"ИННОПРОМ" алкагында болуп өткөн ЕАЭБдин Өнөр жай саясаты боюнча кеңешинин жыйынынын жүрүшүндө ЕАЭБдин алкагындагы өнөр жай кооперациясынын маселелери, анын ичинде биргелешкен долбоорлорду каржылык колдоо механизмдерин ишке ашыруу, ошондой эле өнөр жайдын жогорку технологиялык тармактарында Бирликтин мүчө мамлекеттеринин өз ара аракеттенүүсүнүн келечектүү багыттары талкууланды.
Евразия мейкиндигинде өндүрүштүк кооперацияны кеңейтүүгө, биргелешкен инвестициялык долбоорлордун натыйжалуулугун жогорулатууга өзгөчө көңүл бурулду.
"ЕАЭБ мамлекеттеринин алдында өнөр жайлык өз ара аракеттенүүнүн жетишилген деңгээлин сактап калуу гана эмес, ошондой эле технологиялык суверендүүлүккө, инновацияларга жана стратегиялык долбоорлорду биргелешип ишке ашырууга негизделген кооперациянын жаңы этабына өтүүнү камсыз кылуу милдети турат. Өнөр жай интеграциясын андан ары тереңдетүү, кооперациялык чынжырларды кеңейтүү жана биздин мамлекеттердин күч-аракеттерин бириктирүү глобалдык деңгээлде ЕАЭБ экономикасынын атаандаштыкка жөндөмдүүлүгүн жогорулатуунун эң маанилүү факторлору болот деп ишенем", – деп Евразия экономикалык комиссиясынын Өнөр жай жана АӨК боюнча министри Гоар Барсегян белгилеп, өнөр жай кызматташтыгын тереңдетүү ЕАЭБге мүчө мамлекеттердин экономикалык потенциалын чыңдоонун негизги факторлорунун бири бойдон калып жатканын баса белгиледи.
Россия Федерациясынын өнөр жай жана соода министри Антон Алихановдун жана тармактык ассоциациялар менен компаниялардын жетекчилеринин катышуусунда өткөн "Протоколсуз диалог" ишкердик эртең мененки тамагында ЕЭК министри биргелешкен кооперациялык долбоорлорго кредиттер боюнча пайыздык чендерди субсидиялоо аркылуу ишке ашырылуучу ЕАЭБдеги өнөр жай кооперациясына каржылык көмөк көрсөтүүнүн колдонуудагы механизмин сунуштады.
"Бул инструмент ЕАЭБ мүчө мамлекеттеринин ортосундагы өнөр жай кызматташтыгын өнүктүрүү үчүн жаңы мүмкүнчүлүктөрдү ачат жана евразия мейкиндигинде биргелешкен жогорку технологиялык долбоорлорду ишке ашырууну стимулдаштыруу менен туруктуу өндүрүштүк чынжырлардын калыптанышына өбөлгө түзөт", – деп белгиледи Гоар Барсегян, ошондой эле азыркы учурда ушундай эле колдоону агроөнөр жай секторуна да жайылтуу боюнча иштер жүргүзүлүп жатканын кошумчалды.
