Լուրեր

16 ապրիլի 2025 Վալենտին Տատարիցկի. «Երեխաների և դեռահասների համար նախատեսված ապրանքները պետք է լինեն ամենաանվտանգը» Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին Մոսկվայում՝ Մանկական ապրանքների արդյունաբերության կոնգրեսում առաջարկել է բարձրացնել երեխաների և դեռահասների համար նախատեսված արտադրանքի անվտանգությունը։ Նա համոզված է, որ նման ապրանքները պետք է լինեն ամենաանվտանգը Եվրասիական տնտեսական միության երկրների շուկայում։ Կոնգրեսում բիզնեսի, փորձագիտական համայնքի, պետական կառույցների և միջազգային կազմակերպությունների ներկայացուցիչները կարծիքներ են փոխանակել այս թեմայով, ներկայացրել իրենց աշխատանքի փորձը։ Վալենտին Տատարիցկին խոսել է Հանձնաժողովի կողմից անդամ պետությունների հետ համատեղ ԵԱՏՄ շրջանակներում համապատասխան նորմատիվ բազայի ձևավորման և կատարելագործման մասին։ Նրա խոսքով, միութենական փաստաթղթերը պետք է ավելի լայնորեն արտացոլեն արտադրողների կողմից խաղալիքների, հագուստի, կոշիկի, երեխաների և դեռահասների համար նախատեսված այլ ապրանքների արտադրության մեջ ժամանակակից տեխնոլոգիաների կիրառումը: Ընդ որում, անվտանգությունը պետք է լինի առաջին տեղում: Յուրաքանչյուր երեխա երազում է հետաքրքիր, գեղեցիկ խաղալիքի մասին։ Բայց որպեսզի նվերը չվշտացնի իրեն ու ծնողներին և առավել ևս չվնասի առողջությանը, գնելիս պետք է ուշադրություն դարձնել ապրանքի մի շարք բնութագրերին։ Մասնավորապես՝ նյութին, ձևին, հոտին, որոնք պետք է համապատասխանեն անվտանգության սահմանված պահանջներին և որոշակի տարիքային չափորոշիչներին։ Նույնիսկ գույնը կարևոր է. այն պետք է առավելագույնս մոտ լինի բնականին, որպեսզի չխախտի երեխայի պատկերացումը իրական աշխարհի մասին, չվախեցնի նրան: Բոլոր անհրաժեշտ պահանջները ներառված են «Խաղալիքների անվտանգության մասին» Միության տեխնիկական կանոնակարգում: ԵԱՏՄ-ի շրջանակներում գործում են նաև «Երեխաների և դեռահասների համար նախատեսված արտադրանքի անվտանգության մասին», «Ատրակցիոնների անվտանգության մասին», «Մանկական խաղահրապարակների սարքավորումների անվտանգության մասին» և այլ տեխկանոնակարգեր, որոնց պահանջները հիմնարար են։   ԵՏՀ նախարարը հատուկ ուշադրություն է հրավիրել Միության համապատասխան տեխնիկական կանոնակարգերի ժամանակին և գիտականորեն հիմնավորված ճշգրտման անհրաժեշտությանը, որպեսզի հաշվի առնվեն «երեխաների հոգեկան առողջության և կոգնիտիվ զարգացման ռիսկերը»։ «Տեխկանոնակարգերի պահանջները տեխնիկական բնույթ են կրում, ինչը մեզ հնարավորություն է տալիս բավականին ակնհայտ կերպով գնահատել (փորձարկել կամ չափել) դրանք, — նշել է ԵՏՀ նախարարը։ — Միևնույն ժամանակ, մանկական արտադրանքը մեծ նշանակություն ունի երեխաների մտավոր, բարոյական և գեղագիտական զարգացման համար։ Բայց կանոնակարգերը դեռ չեն պարունակում պահանջներ, որոնք կարող են ազդել դրա վրա»։ Վալենտին Տատարիցկին հայտնել է մանկական արտադրանքի, այդ թվում՝ թվային խաղալիքների և արհեստական բանականությամբ խաղալիքների նկատմամբ պահանջներ սահմանելու մասով տարբեր փորձի ուսումնասիրության մասին, որոնք բացառում են երեխաների հոգեկանի վրա բացասական ազդեցությունը: Նա մանրամասն անդրադարձել է «մանկական արտադրանքին առնչվող կարգավորումների խստացման» Եվրամիության օրինակին և բոլոր հետաքրքրվածներին կոչ արել ավելի մեծ ուշադրությամբ գնահատել այս փորձը՝ ԵԱՏՄ-ում դրա հնարավոր օգտագործման հեռանկարով։ «Հանձնաժողովը շահագրգռված է, որ մեր Միությունում նմանատիպ գործունեություն իրականացվի։ Ավելին, տեխնիկական պահանջների ժամանակին և օպերատիվ ճշգրտման ֆունկցիոնալն առկա է ԵԱՏՄ իրավունքում։ Միության տեխկանոնակարգերի մշակման և դրանցում փոփոխություններ կատարելու կարգի այս տարի ընդունված նոր խմբագրումը կապահովի ԳՀԱ իրականացման արդյունքների հիման վրա այդ փաստաթղթերի և Միասնական սանիտարահամաճարակաբանական պահանջների արագացված ճշգրտումը», — ամփոփել է Վալենտին Տատարիցկին։

