Жогорку Евразия экономикалык кеңеши бул төлөмдөрдү которуунун жаңыланган тартибине этап-этабы менен өтүү мезгилинде кириш бажы, атайын, демпингге каршы жана компенсациялык алымдардын суммаларын которуунун үзгүлтүксүздүгүн камсыз кылууга мүмкүндүк берүүчү чечим кабыл алды.

Чечим эки маанилүү өткөөл мезгилди жабат. Биринчиден, ал 2026-жылдын 1-июнунан тартып Евразия экономикалык бирлиги жөнүндө Келишимге өзгөртүүлөрдү киргизүү тууралуу тиешелүү Протокол күчүнө кирген учурга чейин так эрежелерди белгилейт. Экинчиден, бул Протокол күчүнө киргенден кийин жана мүчө мамлекеттердин улуттук (борбордук) банктары өз ара которуу валютасы жөнүндө зарыл болгон эки тараптуу макулдашууларды түзгөн учурга чейин иш-аракеттердин тартибин регламенттейт.

Протоколдун долбоорунун үстүндө иш даярдыктын жогорку деңгээлинде. Документ улуттук (борбордук) банктарга алымдардын суммаларын АКШ долларында гана эмес, ЕАЭБ мамлекеттеринин улуттук валюталарында да которууну жүзөгө ашыруу укугун берет.

"Бекитилген тартип – жаңыланган макулдашууларга өтүү мезгилиндеги туруктуулуктун кепили, – деп белгиледи Евразия экономикалык комиссиясынын экономика жана каржы саясаты боюнча министри Бахыт Султанов. – Ал АКШ долларында болобу же мүчө мамлекеттердин улуттук валюталарында болобу, Бирликтин өлкөлөрүнүн бюджеттери үчүн маанилүү төлөмдөрдүн үзгүлтүксүз жана ачык-айкын чегерилишин камсыздайт жана процесстин бардык катышуучулары үчүн укуктук аныктыкты түзөт".