткізді, оның мақсаты Андрей Слепневтің айтуынша, қағазсыз тасымалдау технологиясы бойынша тәжірибелік тасымалдауды жүзеге асыру кезінде өзара іс-қимыл тәртібіне қол қою үшін барлық қажетті талаптарды және Қағазсыз технология бойынша тасымалдауды жүзеге асыру туралы келісімді түпкілікті келісу болды. "Қажетті ішкі мемлекеттік процестер Қытайда ағымдағы жылдың соңына дейін аяқталады деп күтеміз. Сонымен қатар Қазақстанмен де осыған ұқсас құжаттар топтамасын қол қоюға дайындау жұмыстары жақын уақытта аяқталады деп сенеміз", – деді ЕЭК Сауда жөніндегі блогының жетекшісі.

13 қарашаның 2025 Арзыбек Қожошев: "Теміржол көлігі – ЕАЭО-ның транзиттік әлеуетін іске асырудың негізгі тіректерінің бірі" Теміржол көлігін дамытудағы заманауи үрдістерді, жаңа логистикалық шешімдерді, инфрақұрылымдық жобаларды және инновацияларды ЕЭК V бірлескен дөңгелек үстелінің және трансеуразиялық тасымалдар жөніндегі халықаралық үйлестіру кеңесінің (КСТП) қатысушылары талқылады. Іс-шара Еуразиялық экономикалық комиссияның штаб-пәтерінде өтті. "Теміржол көлігі біздің елдерді біріктірудің негізгі элементі болып қала береді және ЕАЭО-ның транзиттік әлеуетін іске асырудың негізін құрайды. Бүгінгі таңда біздің алдымызда жаңа сын-қатерлерге бейімделіп қана қоймай, Одақтың көлік жүйесінің болашағын белсенді түрде қалыптастыру міндеті тұр", – деп атап өтті ЕЭК энергетика және инфрақұрылым министрі Арзыбек Қожошев құттықтау сөзінде. Іс-шара мемлекеттік органдардың, теміржол әкімшіліктерінің, логистикалық компаниялардың, Еуразиялық экономикалық одақ елдерінің ғылыми және сараптамалық қоғамдастығының өкілдерін біріктірді. Еуразиялық өңірдің жетекші көлік-логистикалық компанияларының, соның ішінде ОТЛК ЕРА, FESCO, ГК "Дело" және басқа да компания өкілдері жеткізу тізбегіндегі жағдайды, контейнермен тасымалдау перспективаларын және мультимодальды логистиканы дамытуды талқылады. Цифрлық трансформация жағдайында көлік саласы үшін кадрлар даярлау мәселелеріне ерекше назар аударылды. Іс-шара қорытындысы бойынша бірлескен мәлімдеме қабылданды, онда дөңгелек үстелге қатысушылар төмендегілерді атап өтті: – көлік-логистикалық процестерді цифрландыруды жеделдету; – ЕАЭО-ның транзиттік әлеуетін нығайту үшін инфрақұрылымды дамыту; – нормативтік базаны үйлестіру және инновациялық шешімдерді енгізу; – ЕАЭО-ға мүше мемлекеттер арасында көлік жүйесін дамытудағы негізгі бағыттар бойынша үйлестіруді күшейту. Бұл форматтағы іс-шара 2021 жылдан бері өткізіліп келеді және еуразия кеңістігінде теміржол көлігін дамыту бойынша келісілген тәсілдерді қалыптастыруға ықпал ете отырып, ЕАЭО елдерінің мемлекеттік органдары, теміржол әкімшіліктері мен бизнес қауымдастығы арасындағы диалог үшін маңызды алаңға айналды.