11 ապրիլի 2025 ԵՏՀ-ն ակտիվացնում է երկաթուղային մեքենաշինության ոլորտում ֆինանսական աջակցության մեխանիզմի կիրառումը Եվրասիական տնտեսական հանձնաժողովի պատվիրակությունը՝ արդյունաբերության և ԱԱՀ նախարար Գոհար Բարսեղյանի գլխավորությամբ, Տվերի մարզում ծանոթացել է «Առանցքային համակարգեր և բաղադրիչներ» ընկերությունների խմբի («ԱՀԲ» ԸԽ) արտադրական հարթակների աշխատանքին։ Այս հոլդինգը ռելսային շարժակազմի համակարգեր և բաղադրիչներ ռուսաստանցի խոշորագույն արտադրողներից է: «ԱՀԲ» ԸԽ և հոլդինգի ձեռնարկությունների արդյունաբերական տեխնոպարկ կատարած այցի ընթացքում քննարկվել է «Մոսկվա — Սանկտ Պետերբուրգ» արագընթաց երկաթուղային մայրուղու նախագծի իրականացման համար Եվրասիական տնտեսական միության շրջանակներում արդյունաբերական կոոպերացիային ֆինանսական աջակցության մեխանիզմի օգտագործման հարցը։ «Մենք ակնկալում ենք, որ ֆինանսական աջակցության մեխանիզմը հոլդինգի կողմից հաջողությամբ կօգտագործվի արտադրական կարողությունների արդիականացման և ընդլայնման, ինչպես նաև ԵԱՏՄ երկրների ձեռնարկությունների հետ նոր կոոպերացիոն շղթաների ստեղծման համար։ Մենք կարող ենք ստեղծել նոր կոոպերացիոն շղթաներ, որոնք կամրապնդեն ոչ միայն «ԱՀԲ» ԸԽ-ի, այլև ամբողջ եվրասիական արդյունաբերության դիրքերը», — նշել է Գոհար Բարսեղյանը։ «ԱՀԲ» ԸԽ-ն միավորում է Ռուսաստանի Դաշնության տասը տարածաշրջանների ավելի քան 20 ձեռնարկություն, որտեղ աշխատում է ավելի քան 16 հազ. մարդ: «ԱՀԲ» ԸԽ-ի պատվիրատուների թվում են ավելի քան 200 ընկերություններ Ռուսաստանից և Եվրոպայից:

