қаз

Жаңалықтар

Сөз сөйлеулер Фото Бейнегалерея
09 Dec 2024 ЕАЭО-да интернеттегі зияткерлік меншік объектілеріне құқықтардың бұзылуына қарсы күрес тәсілдемелері туралы келісімнің жобасы әзірленді "Антиконтрафакт-2024" халықаралық форумында ЕЭК Кәсіпкерлік қызметті дамыту департаментінің директоры Ернар Бәкенов Еуразиялық экономикалық комиссия Еуразиялық экономикалық одақ мемлекеттерімен бірлесіп әзірлеген Келісімнің жобасы туралы айтты. Оның сөзінше, бұл құжат заңсыз контентті бұғаттауды, ақпараттық ресурстар иелері мен ақпараттық делдалдардың жауапкершілік шараларын, сондай-ақ іздеу жүйелерінің бұғатталған ресурстар туралы мәліметтерді беруді тоқтатуын көздейді. "Келісімді іске асыру интернетте қарақшылық контенттің таралуына қарсы күрес бойынша салыстырмалы шараларды қолдануды қамтамасыз етуге мүмкіндік береді, ұлттық құқық иелеріне өз туындыларын заңды алаңдарда қауіпсіз орналастыруға және тиісті кірістер алуға жол ашады деген сенімдемін", — деп атап көрсетті Ернар Бәкенов. Комиссия өкілі ЕАЭО-да креативті индустрияларды дамыту мен авторлық және сабақтас құқықтарды қорғаудың маңыздылығын атап өте келіп, ЕАЭО туралы шартта құқықтарды ұжымдық басқару жөніндегі ұйымдардың (ҚҰБҰ) қызметін жекелеген халықаралық шартта реттеу көзделгенін атап көрсетті. 2019 жылы Ұжымдық негізде авторлық және сабақтас құқықтарды басқару тәртібі туралы келісім күшіне енді. Құжат ҚҰБҰ қызметінің қағидаттарын белгіледі, құқық иелеріне сыйақыларды бөлу және төлеу тәртібін анықтады. Таяуда Комиссия Одақта осы Келісімнің іске асырылуына мониторинг жүргізді, оның қорытындысы бойынша, атап айтқанда, құқықтарды ұжымдық басқару жөніндегі ұйымдар қызметінің ашықтығы мен анықтығын арттыру, құқық иелерімен өзара іс-қимылды оңайлату және олардың қызметін бақылау мүмкіндігі атап өтілді.
06 Dec 2024 Бақытжан Сағынтаев Садыр Жапаровты туған күнімен құттықтады Еуразиялық экономикалық комиссия Алқасының Төрағасы Бақытжан Сағынтаев Қырғыз Республикасының Президенті, Жоғары Еуразиялық экономикалық кеңес мүшесі Садыр Жапаровты туған күнімен құттықтады. "Сіз Еуразиялық экономикалық одақ кеңістігінде өзара тиімді ынтымақтастықты нығайтуға елеулі үлес қосып келесіз", – делінген құттықтау хатта. Бақытжан Сағынтаев Еуразиялық экономикалық комиссия атынан және жеке өз атынан Садыр Жапаровқа мықты денсаулық, құт-береке және Қырғызстан мен оның азаматтарының игілігі жолында алда да табысқа жете беруді тіледі.