13 қарашаның 2025 Арзыбек Қожошевтің редакциясымен жарық көрген "Еуразиялық энергетикалық саясат" монографиясы үздік экономикалық кітап ретінде танылды "Еуразиялық энергетикалық саясат" монографиясы "Жылдың экономикалық кітабы – 2025" сыйлығына ие болды. Марапаттау рәсімі 11 қарашада Мемлекеттік Кремль сарайында Ресейдің Еркін экономикалық қоғамының 260 жылдығына арналған мерейтойлық съезд және X Жалпыресейлік экономикалық жиналыс шеңберінде ұйымдастырылды.   ЕЭК энергетика және инфрақұрылым министрі Арзыбек Қожошевтің жалпы редакциясымен Еуразиялық экономикалық комиссияның авторлар ұжымы дайындаған кітап "Интеграциялық процестер: даму перспективалары" номинациясы бойынша үздік атанды. Монографияда ЕАЭО аясында бірыңғай энергетикалық саясатты қалыптастыру және дамыту мәселелері зерттеледі. "Бұл марапат еуразиялық экономикалық тақырыпқа деген қызығушылықтың өскенін және жүргізілген зерттеудің сапасын дәлелдейді", – деп атап өтті Арзыбек Қожошев. "Жылдың экономикалық кітабы" қоғамдық сыйлығы "Ресейдің еркін экономикалық қоғамы" атты жалпыресейлік қоғамдық ұйымы тарапынан экономика саласындағы үздік басылымдарды анықтау мақсатында тағайындалған. Марапат 2018 жылдан бастап жыл сайын беріліп келеді. 11 қарашада Ресейде Ресей Федерациясы Үкіметінің 2015 жылғы шешімімен құрылған экономистер күні атап өтіледі. Іс-шара 2025 жылы Ресейден және бірқатар шет елдерден 3,5 мыңнан астам қатысушыны біріктірді.

13 қарашаның 2025 ЕЭК тұтынушылардың құқықтарын қорғау саласындағы келісілген саясатты іске асыруды талқылады Тұтынушылардың құқықтарын қорғау мәселелері жөніндегі Консультативтік комитеттің отырысында "Стратегия-2025" аясында салалық іс-шараларды іске асырудың бес жылдық кезеңінің қорытындылары шығарылды. Еуразиялық экономикалық комиссияның техникалық реттеу жөніндегі министрі Валентин Татарицкий: "Тұтынушылардың құқықтарын қорғау саласындағы ынтымақтастық түбегейлі жаңа деңгейге көтерілді. ЕАЭО аясында тұтынушылардың құқықтарын қорғаудың сенімді жүйесін қалыптастыру мақсатында Одақ елдері алғаш рет бірлескен іс-қимылдар бағдарламасын қабылдады. Бұл қадам дер кезінде жасалған және аса маңызды шешім болып саналады. Бұл бағыттағы бірлескен жұмыстың нәтижелері туралы ақпаратты 2026 жылдың бірінші жартыжылдығында Еуразиялық құқықтық кеңеске ұсыну жоспарлануда". Консультативтік комитет мүшелері 2030 жылға дейінгі жаңа бірлескен іс-қимылдар бағдарламасын талқылады, оның жобасы келесі жылы Үкімет басшыларының қарауына ұсынылады. ЕЭК министрі бағдарламаның қоғамдық ұйымдар мен бизнестің белсенді қатысуын көздейтінін, бұл ортақ тұтыну нарығын дамытуға кешенді және үйлесімді тәсілді қамтамасыз етуге мүмкіндік беретінін атап өтті. Отырысқа қатысушылар салалық ынтымақтастықты одан әрі кеңейту қажеттігін растады, 2026 жылға арналған тұтынушылардың құқықтарын қорғау саласындағы ақпараттық жұмыстың тақырыбын келісті және Беларусь Республикасының Монополияға қарсы реттеу және сауда министрлігінің тауарларда және оларды сату орындарында бейәдеп сөздер мен этикаға сай емес суреттерді қолдануды шектеу жөніндегі ұсынысы қаралды. Одақ мемлекеттерінің тұтынушылардың құқықтарын қорғау мәселелері жөніндегі консультативтік комитет мүше мемлекеттердің бейіндік салада келісілген саясатты іске асыру мәселелері бойынша ұсыныстар, ұсынымдар дайындау және консультациялар өткізу үшін Комиссия Алқасының жанынан құрылған. Консультативтік комитеттің құрамына ЕАЭО елдерінің мемлекеттік органдарының, бизнесінің, ғылыми және қоғамдық ұйымдарының өкілдері кіреді. Консультативтік комитеттің төрағасы – ЕЭК Техникалық реттеу министрі Валентин Татарицкий.

