Евразия экономикалык бирлигинин мамлекет башчылары Бирликтин 2026-жылга карата эл аралык ишмердүүлүгүнүн негизги багыттарын бекитишти.

Жакынкы коңшулар менен соода-экономикалык диалогду улантуу, байкоочу мамлекеттер менен кызматташтыкты өнүктүрүү, Евразиянын, Африканын жана Латын Америкасынын негизги интеграциялык бирикмелери менен өз ара аракеттенүүнү активдештирүү – артыкчылыктуу багыт болуп саналат.

Евразия транспорттук коридорлорун өнүктүрүү жана аларды көп тараптуу эл аралык долбоорлор менен айкалыштыруу жолу менен Бирликтин үчүнчү өлкөлөрдүн рыноктору менен байланышын жогорулатууга өзгөчө басым жасалды.

Негизги багыттардын катарында – тышкы экономикалык ишмердикти жүргүзүү бөлүгүндө мүчө мамлекеттердин бизнеси үчүн жагымдуу шарттарды түзүү каралат.

2026-жылы Бирликтин күч-аракеттери кызматташуунун түзүлгөн механизмдерин, анын ичинде меморандумдардын, декларациялардын жана соода макулдашууларынын алкагында өнүктүрүүгө багытталат.

Кызматташуу маанилүү мааниге ээ болгон эл аралык уюмдардын арасында Бириккен Улуттар Уюму, анын регионалдык комиссиялары жана тармактык уюмдары, Дүйнөлүк соода уюму, Дүйнөлүк бажы уюму жана башкалар белгиленди. Регионалдык бирикмелердин арасында – КМШ, ШКУ, АСЕАН, АӨИЧК, Африка бирлиги, Африкадагы бир катар субрегионалдык интеграциялык бирикмелер, анын ичинде Чыгыш Африка коомдоштугу, Борбордук Африка мамлекеттеринин экономикалык коомдоштугу бар.

Регионалдык интеграциялык бирикмелер менен диалогдун жаңы багыттары – Түрк мамлекеттеринин уюму, Араб атаандаштык тармагы, Ислам кызматташтык уюму, Индия океанынын жээктеш өлкөлөрүнүн регионалдык кызматташтык ассоциациясы жана Өнүктүрүү боюнча өкмөттөр аралык уюм менен өз ара аракеттенүү. Бир катар эл аралык уюмдар – Дүйнөлүк энергетикалык кеңеш, Стандартташтыруу боюнча эл аралык уюм, Глобалдык энергетикалык бирикмени өнүктүрүү жана кооперациялоо уюму жана Фармакопеялык дискуссиялык топ менен өз ара аракеттенүүнүн жаңы өнүгүүсү күтүлөт.

КМШ мамлекеттери, БРИКСтин катышуучу өлкөлөрү, соода келишимдерине ылайык Кытай, Вьетнам, Сербия, Сингапур, Иран, убактылуу соода келишимдерине ылайык БАЭ жана Монголия, ошондой эле диалогго кызыгуусун билдирген башка мамлекеттер менен соода-экономикалык кызматташтыкты андан ары өнүктүрүү пландаштырылууда.

ЕАЭБдин эл аралык ишмердиги 2014-жылдын 29-майындагы Евразия экономикалык бирлиги жөнүндө келишимдин 7-беренесине жана Жогорку Евразия экономикалык кеңешинин 2014-жылдын 23-декабрындагы № 99 Чечими менен бекитилген Евразия экономикалык бирлигинин эл аралык кызматташтыгын жүргүзүү тартибине ылайык ишке ашырылат.