Андрей Слепнев: «ЕАЭО мен Мысырдың сауда-экономикалық қатынастары тез қарқынмен дамуды жалғастыруда"

12.09.2022

Андрей Слепнев: «ЕАЭО мен Мысырдың сауда-экономикалық қатынастары тез қарқынмен дамуды жалғастыруда"

Бұл туралы Еуразиялық экономикалық комиссияның Сауда жөніндегі министрі Андрей Слепнев Мысырдың Ресейдегі Төтенше және Өкілетті Елшісі Назих Али Бахаэльдин Эльнаггаримен кездесуі барысында мәлімдеді.

"Мысырмен қатынастарды дамыту мәселесі біз үшін өте маңызды болып табылады және біз бұған көп назар аударамыз. Сауданың қалай белсенді дамып отырғаны айқын көрінуде: осы жылы тауар айналымы өткен жылмен салыстырғанда 40% дерлік өседі және бұған дейін де өсім болды. Бізден Мысырға, Мысырдан бізге берілетін жеткізілімдер өсе түсуде. Экономикалық өзара іс-қимылдың ауқымын алдағы уақытта да арттыра түсу ниетіндеміз",- деп атап өтті Андрей Слепнев.

ЕЭК Сауда жөніндегі министрінің сөзінше, осы мақсатта еркін сауда туралы келісіммен белсенді жұмыс жүргізілуде. Келіссөздердің келесі раунды Шарм-эль-Шейхте 11-13 қазанға белгіленді.

"Бұл раундқа үлкен мән беріп отырмыз, өйткені ол белгілі бір мағынада шешуші бола алады. Түйінді мәселе бойынша - импорттық баждарды өзара азайту параметрлері туралы, сондай-ақ келісім жобасының түпкілікті мәтінін дайындау жөнінде елеулі ілгерілеуге үміттенеміз", - деп атап көрсетті Андрей Слепнев.

Оның сөзінше, бүгінде Еуразиялық экономикалық одақта Мысырдағы Ресей өнеркәсіптік аймағының жобасына көп назар аударылуда. Бұл ретте жобаға Ресей Федерациясының компаниялары ғана емес, ЕАЭО-ның басқа мемлекеттері де қызығушылық танытуда. "Болашақта Беларусьтың, Қазақстанның және Одақтың басқа да елдерінің кәсіпорындары аймақтың резиденттері болатынына сенімдімін",- деп мәлімдеді Андрей Слепнев.

Сөзінің соңында министр Мысырдың Сауда және өнеркәсіп министрі лауазымына таяуда тағайындалған Ахмед Самир Салехпен ағымдағы жылдың аяғына дейін жеке кездесу өткізуге мүдделілігін растады. Келіссөздердің алда тұрған раундын аяқтаудың жай-жапсарын келісуге уағдаласты.