12 қарашаның 2025 Андрей Слепнев: "ЕАЭО – ҚХР Бірлескен комиссиясында өзара сауда күн тәртібіндегі негізгі мәселелер бойынша шешімдер ұсынылды" Еуразиялық экономикалық одақ пен Қытай Халық Республикасы арасындағы сауда-экономикалық ынтымақтастық туралы келісімді іске асыру жөніндегі Бірлескен комиссияның V отырысы 12 қарашада ЕЭК Сауда жөніндегі министрі Андрей Слепнев пен ҚХР Коммерция министрінің орынбасары Ян Дунның төрағалық етуімен Еуразиялық экономикалық комиссияның штаб-пәтерінде өтті. Соңғы бірнеше жылда тараптардың сауда-экономикалық байланыстарының құрылымы мен бағыттарында сапалы өзгеріс болғаны атап өтілді. Осындай жағдайда үйлесімді дамуды қамтамасыз ететін негізгі мәселелерге назар аудару өте маңызды. Төмен көміртекті даму саласындағы стандарттарды үйлестіру және климаттық реттеу тетіктерін жетілдіруге байланысты сауда тосқауылдары тәуекелдерін азайту бойынша тұрақты диалог орнату жөнінде келісімге қол жеткізілді, оның ішінде өнеркәсіптік өнімдегі көміртек ізін есептеу мәселесі де қамтылды. ЕАЭО мемлекеттері мен Қытай жеткізу тізбектерінің тұрақтылығы мен орнықтылығын арттыруға және ДКҰ ережелеріне сәйкес келмейтін саудадағы шектеу шараларына қарсы тұруға ұмтылатын болады. "Тараптар әлемдік экономиканың жұмыс істеуі үшін ашық, тұрақты және болжамды негізді қамтамасыз еткен көпжақты сауда жүйесінің маңыздылығын атап өтті", – деді Андрей Слепнев. Қытай Коммерция министрінің орынбасары Ян Дун ҚХР мен ЕАЭО арасындағы сауда-экономикалық ынтымақтастықты одан әрі тереңдетудің айтарлықтай әлеуеті бар екенін және оның ортақ күш-жігерге негізделгенін атап өтті. Ол 2024 жылғы сәуірде өткен Бірлескен комиссияның IV отырысынан кейін Келісімді іске асырудан одан да үлкен нәтижелерге қол жеткізу және өзара іс-қимыл салаларын кеңейту мақсаты қойылғанын атап өтті. "2024 жылы өзара сауда көлемі бұрын-соңды болмаған көрсеткішке жетті. 2025 жылдың қаңтар-қыркүйек айларында біздің статистика бойынша өзара сауда көлемі 228,38 млрд АҚШ долларына жетті", – деп мәлімдеді Ян Дун. Тараптар "Бір белдеу – бір жол" бастамасын ЕАЭО-мен үйлестіру жөнінде диалог орнатуға және ынтымақтастық салалары бойынша ортақ шараларды айқындауға дайын екендіктерін растады. ЕАЭО елдерінің ауыл шаруашылығы өнімдерін экспорттаушыларды CIFER жүйесінде тіркеу бойынша бірлескен семинар өткізу және СФС-шараларды қолдану мәселелері жөнінде консультациялар жүргізу туралы келісімге қол жеткізілді. Андрей Слепнев атап өткендей, бұл мал шаруашылығы өнімдерін қытай нарығына шығару мүмкіндігін кеңейтуге және экспортталатын өсімдік өнімдерінің ассортиментін арттыруға ықпал етеді (күздік бидай мен арпа, бидай кебегі, рапс тұқымы, аквашаруашылық өнімдері және т.б.). Тараптар навигациялық пломбаларды қолдану және кедендік ақпарат алмасу мәселелерін талқылау үшін кедендік ынтымақтастық жөніндегі кіші комитеттің отырысын өткізуге келісті. Фармацевтика, ішкі нарықты қорғау, мемлекеттік сатып алу және бәсекелестік, электрондық сауда, "Еуразиялық агроэкспресс" жобасын дамыту, саудадағы техникалық кедергілерді жою салаларында өзара іс-қимыл бойынша диалог жүргізу көзделген. Кездесу қорытындысы бойынша тараптар сауда-экономикалық ынтымақтастықты дамыту жөніндегі жол картасының жаңартылған нұсқасын дайындауға келісті.

