17-декабрда Евразия экономикалык бирлигинин Ишкер кеңешинин Президиумунун отуруму атаандаштык жана монополияга каршы жөнгө салуу боюнча министри Максим Ермоловичтин катышуусу менен өттү. Отурумда Евразия экономикалык комиссиясынын ал жетектеген блогунун жана Бирликтин Ишкер кеңешинин биргелешкен иш-чараларынын планы бекитилди.

Документ эки негизги багыт боюнча иш-чараларды камтыйт. Алардын бири эки түзүмдүн өз ара иштешүүсүнүн натыйжалуулугун жогорулатууга тиешелүү. Башка документ – Бирликтеги мамлекеттик сатып алуулар чөйрөсүн жөнгө салуу, атаандаштыктын артыкчылыктары, атаандаштыкты адвокаттоо механизмдери аркылуу укуктар жана өз кызыкчылыктарын коргоо жолдору жөнүндө бизнестин маалымдуулугун жогорулатууга тиешелүү.

Ишкер кеңеши атаандаштык жана мамлекеттик сатып алуулар чөйрөсүндөгү, атап айтканда, тоскоолдуктар, укуктук жөнгө салуудагы кемчиликтер, ЕАЭБ алкагындагы атаандаштык эрежелеринин ыктымал бузуулары менен байланышкан көйгөйлүү маселелерди аныктап, Комиссияга жөнөтүп турат. Андан кийин ЕЭК жана Ишкер кеңеш Бирликтин бизнеси үчүн актуалдуу жана башка маселелерди биргелешип талкуулашат жана аларды чечүүнүн өз ара алгылыктуу жолдорун аныкташат.

Ишкер коомдоштукту ЕЭКтин ишине кеңири тартуу максатында Ишкер кеңешинин өкүлдөрү блоктун иш-чараларына чакырылат, анын алкагында бизнес евразиялык күн тартибинин маселелери боюнча өз көз карашын билдирет.

"Атаандаштык боюнча блок ЕАЭБ Ишкер кеңеши менен тыгыз өнөктөштүк механизмин түзөт. Иштелип чыккан план мындай өнөктөштүктүн алгоритмин жана анын айрым элементтерин так түшүнүүгө көмөктөшөт, – деп баса белгиледи Максим Ермолович. – Биз ЕАЭБдин бизнес-ассоциациялары менен системалуу иш алып барууну улантууну көздөйбүз жана Ишкер кеңеши байланыштын, биздин тармактык темалар боюнча маалымдоонун өзүнчө бир борборуна айланып, актуалдуу маселелерди Комиссиянын аянтчасында андан ары кароо үчүн топтойт деп ишенебиз".