06 Dec 2024 Бақытжан Сағынтаев: "ЕЭК Еуразиялық өңірдегі БҰҰ ОДМ жетістіктерінің көрсеткіштері туралы жаңа баяндама ұсынады" Еуразиялық экономикалық комиссия Алқасының Төрағасы Бақытжан Сағынтаев Еуразиялық даму банкінің Алматыда 6 желтоқсанда өткен "Орталық Азиядағы орнықты дамуға жәрдемдесу" конференциясына қатысушыларға ілтипат лебізімен қайырылды. ЕЭК Алқасының басшысы Еуразиялық өңір елдерінің алдында тұрған жаһандық сыни шақырыстардың қатарында экономиканы қоса, адам өмірінің барлық қырына әсер ететін климаттың өзгеруі бар екенін атап өтті. "Осы мәселенің маңыздылығына байланысты 2021 жылы Еуразиялық экономикалық одақ мемлекеттерінің басшылары климаттың өзгеруіне және оның салдарына қарсы күрес шеңберінде экономикалық ынтымақтастықты дамыту ниеті туралы мәлімдеме қабылдады. Онда Париж келісімінің мақсаттарына және ЕАЭО бірыңғай нарығының жұмыс істеу қағидаттарын негізге ала отырып, БҰҰ-ның Орнықты даму мақсаттарына қол жеткізу ниеті бекітілген", – деп атап көрсетті Бақытжан Сағынтаев. ЕЭК Алқасының Төрағасы атап өткендей, экономикалық интеграция ЕАЭО елдерінің ОДМ көрсеткіштеріне қол жеткізуіне оң әсер ететін қосымша фактор бола алады. Бақытжан Сағынтаев Комиссияның ағымдағы жылы "ЕАЭО 2.0 өңірінде БҰҰ ОДМ жетістіктерінің көрсеткіштері" атты жаңа баяндама дайындауды бастағанын да хабарлады. Оны 2025 жылғы шілде айында Орнықты даму жөніндегі жоғары деңгейдегі саяси форум шеңберінде Біріккен Ұлттар Ұйымының штаб-пәтерінде таныстыру жоспарланып отыр. Комиссия 2017 жылы "ЕАЭО өңіріндегі БҰҰ ОДМ жетістіктерінің көрсеткіштері" атты алғашқы баяндаманы дайындаған еді. Баяндаманың түйінді тұжырымы – экономикалық интеграция ЕАЭО-ға мүше мемлекеттердің ОДМ көрсеткіштеріне қол жеткізуіне оң әсер ететін қосымша фактор болып табылады. 
06 Dec 2024 Талғат Момышев: "Техникалық реттеу құралдары ЕАЭО-дағы қауіпсіз емес өнімнің айналымына қарсы тұрады" Астанада өткен "Антиконтрафакт-2024" халықаралық форумының тақырыптық секциясында өнімге қойылатын міндетті талаптарды белгілеу, стандарттау және сәйкестікті бағалау мәселелері талқыланды, онда спикердің бірі болып Еуразиялық экономикалық комиссияның Техникалық реттеу және аккредиттеу департаментінің директоры Талғат Момышев сөз сөйледі. Комиссия өкілі стандарттау саласындағы құқықтың өзгеруін, сәйкестікті бағалау мен аккредиттеуді, Одақтың халықаралық шарттарын іске асыру үшін қажетті "екінші деңгейдегі" құжаттарды қоса, ЕАЭО-дағы техникалық реттеудің негізгі қырлары туралы айтты. Бұдан басқа, ол "Еуразиялық экономикалық жол" декларациясын іске асыру жөніндегі іс-шаралар жоспарын әзірлеу туралы хабарлады. "ЕАЭО-дағы техникалық реттеу бірыңғай міндетті талаптарды белгілеуді, стандарттарды қолдану, сәйкестікті бағалауды жүргізу, сондай-ақ тиімді мемлекеттік бақылауды жүзеге асыру арқылы олардың іске асырылуын қамтамасыз етуді қамтитын өзара байланысты элементтердің кешенді жүйесі болып табылады. Техникалық реттеу құралдары біздің нарықтағы қауіпсіз емес өнімдердің заңсыз айналымына қарсы әрекет етеді Бұған ЕАЭО техникалық регламенттері талаптарының сәйкестігін бағалау және сақталуын мемлекеттік бақылау саласындағы тиімді нормативтік өріс ықпал етеді, Комиссия оларды жетілдіру бойынша мүше мемлекеттермен бірлесіп тұрақты негізде жұмыс істеп келеді", – деп атап өтті Талғат Момышев. Форумда цифрлық сауданы дамыту, темекі, никотинді және алкоголь өнімдерінің заңсыз айналымына қарсы әрекет ету, фармконтрафактіге қарсы күрес мәселелері де талқыланды. Форум жұмысына Еуразиялық экономикалық одақ мемлекеттерінің және үшінші елдердің мемлекеттік органдарының, қоғамдық ұйымдарының, бизнес-қауымдастықтарының өкілдері қатысты.
