Навіны
Эксперты канкурэнтнага блока ЕЭК абмеркавалі з бізнесам пытанні дзяржзакупак у краінах ЕАЭС
Адным з разгледжаных дакументаў сталі зацверджаныя Саветам Камісіі Правілы вызначэння краіны паходжання асобных відаў тавараў для мэт дзяржзакупак. Яны прадугледжваюць умовы, вытворчыя і тэхналагічныя аперацыі па 255 відах тавараў у дзевяці галінах прамысловасці, пры выкананні якіх тавар лічыцца таварам, які паходзіць з дзяржавы ЕАЭС.
Па словах міністра па канкурэнцыі і антыманапольным рэгуляванні ЕЭК Армана Шакаліева, гэтыя правілы – бесперашкодны доступ да ўдзелу ў дзяржзакупках, ліквідацыя наяўных адміністрацыйных бар'ераў і, адпаведна, скарачэнне выдаткаў бізнесу.
«Асабліва хацеў бы падкрэсліць значнасць правіл для стымулявання ў краінах імпартазамяшчэння, развіцця прамысловай кааперацыі і стварэння вытворчасцяў камплектуючых, неабходных для вытворчасці гатовай прадукцыі. Усё гэта дасць станоўчы эфект у выглядзе стварэння новых рабочых месцаў і распрацоўкі інавацыйнай прадукцыі, якая раней не выраблялася ў Саюзе», – падкрэсліў Арман Шакаліеў.У абмеркаванні гэтага пытання прынялі ўдзел прадстаўнікі Беларускай Гандлёва-прамысловай палаты, Міністэрства прамысловасці і гандлю Расійскай Федэрацыі і бізнесу.
Намеснік дырэктара Дэпартамента канкурэнтнай палітыкі і палітыкі ў галіне дзяржаўных закупак ЕЭК Павел Жукоўскі распавёў пра ўвод у эксплуатацыю ўласнага інфармацыйнага рэсурсу Камісіі – Еўразійскага рэестра прамысловых тавараў дзяржаў-членаў ЕАЭС.
Нагадаем, 22 красавіка бягучага года запушчаны новы інфармацыйны рэсурс Камісіі. На сёння ў рэестр на падставе актаў экспертызы нацыянальных упаўнаважаных органаў уключаны сем таварных пазіцый.
Іншая частка пасяджэння была прысвечана лічбавізацыі працэсу дзяржзакупак. Удзельнікі абмеркавалі ўзаемнае прызнанне краінамі ЕАЭС электронных лічбавых подпісаў (ЭЛП). Па словах міністра ЕЭК, асноўным вынікам работы па валідацыі, праверцы і верыфікацыі ЭЛП стане распрацоўка Правіл па праверцы і прызнанні электронных лічбавых подпісаў. «Замацаванне Правіл па праверцы і прызнанні электронных лічбавых подпісаў у праве Саюза дазволіць сфарміраваць прававыя асновы, неабходныя для вырашэння гэтага пытання», – адзначыў кіраўнік блока па канкурэнцыі ЕЭК.
У завяршэнне міністр Камісіі звярнуўся да ўдзельнікаў з заклікам быць больш адкрытымі і ўмець слухаць адзін аднаго.
«Наш дэвіз – «Моцныя – разам». Толькі нашы агульныя намаганні па ўмацаванні эканомік дзяржаў Саюза дазволяць забяспечыць іх гарманічнае развіццё і збліжэнне, а таксама гарантаваць устойлівы рост дзелавой актыўнасці, збалансаваны гандаль і добрасумленную канкурэнцыю, нададуць новы імпульс прамысловай кааперацыі», – рэзюмаваў Арман Шакаліеў.
