Евразия экономикалык бирлигинин өлкөлөрүндө темир жол машина куруу тармагында өнөр жай кызматташтыгын кеңейтүү үчүн Евразия экономикалык комиссиясынын өнөр жай жана агроөнөр жай комплекси боюнча блогунун өкүлдөрү Беларустун станок куруу ишканаларынын жетекчилиги жана техникалык адистери менен Москва шаарындагы Коломен транспорттук машина куруу заводунун өндүрүштүк аянтчасында бир катар жумушчу жолугушууларды өткөрүштү.
Азыркы учурда бул ишкана 1 МВт´тан 7,35 МВт´ка чейинки кубаттуулук диапазонунда кыймылдаткычтарды өндүрүүнү өнүктүрүү боюнча долбоорду иштеп чыгуу менен алектенет. Аны ишке ашыруу, анын ичинде ЕАЭБ алкагында өнөр жай тармактарындагы кооперациялык долбоорлорду каржылык колдоо механизми аркылуу пландаштырылган.
Иш-чаралардын жүрүшүндө тараптар кызматташууга даяр экендиктерин билдиришти, коммерциялык сунуштар менен алмашууга жана жабдууларды жеткирүү келишимдерин даярдоого киришти.
Буга байланыштуу ЕЭКтин Өнөр жай саясаты департаментинин директорунун орун басары Виталий Вовк мындай деп белгиледи: "Биздин Бирлик өлкөлөрүнүн өнөр жайчылары айрым ишканалардын гана эмес, бүтүндөй евразиялык транспорттук машина куруу кластеринин жана өнөр жайдын чектеш тармактарынын технологиялык эгемендүүлүгүнө жетишүү үчүн жаңы кооперациялык тизмектерди түзүүнүн маанилүүлүгүн түшүнүшү зарыл".
Жумушчу жолугушуулар "Белоргстанкинпром", "Вистан", "Рухсервомотор", "Красный борец", ГСЗУ, "Станко-Гомель" сыяктуу компаниялардын өкүлдөрү менен өткөрүлдү.
Коломен заводу магистралдык жүргүнчүлөрдү ташуучу тепловоздорду, электровоздорду жана дизелдик кыймылдаткычтарды чыгарат.