Еуразиялық экономикалық комиссияның Кеден заңнамасы және құқық қолдану практикасы департаментінің директоры Қуат Рахимовтың төрағалығымен Кедендік реттеу жөніндегі консультативтік комитет жанындағы бейінді жұмыс тобының отырысында Еуразиялық экономикалық одақ елдерінің тауарларды кедендік декларациялау қағидаларын жетілдіру, ретке келтіру және біріздендіру жөніндегі құқық қолдану практикасының мәселелері мен бастамашыл ұсыныстары талқыланды.

Іс-шараға ЕАЭО елдерінің мемлекеттік органдары мен бизнес-қоғамдастығының өкілдері қатысты.

Жұмыс тобы Тауарларға арналған декларацияны толтыру тәртібінде пайдаланылатын экспортталатын тауарларға қатысты қолданылатын "тауар партиясы" ұғымына басты назарды аударды. Бұл кәсіпкерлердің кедендік әкету баждары салынатын тауарларды декларациялау кезінде Ресейдегі құқық қолдану практикасы мәселелері бойынша Комиссияға жүгінуіне байланысты болды. Атап айтқанда, экспортталатын тауарларды олар туралы мәліметтерді бір декларацияда көрсету үшін бір мезгілде жөнелтуге қатысты келіспеушіліктер туындады.

Отырысқа қатысушылар кәсіпкерлер үшін жағымсыз салдар мен кележақ пікірсайыстарды болдырмау үшін кеден органдары мен бизнестің бұл ұғымды біркелкі түсіндіруін қамтамасыз ету қажеттігін атап өтті.

Қуат Рахимов мәселені одан әрі реттеу жөніндегі қадамдарды, соның ішінде Одақ актілеріне өзгерістер енгізу арқылы айқындау үшін жан-жақты пысықтаудың маңыздылығын атап көрсетті. Атап өтілгендей, Комиссия қажет болған жағдайда тауарларға арналған декларацияны толтыру қағидаларына тиісті нақтылауды дайындайтын болады.

Сондай-ақ, Тауарларға арналған декларацияны толтыру тәртібіне өзгерістердің күшіне енуі қарсаңында сарапшылар контейнерлер туралы мәліметтерді көрсетудің ерекшеліктерін қарастырды. Атап айтқанда, Беларусь мемлекеттік органдары мен Қазақстанның іскер топтарының жолданымын ескере отырып, жұмыс тобының мүшелері мынадай ортақ түсініктікке келді: контейнердің ұзындығы, ені мен биіктігі туралы деректер болмаған жағдайда төрт нөлді көрсеткен жөн. Бұдан басқа, практикалық қолданудың алғашқы алты айының қорытындысы бойынша қалыптасқан тәжірибені жинақтау және қажет болған жағдайда контейнерлер туралы мәліметтерді толтыру қағидаларын нақтылауға шешім алынды.