11 ապրիլի 2025 ԵՏՀ-ն անցկացրել է տեխկարգավորման ոլորտում Իրանի հետ համագործակցության զարգացմանը նվիրված սեմինար Եվրասիական տնտեսական հանձնաժողովի հարթակում ԵՏՀ առևտրի նախարար Անդրեյ Սլեպնևի և ԵՏՀ տեխնիկական կարգավորման նախարար Վալենտին Տատարիցկու նախագահությամբ տեղի է ունեցել տեխնիկական կարգավորման, դեղամիջոցների և բժշկական արտադրատեսակների շրջանառության ոլորտում Իրանի հետ համագործակցության զարգացման հեռանկարներին նվիրված սեմինար։ Հանդիպումը կայացել այս տարվա մայիսի 15-ին Եվրասիական տնտեսական միության և Իրանի Իսլամական Հանրապետության միջև ազատ առևտրի մասին համաձայնագրի ուժի մեջ մտնելուն ընդառաջ։ Սեմինարին մասնակցել են ԵԱՏՄ երկրների պետական մարմինների, գործարար միավորումների և ընկերությունների ներկայացուցիչներ, որոնք հետաքրքրված են իրանցի գործընկերների հետ փոխգործակցության զարգացմամբ և Իրանի շուկա մուտք գործելով։ «Իրանական կողմը հետաքրքրություն է հայտնել կլինիկական փորձարկումների իրականացման և դեղագործական արտադրանքի գրանցման նկատմամբ կարգավորող մոտեցումների մերձեցման հարցում: Մեր կողմից մենք տեսնում ենք գործարար համայնքի շահագրգռվածությունը անվավոր փոխադրամիջոցների, ինչպես նաև բժշկական տեխնիկայի հասանելիության առնչությամբ իրանական կողմի հետ տեխնիկական խոչընդոտների վերացման հարցում», — նշել է Անդրեյ Սլեպնևը։ Նրա խոսքով, առևտրում առկա տեխնիկական խոչընդոտների մասով Համաձայնագրի կատարելագործված կարգավորող մասը լիովին համապատասխանում է Առևտրի համաշխարհային կազմակերպության կանոններին, ինչը հատկապես կարևոր է՝ հաշվի առնելով, որ Իրանը այս միջազգային կազմակերպության անդամ չէ: «Կարծում եմ, մեր սուբյեկտների համար իրանական շուկա արտադրանքի մուտքի խնդիրների կարգավորման առավել գործնական ուղղվածություն ունեցող մեխանիզմը առևտրում առկա տեխնիկական խոչընդոտների հարցերով աշխատանքային խմբի հարթակն է։ Նման թեմատիկ խմբի ստեղծումը նախատեսված է Համաձայնագրով։ Աշխատանքային խմբում կարող ենք քննարկել մեր կազմակերպությունների արտահանման կոնկրետ դեպքեր, որոնք կապված են Իրանում գործող տեխնիկական պահանջների կամ համապատասխանության գնահատման ընթացակարգերի հետ, փորձել որոշակի կետային պայմանավորվածություններ ձեռք բերել», — նշել է Վալենտին Տատարիցկին։ Նա առաջարկել է դիտարկել առևտրում տեխնիկական խոչընդոտների հետ կապված հարցերի լուծման առկա հնարավորությունների ամբողջ շրջանակը, այդ թվում՝ Միության պետությունների և Իրանի միջև երկկողմ պայմանավորվածությունները: Տեխնիկական կարգավորման ոլորտում իրանցի գործընկերների հետ փոխգործակցության առավել հեռանկարային ուղղություններն առաջարկվում է ներառել ԵԱՏՄ-ի, նրա անդամ պետությունների և Իրանի միջև առևտրատնտեսական համագործակցության համատեղ միջոցառումների պլանի (ճանապարհային քարտեզի) ներկայումս մշակվող նախագծում, որն ուղղված է Համաձայնագրի դրույթների կիրարկմանը:

