Евразия өкмөттөр аралык кеңешинин тапшырмасын аткаруу максатында Евразия экономикалык комиссиясынын Коллегиясы Кытай Эл Республикасынан алюминий фольгага жана титан диоксидине карата демпингге каршы алымдарды беш жылдык мөөнөткө киргизүү жөнүндө чечим кабыл алды. Чендер тиешелүүлүгүнө жараша 17,16-20,24% жана 14,27-16,25% өлчөмүндө аныкталган.

Мында фольга боюнча өндүрүүчү Xiamen Xiashun Aluminium Foil Co., Ltd. тарабынан кабыл алынган баа милдеттенмелери жактырылды, аларды аткаруу шартында тиешелүү товарларга демпингге каршы алым төлөнбөйт. Өз кезегинде, титан диоксиди боюнча LB тобуна кирген компаниялардын (тактап айтканда, LB Group Co., Ltd., Henan Billions Advanced Material Co., Ltd., LB Lufeng Titanium Industry Co., Ltd., LB Sichuan Titanium Industry Co., Ltd., LB Xiangyang Titanium Industry Co., Ltd.) ошондой эле Shandong Dawn Titanium Industry Co., Ltd. компаниясынын баа боюнча милдеттенмелери бекитилди.

Ошол эле учурда алып келүүнүн ар жылдык көлөмдөрү белгиленген, алардын алкагында демпингге каршы алымдар алынбайт. "Фольгага тиешелүү учурда көрсөтүлгөн көлөмдөр Беларусь Республикасы үчүн 385 тоннаны, Казакстан Республикасы үчүн 2025-жылы 500 тоннаны, 2026-жылы 1 000 тоннаны, 2027-жылы 1 300 тоннаны, 2028-жылы 1 500 тоннаны, 2029-жылы 1 650 тоннаны, 2030-жылы 1 650 тоннаны, Кыргыз Республикасы үчүн — 325 тоннаны түзүшү керек. Титандын диоксиди боюнча кеп Армения Республикасы үчүн 250 тонна, Беларусь Республикасы үчүн 4 500 тонна, Казакстан Республикасы үчүн 5 000 тонна жана Кыргыз Республикасы үчүн 300 тонна жөнүндө болуп жатат", — деп тактады ЕЭКтин соода боюнча министри Андрей Слепнев.

Бул товарларды мүчө мамлекеттер үчүн белгиленген ар жылдык көлөмдөрдүн чегинде демпингге каршы алымдарды төлөбөстөн ташып келүү (баа милдеттенмелеринин алкагынан тышкары) алардын максаттуу багыты ырасталганда ишке ашырылат.

Чечимдер расмий түрдө жарыяланган күндөн тарта 30 календардык күн өткөндөн кийин күчүнө кирет.