"Санариптик суверенитет — бул мамлекеттин өзүнүн санариптик агымдарын, маалыматтарды жана инфраструктураны көзөмөлдөө мүмкүнчүлүгү гана эмес, ошондой эле санариптик мейкиндикте өзүнүн оюн эрежелерин түзүү мүмкүнчүлүгү, — деп белгиледи Варос Симонян. — Мында кеп обочолонуу жөнүндө эмес, туруктуу экономикалык өсүш, инновация жана туруктуу интеграция үчүн негиз боло ала турган жалпы, корголгон жана технологиялык жактан шайкеш санариптик мейкиндикти түзүү жөнүндө болуп жатат".
Иш-чаранын катышуучулары ЕАЭБ өлкөлөрү үчүн санариптик суверенитеттин эң маанилүү элементтерин, өнүктүрүү институттары тарабынан колдоо чараларын жана Бирликтин деңгээлинде масштабдаштырууга мүмкүн болгон бизнести санариптик трансформациялоонун мыкты тажрыйбаларын талкуулашты.
Кыргыз Республикасынын санариптик өнүктүрүү жана инновациялык технологиялар министри Азамат Жамангулов ЕАЭБ ишинин маанилүү жыйынтыктарынын арасында электрондук документтерди жана электрондук кол тамгаларды өз ара таанууну өнүктүрүүнү белгиледи, ал Бирликтин экономикалык интеграциясын тереңдетүүгө жана атаандаштыкка жөндөмдүүлүгүн жогорулатууга өбөлгө түзөт.
Татарстандын (Россия Федерациясы) Раиси (Башчысы) Рустам Минниханов дүйнөлүк масштабдагы окуяларды ийгиликтүү өткөрүү тажрыйбасын эске алуу менен киберкоркунучтардын алдын алуу борборлорунун ролун белгиледи (БРИКС саммити жана башкалар) жана кесиптештерине киберкоопсуздукту уюштуруу боюнча тажрыйба алмашууну сунуштады.
Бүгүнкү күндө ЕАЭБ өлкөлөрү өздөрүнүн санариптик экотутумдарын өнүктүрүү, ата мекендик чечимдерди жайылтуу жана технологиялык кооперацияны күчөтүү зарылдыгына туш болушууда. Бул постулаттардын бардыгы "бешилтик" өлкөлөрүндө ишке ашырылып жаткан "Digital Union" концепциясында камтылган. Концепция төрт "эркиндиктин" алкагында санариптик чөйрөнү түзүүгө багытталган жана өлкөнүн санариптик суверенитеттерине эч кандай шек келтирбеген негизги 3 принципке: шайкештикке, синхрондоштурууга жана интеграцияга негизделген.
"Биз өлкөлөрдө санариптештирүү кандай темп менен өнүгүп жатканын көрүп жатабыз. ЕАЭБдеги санариптик эгемендүүлүк — бул кызматташтыкка альтернатива эмес. Бул анын жаңы пайдубалы. Туруктуу өсүш, технологиялык ачылыш жана чыныгы экономикалык интеграция үчүн негиз", — деп жыйынтыктады ЕЭК министри.
Иш-чаранын спикерлери ЕАЭБ өлкөлөрүнүн расмий адамдары жана бизнес-миссияларынын өкүлдөрү болушту. Алар Кыргыз Республикасынын Министрлер кабинетинин төрагасынын биринчи орун басары, ЕЭК Кеңешинин мүчөсү Данияр Амангельдиев, Россия-Кыргыз Өнүктүрүү фондунун башкармалыгынын төрагасы Артем Новиков, "Газпромбанк" АК биринчи вице-президенти Олег Мельников, "Альфа Телеком" ЖАК башкы директору Эльнар Субакожоев, ошондой эле Касперский лабораториясынын мамлекеттик бийлик органдары менен өз ара аракеттенүү боюнча вице-президенти Юлия Шлычкова.
VII Кыргыз-Россия экономикалык форумунун уюштуруучусу Росконгресс Фондунун колдоосу менен Россия-Кыргыз Өнүктүрүү фонду болду.
