Жогорку Евразия экономикалык кеңеши Евразия экономикалык бирлигинин мыйзамдарын шайкеш келтирүү жана жалпы каржы рыногун калыптандыруу боюнча негизги мамилелерди аныктаган тескемени бекитти.

Кабыл алынган чечимдин негизи болуп ар түрдүү деңгээлдеги (дифференцияланган) мамилени киргизүү саналат, ал ишмердүүлүктү жөнгө салууга карата шайкеш келтирилген талаптар Бирликтин алкагындагы эл аралык келишимдер менен белгиленишин жана Бирликтин жалпы каржы рыногунда кызмат көрсөтө турган каржы рыногунун катышуучулары үчүн колдонулушун карайт. Өзүнүн мүчө мамлекетинин аймагында гана иштеген катышуучуларга карата улуттук мыйзамдарда белгиленген талаптар сакталат.

"Дифференцияланган мамиле – бул интеграцияны тереңдетүү менен улуттук каржы тутумдарын коргоонун ортосундагы тең салмактуулук. Биз рынок үчүн түшүнүктүү оюн эрежелерин түзөбүз: бүтүндөй Бирликке каржылык кызмат көрсөтүүнү каалаган компаниялар жөнгө салуунун бирдиктүү стандарттарын алышат, ал эми ички рынокто иштегендер тааныш жөнгө салуу чөйрөсүн сактап калышат. Бул жарандар жана жалпысынан улуттук экономикалар үчүн каржылык кызмат көрсөтүүлөрдүн жеткиликтүүлүгүн жана сапатын жогорулатат", – деп баса белгиледи ЕЭКтин экономика жана каржы саясаты боюнча министри Бахыт Султанов.

Дифференцияланган мамиле тандоо эркиндигин берет: каржы рыногунун катышуучулары өз мүмкүнчүлүктөрүнө жана экономикалык максатка ылайыктуулугуна жараша Бирликтин жалпы каржы рыногуна чыгуу жөнүндө чечимди өз алдынча кабыл алышат.

ЕАЭБ өлкөлөрүнүн башчылары Евразия экономикалык комиссиясына мүчө мамлекеттердин ыйгарым укуктуу органдары менен биргеликте кабыл алынган буйрукту эске алуу менен Бирликтин укугуна өзгөртүүлөрдү киргизүүнү иштеп чыгууну тапшырышты. Ошондой эле Бирлик жөнүндө келишимге, Шайкеш келтирүү жөнүндө макулдашууга жана тармактык актыларга ЕАЭБдин каржы рыногун жөнгө салуу боюнча улуттуктан жогорку органды түзүү мөөнөтүн, мыйзамдарды шайкеш келтирүү механизмдерин жана мөөнөттөрүн тактоо үчүн өзгөртүүлөрдү даярдоо каралган.

ЕАЭБдин жалпы каржы рыногу төрт фундаменталдык принципке негизделет: жөнгө салууну шайкеш келтирүү, лицензияларды өз ара таануу, юридикалык жакты түзүү зарылчылыгы жок туруп, каржылык кызматтарды чек ара аралык көрсөтүү жана улуттук жөнгө салуучулардын ортосундагы административдик өз ара аракеттенүү.