Навіны
Завяршыўся чарговы этап развіцця агульнага электраэнергетычнага рынку ЕАЭС
Кіраўнікі Ўрадаў краін Еўразійскага эканамічнага саюза зацвердзілі Правілы ўзаемнага гандлю электрычнай энергіяй, а таксама Правілы вызначэння і размеркавання прапускной здольнасці міждзяржаўных сячэнняў. Гэта два з чатырох асноўных правіл, якія неабходна прыняць у Саюзе для паспяховага функцыянавання агульнага рынку электраэнергіі.
Прыняцце гэтых дакументаў завяршыла чарговы этап фарміравання прававой базы для функцыянавання агульнага электраэнергетычнага рынку Саюза. Па словах міністра па энергетыцы і інфраструктуры Еўразійскай эканамічнай камісіі Арзыбека Кожашава, прыняцце гэтага пакета правіл з'яўляецца сур'ёзным крокам да стварэння такога рынку. Правілы дазволяць паскорыць падрыхтоўку аператараў цэнтралізаванага гандлю і рэгістратара да стварэння неабходнай інфраструктуры, якая забяспечвае работу рынку.
Камісіі і краінам Саюза яшчэ трэба будзе правесці нямала мерапрыемстваў па завяршэнні падрыхтоўкі астатніх правіл функцыянавання агульнага электраэнергетычнага рынку і нарматыўных прававых актаў, якія забяспечваюць яго належную работу.
Даведка
Правілы ўзаемнага гандлю электраэнергіяй прадугледжваюць парадак і працэдуры доступу ўдзельнікаў да агульнага рынку, заключэння дагавора аб далучэнні, механізмы ўзаемадзеяння ўдзельнікаў гандлю з інфраструктурай будучага рынку. Акрамя таго, у правілах вызначаны парадак заключэння, рэгістрацыі, уліку, скасавання дагавораў куплі-продажу, змяшчаецца пералік міждзяржаўных сячэнняў, на якіх будзе ажыццяўляцца гандаль.
Правіламі вызначэння і размеркавання прапускной здольнасці забяспечваюцца неабходныя ўмовы для функцыянавання агульнага электраэнергетычнага рынку і недыскрымінацыйнае выкарыстанне яго ўдзельнікамі прапускной здольнасці міждзяржаўных ліній электраперадачы. Прыняцце правіл неабходна для зніжэння эканамічных рызык прадаўцоў і пакупнікоў электраэнергіі, якія магчымы з прычыны тэхнічнай немагчымасці рэалізацыі здзелак, заключаных на агульным рынку Саюза.