06 Dec 2024 ЕЭК УЭО үшін оңайлатудың жаңа бастамаларын қарады УЭО институтын дамыту жөніндегі консультативтік комитет жанындағы бейінді жұмыс тобының отырысында СЭҚ-тың заңға бағынатын қатысушылары - уәкілетті экономикалық операторлар (УЭО) үшін оңайлату спектрін кеңейтуге және Еуразиялық экономикалық одақтағы осындай мәртебенің тұтастай тартымдылығына бағытталған бастамалар талқыланды. Тауарларды декларациялау, есептілікті ұсыну, қамтамасыз етуді ұсынбай тұрып кедендік әкелу бажын төлеу мерзімін кейінге қалдыру немесе мерзімін ұзартып төлеу, экспортталатын тауарларға қатысты декларация берілгенге дейін шығаруды қолдану бөлігінде оңайлату талқыланды. "Отырыста кедендік әкімшілендірудің перспективалық бағыты және операторлар үшін одан әрі оңайлатудың катализаторы болып табылатын реттеуші әсерді бағалау рәсімінен өткен УЭО тауарларын есепке алу жүйесіне орайлас, Комиссия дайындаған типтік талаптардың жобасы қаралды", – деп атап өтті Еуразиялық экономикалық комиссияның Кеден заңнамасы және құқық қолдану практикасы департаментінің директоры Александр Титов. Бұдан басқа, құқық қолдану практикасының УЭО тізіліміне бірнеше негіз бойынша кірістіру туралы куәліктің қолданылуын тоқтата тұруға және тауарларды есепке алу жүйесіне қойылатын талаптарға сәйкестікті тексеруді жүзеге асыруға байланысты мәселелері қозғалды әрі аталған мәселелер бойынша ортақ түсініс тұжырымдалды. Уәкілетті экономикалық оператор институты — әріптестік бағдарламасының халықаралық танылған стандарты, ал УЭО — белгілі бір талаптарға сай келетін тұлғалар ретінде кедендік операциялар мен кедендік бақылау жүргізу кезінде оңайлату ұсынылатын тұлғалардың айрықша санаты. ЕАЭО-ға мүше мемлекеттерде УЭО институтын дамыту жөніндегі жұмыс тобы 2014 жылы құрылды. Ол Одақта уәкілетті экономикалық операторлар институтын жетілдіру және дамыту жөніндегі ұсыныстарды тұжырымдайды.
06 Dec 2024 Бішкекте кедендік ынтымақтастық мәселелері талқыланды Еуразиялық экономикалық комиссияның Кедендік ынтымақтастық жөніндегі министрі Руслан Давыдов Қырғыз Республикасының Қаржы Министрлігі жанындағы Мемлекеттік кеден қызметінің төрағасы Самат Исабековпен жұмыс кездесуін өткізді. Еуразиялық үкіметаралық кеңестің кедендік құнды бақылауға орайлас тәсілдемелерді біріздендіру жөніндегі тапсырмаларының орындалуын сындарлы әрі жан-жақты талқылау болып өтті. Навигациялық пломбаларды қолдану туралы келісімді іске асыру, кедендік транзиттің кедендік рәсімдері, ақпарат алмасу және кеден саласындағы жалпы процестерді іске асыру мәселелері де басты назарда болды. "Смарт Бажы" жаңа кедендік ақпараттық жүйесі таныстырылды, оның платформасында кедендік операциялар мен кедендік бақылауды жүргізу бойынша кешенді шешімдерді іске асыру жоспарлануда. Бұл жүйенің іске қосылуы көлік құралдарының өткізу пункттерінен өту уақытын едәуір қысқартады. Руслан Давыдов Қырғызстанның Кеден қызметінің цифрландыру саласындағы жұмысын атап өтті, таңдаулы әлемдік стандарттарды ескере отырып, бірыңғай құқық қолдану практикасын қалыптастыру үшін ЕАЭО елдерінің кеден қызметтері арасында тәжірибе алмасудың маңыздылығын атап көрсетті. ЕЭК министрі әріптестеріне жемісті өзара іс-қимыл үшін алғысын айтты, сондай-ақ Одақтың жұмыс істеуінің басты мақсатының бірі — оның бүкіл аумағында бірыңғай кедендік реттеуді қамтамасыз ету үшін ынтымақтастықты одан әрі тереңдетуге деген сенімділік білдірді.
05 Dec 2024 Қасым-Жомарт Тоқаев пен Бақытжан Сағынтаев ЕАЭО-ны одан әрі дамыту перспективаларын талқылады Қазақстан Республикасының Президенті Қасым-Жомарт Тоқаев Еуразиялық экономикалық комиссия Алқасының Төрағасы Бақытжан Сағынтаевты қабылдады. Мемлекет басшысы ЕЭК қызметінің басымдықты бағыттары туралы баяндаманы тыңдады. Кездесу барысында Еуразиялық экономикалық одақтың ағымдағы жай-күйі және оны одан әрі дамыту перспективалары талқыланды. Қасым-Жомарт Тоқаевқа 26 желтоқсанда Санкт-Петербургте өтетін Жоғары Еуразиялық экономикалық кеңестің кезекті отырысына дайындықтың барысы туралы да баяндалды.
