Еуразиялық экономикалық комиссия Алқасы Дәрілік заттарға құрамындағы қоспаларды бағалау және бақылау бөлігінде зерттеу (сынақ) жүргізуге қойылатын талаптарды бекітті.

Талаптар дәрілердің құрамындағы, соның ішінде оларды сақтау процесінде пайда болатын қоспалардың қауіпсіздігін зерттеу және нормалау тәсілдемелерін белгілейді. Бұл дәрілердің сапасын оларды өндіруші шығарған кезде де, сол сияқты препараттарды сату және қолдану процесінде де бақылап отыруға мүмкіндік береді.

Талаптарда жазылған тәсілдемелер қоспаларды нормалаудың халықаралық қағидаттарына сәйкес келеді.

"Құжат Одақта қалыптастырылған, дәрілердің сапасына қойылатын талаптардың бірыңғай жүйесін дамытуды жалғастыруға, препараттағы қоспалардың қауіпсіз деңгейін олардың пациентке тәуліктік әсер етуі тұрғысынан зерттеп, негіздеудің бірыңғай қағидаттары мен тәртібін белгілеуге мүмкіндік береді",- деп атап өтті ЕЭК Техникалық реттеу жөніндегі министрі Виктор Назаренко.