28-майда Астана шаарында V Евразия экономикалык форумунун "ЕАЭБ глобалдык санариптик жарышта: жасалма интеллектке коюм" темасындагы пленардык жыйыны болуп өттү.

Иш-чаранын негизги спикерлери катары Евразия экономикалык бирлигинин мүчө мамлекеттеринин башчылары: Беларусь Республикасынын Президенти Александр Лукашенко, Казакстан Республикасынын Президенти Касым-Жомарт Токаев, Кыргыз Республикасынын Президенти Садыр Жапаров, Россия Федерациясынын Президенти Владимир Путин, ошондой эле Армения Республикасынын вице-премьер-министри Мгер Григорян жана Евразия экономикалык комиссиясынын Коллегиясынын Төрагасы Бакытжан Сагинтаев чыгып сүйлөштү.

Пленардык отурумдун ишине ардактуу коноктор – Куба Республикасынын вице-президенти Вальдес Меса Сальвадор, Вьетнам Социалисттик Республикасынын Премьер-министринин орун басары Хо Куок Зунг, Иран Ислам Республикасынын өнөр жай, кен жана соода министри жана Бириккен Араб Эмираттарынын тышкы соода боюнча мамлекеттик министри Тани бин Ахмед Аль Зейуди катышты.

Бакытжан Сагинтаев өз баяндамасында евразиялык экономикалык интеграцияны андан ары өнүктүрүү үчүн ЕЭФ-2026нын негизги темасынын маанилүүлүгүн баса белгиледи.  

"Бул тема Казакстан Республикасынын Президенти Касым-Жомарт Токаевдин Бирликтин мүчө өлкөлөрүнүн башчыларына жолдогон кайрылуусунда белгиленген артыкчылыктуу багыттарды чагылдырат жана азыркы дүйнөдө жасалма интеллекттин стратегиялык маанилүүлүгүн баса белгилейт, – деп белгиледи ЕЭК Коллегиясынын башчысы. – Бүгүн биз технологиялык өзгөрүүлөр экономикалык өнүгүүнү гана эмес, мамлекеттердин стратегиялык позицияларын да аныктай турган учурда турабыз".

Бакытжан Сагинтаев баса белгилегендей, глобалдык санариптик жарыштын шартында ЖИ атаандаштыкка жөндөмдүүлүктүн жана эгемендүүлүктүн негизги факторуна айланууда. Ошол эле учурда мамлекеттердин санариптик эгемендүүлүгү негизги принцип бойдон калууда.

"Жасалма интеллект технологияларын обочолонуу шартында натыйжалуу өнүктүрүү мүмкүн эмес. Евразиялык "бешилтик" өлкөлөрүнүн лидерлери тарабынан бүгүн кабыл алынган жасалма интеллектти жоопкерчиликтүү өнүктүрүү жөнүндө Биргелешкен билдирүү так ушул логикада даярдалган", – деп түшүндүрдү Бакытжан Сагинтаев.

Жаңы документ мүчө мамлекеттердин евразиялык экономикалык интеграцияны өнүктүрүү боюнча макулдашылган иш-аракеттери үчүн негизги багыттарды белгилейт.

"Экономикада жасалма интеллектти колдонуу маселесине бардык мүмкүн болгон тобокелдиктерди алдын ала системдүү талдоодон өткөргөндөн кийин колдонуу максатка ылайыктуу. Жасалма интеллект – адамдын мүмкүнчүлүктөрүн арттыруучу курал. Бирок акыркы чечим ар дайым адамда калышы керек», – деп жыйынтыктады Бакытжан Сагинтаев.

Пленардык отурумдун катышуучулары белгилегендей, коюлган милдеттерди ишке ашыруу үчүн зарыл болгон компетенцияларга жана ресурстарга ээ болгон ЕАЭБ мамлекеттеринин тармактык мамлекеттик органдарынын жана алдыңкы технологиялык компанияларынын жигердүү катышуусу талап кылынат.