10 ապրիլի 2025 Հանձնաժողովը քննարկել է ԵԱՏՄ գյուղատնտեսական և պարենային արտադրանքի համար Իրանի շուկայի հասանելիության հարցեր Եվրասիական տնտեսական հանձնաժողովի հարթակում ԵՏՀ առևտրային քաղաքականության վարչության տնօրեն Վլադիմիր Սերպիկովի և ԵՏՀ սանիտարական, բուսասանիտարական և անասնաբուժական միջոցների վարչության տնօրեն Վլադիմիր Սինկևիչի ղեկավարությամբ պետական մարմինների, գործարար ընկերակցությունների և բիզնեսի ներկայացուցիչների հետ քննարկվել են Եվրասիական տնտեսական միության երկրների գյուղմթերքի համար իրանական շուկայի հասանելիության հարցեր։ Հանդիպումը տեղի է ունեցել այս տարվա մայիսի 15-ին ԵԱՏՄ-ի և Իրանի Իսլամական Հանրապետության միջև ազատ առևտրի մասին համաձայնագրի ուժի մեջ մտնելու նախաշեմին։ Համաձայնագրի առանձնաշնորհային շրջանակն ընդգրկում է գյուղատնտեսական ապրանքների անվանացանկի 67%-ը, որին բաժին է ընկնում դեպի Իրան ԵԱՏՄ գյուղմթերքի արտահանման 98%-ը։ Առևտրային ռեժիմի ազատականացումը թույլ կտա զգալիորեն նվազեցնել իրանական կողմի սակագնային պաշտպանության մակարդակը. Իրանի ԱԲՌ միջին դրույքաչափը ամբողջ գյուղատնտեսական ապրանքային անվանացանկի համար կնվազի 30%-ից մինչև 14%: «Համաձայնագիրը ԵԱՏՄ բիզնեսի համար եզակի սակագնային պայմաններ է ստեղծում իրանական շուկա մուտք գործելու համար, այդ թվում՝ պարենային ապրանքների մասով։ Այս առումով անհրաժեշտ է որոշել այն խոչընդոտներն ու խնդրահարույց հարցերը, որոնց վրա պետք է ուշադրություն դարձնենք առաջին հերթին այս ուղղությամբ Իրանի հետ համագործակցության զարգացման շրջանակներում»,- նշել է Վլադիմիր Սերպիկովը։ Նա նաև հիշեցրել է, որ միաժամանակ Համաձայնագրում կատարելագործվել է սանիտարական, անասնաբուժասանիտարական և կարանտինային բուսասանիտարական միջոցների կիրառման կարգավորող մասը, որոնք կարող են էական ազդեցություն ունենալ փոխադարձ առևտրի վրա։ «ԵԱՏՄ-ում ձևավորվել է ՍԲՍ միջոցների ոլորտի նորմատիվ իրավական բազա, որը սահմանում է անվտանգության պահանջներ, այդ թվում՝ պարենային արտադրանքի, Միության տարածք դրա ներմուծման և տարածքով տեղափոխման կարգի նկատմամբ։ «Նշված ոլորտներում ԵԱՏՄ իրավունքի պահպանման դեպքում երրորդ երկրների, այդ թվում՝ Իրանի արտադրանքը մուտք է գործում ԵԱՏՄ անդամ պետությունների շուկա»,- տեղեկացրել է Վլադիմիր Սինկևիչը։ Գյուղատնտեսական արտադրանքի հասանելիության հարցերը, ներառյալ սանիտարական և բուսասանիտարական միջոցների կիրառումը, առաջարկվում է քննարկել իրանական կողմի հետ Համաձայնագրի իրականացման հարցերով համատեղ կոմիտեի առաջին նիստում, որը նախատեսված է անցկացնել 2025 թվականի երկրորդ կեսին։ Բացի այդ, այս ոլորտում իրանցի գործընկերների հետ համագործակցության առավել հեռանկարային ուղղությունները նախատեսվում է ներառել ԵԱՏՄ-ի, նրա անդամ պետությունների և Իրանի միջև առևտրատնտեսական համագործակցության համատեղ միջոցառումների պլանի (ճանապարհային քարտեզի) նախագծում, որն ուղղված է Համաձայնագրի դրույթների կիրարկմանը:

10 ապրիլի 2025 Նաիրա Կարապետյան. «ԵՏՀ-ն նախատեսում է հավանություն տալ ԵԱՏՄ երկրների շաքարի շուկայի կայուն զարգացման լրացուցիչ միջոցների ցանկին» Տնտեսության ագրարային հատվածը Եվրասիական տնտեսական միության բոլոր երկրների համար ռազմավարական ճյուղերից մեկն է, և վերջին հինգ տարվա ընթացքում արձանագրել է արտադրության աճ գրեթե 15%-ով։ Այս մասին հայտարարել է Եվրասիական տնտեսական հանձնաժողովի ագրոարդյունաբերական քաղաքականության վարչության տնօրեն Նաիրա Կարապետյանը ապրիլի 10-ին Մոսկվայում կայացած «ԱՊՀ երկրների շաքարի շուկա 2025. Հայացք դեպի ապագա» խորագրով միջազգային խորհրդաժողովի ընթացքում: Միաժամանակ, ԵՏՀ ներկայացուցչի խոսքով, Միություն են ներմուծվում բարձր տեխնոլոգիական արտադրական միջոցների էական ծավալներ։ Այս իրավիճակը մեղմելու նպատակով Հանձնաժողովը համաձայնեցված ագրոարդյունաբերական քաղաքականության շրջանակներում և զգայուն գյուղատնտեսական ապրանքների շուկաների զարգացման համալիր ակնարկների հիման վրա հանձնարարականներ է մշակում հնարավոր համատեղ միջոցների բացահայտման համար: «Հանձնաժողովը նախատեսում է հավանություն տալ Միության պետությունների շաքարի շուկայի կայուն զարգացման լրացուցիչ միջոցների ցանկին, որը նախատեսում է շաքարի և կողմնակի արդյունքի խորը վերամշակման ոլորտի նորարարական մշակումների և տեխնոլոգիական լուծումների յուրացում, ինչպես նաև այլ միջոցներ»,- խորհրդաժողովի մասնակիցներին տեղեկացրել է Նաիրա Կարապետյանը։ Ամենամյա խորհրդաժողովին ավանդաբար մասնակցում են ԱՊՀ երկրների շաքար արտադրողներ, պրոֆիլային պետական մարմիններ, առևտրային ընկերություններ և շաքարի արդյունաբերական սպառողներ, պարարտանյութեր և գյուղտեխնիկա, բույսերի պաշտպանության միջոցներ արտադրողներ, շաքարի ճակնդեղի սերմերի մատակարարներ, բանկային և ֆինանսական հատվածի ներկայացուցիչներ, ինչպես նաև լոգիստիկ ընկերություններ:

