Եվրասիական տնտեսական միության երկրներում առկա են էներգիայի վերականգնվող աղբյուրների ներուժը զարգացնելու մեծ հնարավորություններ։ Այս առումով շատ օգտակար են Ռուսաստանի Դաշնության փորձն ու մշակումները։ Այս մասին սեպտեմբերի 22-ին հայտարարել է Եվրասիական տնտեսական հանձնաժողովի էներգետիկայի և ենթակառուցվածքների նախարար Արզիբեկ Կոժոշևը։
ԵՏՀ նախարարը մասնակցել է «Ռուսաստանի Արկտիկական գոտում, ինչպես նաև Հեռավոր Հյուսիսին հավասարեցված տարածքներում հողմային էներգետիկայի պետական աջակցության համալիր միջոցառումների օրենսդրական ապահովում» թեմայով կլոր սեղանին, որը տեղի է ունեցել Ռուսաստանի Դաշնության Դաշնային ժողովի Պետական դումայում:
Կլոր սեղանին քննարկվել են կանաչ էներգետիկային աջակցության համալիր միջոցների մշակման, այդ թվում՝ Արկտիկայի և Հեռավոր Հյուսիսի էքստրեմալ պայմաններում հողմային էներգետիկայի կայանների (ՀԷԿ) արտադրության ու տեղակայման հարցեր, ընկերությունների՝ ՀԷԿ-երի միջոցով էլեկտրաէներգիայի գեներացման կարիքները որոշելու մեխանիզմները:
Միջոցառման շրջանակներում կայացել է Արզիբեկ Կոժոշևի գործնական ծանոթությունը Պետական դումայի «Արդար Ռուսաստան՝ հանուն ճշմարտության» սոցիալիստական քաղաքական կուսակցության խմբակցության ղեկավար Սերգեյ Միրոնովի, ինչպես նաև Պետական դումայի փոխնախագահ Ալեքսանդր Բաբակովի հետ: Պայմանավորվածություն է ձեռք բերվել հետագա համագործակցության վերաբերյալ։