Жаңалықтар

09.02.2024 (Обновлено: 13.02.2024 09:44)

Арзыбек Қожошев: «ЕАЭО елдері мен Үндістан Республикасы үшін төмен көміртекті дамуға, көміртексіздендіруге көшу және климаттық күн тәртібінің басымды мәселелері өзара қызығушылық тудырып отыр»

Еуразиялық экономикалық комиссияның энергетика және инфрақұрылым министрі Арзыбек Қожошев 6-9 ақпан аралығында Панаджи қаласында (Гоа, Үндістан Республикасы) өткен «Үндістан энергетикалық апталығы – 2024» халықаралық форумында энергоресурстар саласындағы еуразиялық интеграцияның перспективалары туралы айтып берді.

ЕЭК министрі форумда Еуразиялық экономикалық одақ пен оның тұрақты жұмыс істейтін реттеуші органы – Еуразиялық экономикалық комиссияны таныстырды. Ол әлемдік энергетиканың ағымдағы жағдайына және оның Одақтың энергетикалық саласына әсеріне қысқаша тоқталып өтті, сондай-ақ форумға қатысушыларға ЕЭК-тің энергетика саласында Одақтың энергетикалық ресурстарының ортақ нарықтарын қалыптастыру бөлігінде жүргізіп жатқан жұмыстарымен таныстырды.

Арзыбек Қожошев өз сөзінде жаңартылатын энергия көздерін пайдалану жағдайын, энергетиканы көміртексіздендіру және ЕАЭО аясында бірлескен төмен көміртекті технологияларды енгізу қажеттілігін атап өтті.

«Жаңартылатын энергия көздерін, төмен эмиссиялық (атом және сутегі) энергетиканы дамыту, сондай-ақ көміртегінің бейтараптығына және қоршаған ортаны қорғауға қол жеткізу мәселелері біздің алдымызда тұрған міндеттердің бірі. Бұл ретте ЕАЭО-да аталған бағыттарды іске асыру үшін барлық жағдайлар бар», – деп есептейді ЕЭК министрі.

Форум алаңында Арзыбек Қожошев Үндістан Республикасы Үкіметінің мұнай және табиғи газ, тұрғын үй шаруашылығы және қалалық істер министрі Хардип Сингх Пуримен кездесті. Кездесу барысында ЕЭК министрі Үндістанның климаттың өзгеруіне қарсы күресте өзінің энергетикалық саласын әртараптандыру, тұрақты экономикалық дамуға ұмтылу және осы жаһандық мақсатқа қол жеткізудегі жетістіктерімен танысты.

«Үндістанның әлемдегі үшінші ірі және ең жылдам дамып келе жатқан энергетикалық нарық екенін, ең қарқынды дамып келе жатқан ірі экономикалық және қуатты мұнай өңдеу орталығы екенін ескере отырып, бұл жұмыстың маңыздылығын бағалау қиын», – деп атап өтті еуразиялық министр.

Талқылау барысында мемлекеттеріміздің тұрақты экономикалық өсуін қамтамасыз ету үшін климаттық тәуекелдерді барынша азайтуға мүмкіндік беретін таза энергия көздері саласындағы бағдарламаларды бірлесіп дамытудың маңыздылығы атап өтілді.

ЕЭК Министрі сондай-ақ қазіргі заманғы көлік ағындарының Оңтүстік-Шығыс Азия мен Шығысқа қарай алмасып жатқанын, жаһандық геосаяси өзгерістер жағдайында көлікті дамыту үшін жаңа мүмкіндіктердің пайда болғанын және де бұл құрлық пен теңіз қатынасының тұрақтылығын қамтамасыз ететінін атап өтті.

Кездесу қорытындысы бойынша министрлер Үндістан Республикасы мен Еуразиялық экономикалық одақ арасындағы энергетика саласы бойынша жемісті ынтымақтастық одан әрі дамитынына сенімді екендерін айтты. ЕЭК министрі кездесу барысында әріптесін жыл сайынғы Еуразиялық экономикалық форумға шақырды.