7 тамызда Шолпан-Ата қаласында өткен Еуразиялық үкіметаралық кеңестің отырысында Еуразиялық экономикалық комиссияның 2025 жылға арналған трансшекаралық нарықтардағы бәсекелестіктің жай-күйі және олардағы бәсекелестіктің ортақ қағидаларын бұзудың жолын кесу бойынша қабылданған шаралар туралы жылдық есебі мақұлданды.
Құжатқа қызметтің негізгі бағыттары бойынша Комиссияның бәсекелестік және монополияға қарсы реттеу жөніндегі блогының жұмысы енгізілген. Олардың қатарында – бәсекелестіктің жалпы ережелерін бұзудың жолын кесу; Еуразиялық экономикалық одақ құқығын және ЕАЭО елдерінің бәсекелестік және монополияға қарсы реттеу саласындағы заңнамасын жетілдіру; бәсекелестікті адвокаттандыру және халықаралық ынтымақтастық; Одақ елдерінде мемлекеттік баға реттеуді енгізу мәселелері; бәсекелестікті дамыту үшін қолайлы жағдайлар жасау.
2025 жылы Комиссия негізінен жосықсыз бәсекелестік қағидаларын бұзу туралы 18 өтінішті қарағаны атап өтілді. Бұл салада ЕЭК Алқасының үш шешімі қабылданды.
22 тауар нарығының бәсекелестік жағдайына бағалау жүргізілді.
Халықаралық роумингте ұялы байланыс құнын төмендету бойынша жұмыс жалғасуда.
ЕАЭО елдерінің мемлекеттік баға реттеуді енгізу (ұзарту) туралы төрт хабарламасы қаралды.
Жылдық есепте келесі есепті жылы жүзеге асыру жоспарланып отырған бәсекелестік және монополияға қарсы реттеу мәселелері жөніндегі іс-шаралар белгіленген. Олардың ішінде: ЕАЭО туралы шарттың 76-бабында белгіленген трансшекаралық нарықтардағы бәсекелестіктің жалпы қағидаларын бұзудың жолын кесу; мүше мемлекеттердің аумақтарында халықаралық роумингте ұялы байланыс қызметтеріне әділ тарифтерді белгілеу үшін жағдайлар жасау; ортақ биржалық (ұйымдастырылған) тауар нарығын қалыптастыру; ЕАЭО-ның бәсекелестік саласындағы құқығын жетілдіру бар.