12 қарашаның 2025 Бақытжан Сағынтаев Қытай Коммерция министрінің орынбасары Ян Дунмен келіссөздер жүргізді Еуразиялық экономикалық комиссия Алқасының Төрағасы Бақытжан Сағынтаев 12 қарашада ЕЭК штаб-пәтерінде Қытай Халық Республикасы Коммерция министрінің орынбасары Ян Дунмен жұмыс кездесуін өткізді. Кездесу барысында Сауда-экономикалық ынтымақтастық туралы келісім аясында Еуразиялық экономикалық одақ пен ҚХР елдерінің өзара іс-қимылының нәтижелері мен болашағы талқыланды. "Қытай Халық Республикасы ЕАЭО мемлекеттерінің негізгі сыртқы экономикалық әріптесі болып табылады. 2024 жылдың қорытындысы бойынша өзара сауда көлемі рекордтық көрсеткішке жетіп, 291 млрд АҚШ долларын құрады. ҚХР-дың үлесі Одақтың үшінші елдермен жалпы тауар айналымының 35%-ын құрады", – деп атап өтті Бақытжан Сағынтаев. Бүгін ЕЭК алаңында ЕАЭО – Қытай Бірлескен комиссиясының бесінші отырысы өтті, онда Келісімді іске асыру жоспарының табысты орындалғаны атап өтілді. Тараптар жол картасын жаңарту қажеттігі жөнінде ортақ пікірге келді. Бұл бағыттағы қызметті жақын күндері бастау көзделіп отыр. "Жол картасын стандарттарды үйлестіру және басым салаларда рәсімдерді жеңілдету жөніндегі нақты шаралармен толықтыру қажет деп санаймын", – деп атап өтті ЕЭК Алқасының Төрағасы. Кездесу қорытындысы бойынша тараптар сауданың тұрақты өсуі, экономикалық ынтымақтастықтың дамуы және ЕАЭО мен Қытай кәсіпкерлері үшін қолайлы жағдайлар қамтамасыз етілетініне сенімді екендіктерін айтты. ЕАЭО – Қытай Бірлескен комиссиясы бір жақтан Еуразиялық экономикалық одақ пен оның мүше мемлекеттері және екінші жақтан Қытай Халық Республикасы арасындағы сауда-экономикалық ынтымақтастық туралы келісімнің 12.1-бабына сәйкес 2018 жылы құрылған болатын. Бірлескен комиссияның тең төрағалары – ЕЭК Сауда жөніндегі министрі Андрей Слепнев және ҚХР Коммерция министрінің орынбасары Ян Дун.

12 қарашаның 2025 ЕЭК V Спартакиадасының қорытындылары шықты Еуразиялық экономикалық комиссияның штаб-пәтерінде ЕЭК V Спартакиадасының жеңімпаздарын салтанатты марапаттау рәсімі өтті. Комиссия Алқасының Төрағасы Бақытжан Сағынтаев чемпиондарды құттықтап, алтын медальдарды табыстады. 2025 жылы спартакиада жарыстарына Еуразиялық экономикалық одақтың бес елінің өкілдері – ЕЭК-тің 300-ден астам қызметкерлері мен лауазымды тұлғалары қатысты. 20-дан 60 жасқа дейінгі 106 қатысушы алтын медальға ие болды.   Спартакиада бағдарламасына шағын футбол, баскетбол, волейбол, үлкен теннис, кросс, арқан тарту, шахмат, дойбы, кеудені жерден көтеру, тартылу, армрестлинг, гір көтеру және басқа да 26 спорт түрі кірді. ЕЭК-тің энергетика және инфрақұрылым министрі Арзыбек Кожошев 100 метрге жүгіруде және блок командасы сапында шағын футбол турнирінде жеңіске жетіп, екі алтын медаль алды, ал тартылудан үшінші орын үшін қола медальға ие болды. ЕЭК-тің экономика және қаржы саясаты министрі Бахыт Сұлтанов бильярдтан алтын медальға, ал шағын футболдан қола медальға ие болды. ЕЭК Сауда министрі Андрей Слепнев тартылудан өткен жарыста бірінші орын алды. 3 км кросс жарысында күміс медальды ЕЭК-тің кедендік ынтымақтастық жөніндегі министрі Руслан Давыдов жеңіп алды. ЕЭК-тің бәсекелестік және монополияға қарсы реттеу жөніндегі министрі Максим Ермолович үлкен теннис жарысында үшінші орын алды. ЕЭК қызметкері Дмитрий Белов әртүрлі спорттық жарыстарға қатысып төрт алтын медальмен көш бастады. Алина Каримованың, Дарья Мельниктің, Нұртай Мусуралиевтің, Максим Натальченконың, Сергей Панковтың және Улан Чолпонбаевтың есебінде үш алтыннан бар. Жалпыкомандалық жарыста энергетика және инфрақұрылым министрінің блогы 44 медаль (оның 20-сы алтын) алып, үздік нәтиже көрсетті. Бақытжан Сағынтаев ЕЭК министрі Арзыбек Қожошевқа V Спартакиаданың жеңімпаз кубогын салтанатты түрде табыстады.

Жаңалықтар

Іздеу нәтижелері: 6998