09 ապրիլի 2025 ԵՏՀ-ն կատարել է ԵԱՏՄ պետությունների տնտեսական զարգացման կայունությունը որոշող մակրոտնտեսական ցուցանիշների մշտադիտարկում Մշտադիտարկումը ցույց տվեց, որ 2024 թվականի արդյունքներով ԵԱՏՄ պետություններում պետական կառավարման հատվածի պարտքը եղել է Եվրասիական տնտեսական միության մասին պայմանագրով սահմանված սահմաններում։ Մի շարք երկրներում պարտքի մակարդակը ՀՆԱ-ի նկատմամբ նվազել է. Ղրղզստանում` մինչև 13.1%, Ռուսաստանում` մինչև 13.6%: Հայաստանում և Ղազախստանում ներքին փոխառությունների աճով պայմանավորված ՀՆԱ-ի նկատմամբ պարտքի հարաբերակցությունն աճել է համապատասխանաբար մինչև 48.2% և 23.2%։ Միության երկրների մեծ մասում պետական կառավարման հատվածի բյուջեի հաշվեկշիռը նույնպես սահմանված արժեքների սահմաններում էր. Ղազախստանում և Ռուսաստանում՝ չափավոր պակասուրդ համապատասխանաբար ՀՆԱ-ի 0.7%-ով և ՀՆԱ-ի 1.2%-ի չափով, Ղրղզստանում՝ բյուջեի հավելուրդ ՀՆԱ-ի 3.5%-ի չափով: Բյուջեներն ապահովվել են, առաջին հերթին, հարկային և ոչ հարկային եկամուտների աճի հաշվին։ Բացառություն է կազմել Հայաստանի Հանրապետությունը, որտեղ բյուջեի պակասուրդը գերազանցել է սահմանված արժեքը՝ կազմելով ՀՆԱ-ի 3.5%-ը, ինչը պայմանավորված էր բնակչության սոցիալական աջակցության ծախսերի ավելացմամբ։ Եվրասիական տնտեսական միության մասին պայմանագրի 63-րդ հոդվածին համապատասխան՝ երկրների տնտեսական զարգացման կայունությունը որոշող հիմնական մակրոտնտեսական ցուցանիշներն են՝ պետական կառավարման հատվածի համախմբված բյուջեի պակասուրդը՝ ոչ ավելի, քան ՀՆԱ-ի 3%-ի չափով, պետական կառավարման հատվածի պարտքը՝ ոչ ավելի, քան ՀՆԱ-ի 50%-ի չափով:

08 ապրիլի 2025 Ալեքսանդր Տիտովը նշանակվել է ԵՏՀ մաքսային օրենսդրության և իրավակիրառ պրակտիկայի վարչության տնօրենի տեղակալ Ալեքսանդր Անատոլիի Տիտովը ծնվել է 1965 թվականի նոյեմբերի 12-ին Ռուսաստանի Դաշնության Ուֆա քաղաքում։ 1987 թվականին ավարտել է Ուֆայի պետական ավիացիոն ինստիտուտը։ 1989-1991 թվականներին ծառայել է բանակում։ 1992-2001 թվականներին աշխատել է Ուֆայի մաքսատանը՝ ճանապարհ անցնելով տեսուչից մինչև պետի տեղակալ։ 2001-2004 և 2011-2014 թվականներին ծառայել է Ուկրաինայում Ռուսաստանի մաքսային ծառայության ներկայացուցչությունում։ 2014-2024 թվականներին տարբեր պաշտոններ է զբաղեցրել Դաշնային մաքսային ծառայության կենտրոնական աշխատակազմում։ Վերջին զբաղեցրած պաշտոնը՝ «Ռուսաստանի ԴՄԾ մշտադիտարկման և օպերատիվ վերահսկողության կենտրոնի» գլխավոր վարչության ղեկավարի տեղակալ։ 2024-2025 թվականներին աշխատել է Եվրասիական տնտեսական հանձնաժողովի մաքսային օրենսդրության և իրավակիրառ պրակտիկայի վարչության տնօրեն։ Ունի գերատեսչական և պետական պարգևներ։ 2025 թվականի ապրիլի 1-ից նշանակվել է Եվրասիական տնտեսական հանձնաժողովի մաքսային օրենսդրության և իրավակիրառ պրակտիկայի վարչության տնօրենի տեղակալի պաշտոնում։

Նորություններ

Պաշարներ ԵՏՄ