05 Dec 2024 Комиссия мен Латын Америкасы-Кариб экономикалық жүйесінің өкілдері таңдаулы практикаларды талқылады Еуразиялық экономикалық интеграцияның оң нәтижелері, мемлекеттік сатып алу және бәсекелестік саласындағы ынтымақтастық, статистиканы қалыптастыру тәсілдемелері, сондай-ақ ЕАЭО елдерінің іскер топтарының өзара іс-қимылы "ЕАЭО-ЛАЭЖ: таңдаулы интеграциялық практикалар" семинарында талқыланды. Іс-шара 3 желтоқсанда Еуразиялық экономикалық комиссияның Интеграция және макроэкономика жөніндегі министрі Эльдар Алишеров пен Латын Америкасы-Кариб экономикалық жүйесінің (ЛАЭЖ) Тұрақты хатшысы Кларемс Эндар Вераның тең төрағалығымен бейнеконференция форматында өтті. Эльдар Алишеровтің сөзінше, ЕАЭО интеграциялық құрылымдар арасындағы диалогты тереңдетуді дәйекті түрде жақтап келеді. Соңғы айларда болған ШЫҰ, АСЕАН, Африка одағы және Африканың субөңірлік интеграциялық бірлестіктерімен, сондай-ақ бірқатар басқа құрылымдармен байланысу әлемдік экономикадағы интеграциялық бірлестіктердің өсіп келе жатқан рөлін және олардың арасындағы тікелей диалогтың маңыздылығын растайды. ЕЭК министрі Латын Америкасы мен Кариб бассейні өңіріндегі экономикалық интеграция моделінің әр алуандығын түсініп, талдау ЕАЭО шеңберінде экономикалық процестерді одан әрі дамыту туралы 2030 жылға дейінгі және 2045 жылға дейінгі кезеңге арналған декларацияны іске асыру бойынша алда тұрған міндеттер тұрғысынан ЕАЭО үшін практикалық қызығушылық тудыратынын атап көрсетті. "ЕАЭО мен ЛАЭЖ-дың күн тәртібі көп ретте сәйкес келеді, бұл орайда ынтымақтастықтың нақты бағыттарын бизнес пен сарапшылық қоғамдастық айқындауға тиіс", – деп атап өтті Эльдар Алишеров. Ол көлік және қаржы инфрақұрылымы, логистика, азық-түлікпен қамтамасыз ету, өнеркәсіп пен ауыл шаруашылығындағы технологиялық ынтымақтастық, туризм және денсаулық сақтау сияқты бағыттар бойынша ЛАЭЖ-бен тәжірибе алмасудың маңыздылығын баса көрсетті. Латын Америкасы-Кариб экономикалық жүйесінің Тұрақты хатшысы Кларемс Эндара Вера жаһандық трансформация дәуірінде мұндай семинарларды өткізу интеграциялық дамудың үздік тәжірибесімен алмасу үшін маңызды екенін атап өтті. Семинардың күн тәртібі бойынша ЕЭК бейінді департаменттерінің және ЛАЭЖ Тұрақты хатшылығының басшылары, сондай-ақ екі ұйымның іскер топтарының өкілдері сөз сөйледі. ЕЭК министрі семинар соңында екі ұйымның штаб-пәтерлерінде ЕАЭО күндері мен ЛАЭЖ күндерін өткізу мүмкіндігін қарастыруды ұсынды, сондай-ақ ЛАЭЖ-дегі әріптестерді ОДМ тақырыптамасы бойынша ЕЭК іс-шараларына және БҰҰ алаңындағы интеграциялық бірлестіктер мен түйінді халықаралық форумдар арасындағы диалогқа қосылуға шақырды. Тараптар өзара қызығушылық тудыратын басқа да мәселелер бойынша салалық семинарлар өткізуді жалғастыруға келісті. ЕЭК пен ЛАЭЖ арасындағы Өзара түсіністік туралы меморандумға 2018 жылғы 24 мамырда қол қойылды. Латын Америкасы-Кариб экономикалық жүйесі (ЛАЭЖ) – Латын Америкасы мен Кариб теңізінің 25 елін біріктіретін, 1975 жылы Панама конвенциясына сәйкес негізі қаланған үкіметаралық өңірлік ұйым. Мүше мемлекеттері: Аргентина, Багам Аралдары, Барбадос, Белиз, Боливия, Бразилия, Колумбия, Куба, Чили, Эквадор, Сальвадор, Гватемала, Гайана, Гаити, Гондурас, Мексика, Никарагуа, Панама, Парагвай, Перу, Доминикан Республикасы, Суринам, Тринидад пен Тобаго, Уругвай және Венесуэла.
Тағы да көрсету

ЕАЭО ресурстары