Евразия экономикалык комиссиясынын Коллегиясы 19-августтагы отурумда Евразия экономикалык бирлигинин алкагында айыл чарба өсүмдүктөрүнүн үрөнүн (көчөт материалын) өндүрүү ыкмаларын жана схемаларын аларды жүгүртүүдө унификациялоого карата мамилелер жана кант тармагын туруктуу өнүктүрүү боюнча чаралар жөнүндө сунуштамаларды кабыл алды.

"Үрөнчүлүк боюнча документ Евразия экономикалык бирлигинин өлкөлөрүнүн башчылары тарабынан бекитилген үрөнчүлүк чөйрөсүндө улуттук мыйзамдарды ырааттуу жакындаштыруу жана айыл чарба өндүрүшүн мыкты сорттогу жогорку сапаттагы үрөндөр менен камсыздоо максатында унификациялоо чараларынын тизмесин ишке ашыруу үчүн кабыл алынды", – деп белгиледи ЕЭКтин өнөр жай жана агроөнөр жай комплекси боюнча министри Гоар Барсегян.

Кабыл алынган ыкмалар Бирлик мамлекеттерине дан, дан буурчак, техникалык, май, мөмө-жемиш өсүмдүктөрүнүн жана картошканын уруктарын (көчөт материалдарын) өндүрүүнүн илимий негизделген ыкмаларын жана схемаларын, ошондой эле айыл чарба өсүмдүктөрүнүн сортторун сактоо боюнча илимий негизделген иш-чараларды жана ыкмаларды колдонууну сунуштайт, алардын негизинде жогорку сорттук жана түшүмдүүлүк сапаттары менен үрөндөрдү өстүрүү камсыз кылынат. Документте үрөн өндүрүүнүн схемасында, анын ичинде культура, сорт, үрөндөрдү өндүрүү, себүүгө даярдоо, себүүнү жана жыйноону жүргүзүү, кошумча иштетүү, сактоо жана негизги агротехникалык жана башка иш-чаралар боюнча зарыл иш-чаралар жөнүндө маалыматтар каралган.

ЕЭКтин сунуштамасын колдонуу эң мыкты сорттук, чарбалык баалуу жана биологиялык касиеттери менен айырмаланган сортторду алмаштыруу жана сортторду жаңыртуу үчүн талап кылынган сорттордун жогорку сапаттагы үрөндөрүн өндүрүүнү жана сатууну камсыз кылууга мүмкүндүк берет.

ЕАЭБ өлкөлөрүнүн айыл чарба өсүмдүктөрүнүн үрөнчүлүк чөйрөсүндө ишмердик жүргүзгөн ишканалары тарабынан үрөндөрдү (көчөт материалдарын) өндүрүүдө жол-жоболордун эквиваленттүүлүгү камсыз кылынары, ал эми улуттук мыйзамдарда өз ара соодага таасир этүүчү айырмачылыктар четтетилээри да маанилүү.

Комиссия тарабынан сунушталган, кант тармагын туруктуу өнүктүрүү боюнча чаралардын топтому жөнүндө айта турган болсок, аны ишке ашыруу бир катар практикалык маселелерди чечүүгө да жардам берет. Баарыдан мурда тармактын ишинин натыйжалуулугун жогорулатууга, кантка, өндүрүш каражаттарына импорттук көз карандылыкты азайтууга, экспорттук потенциалды өстүрүүгө өбөлгө түзөт.