Жаңалықтар

26.01.2024 (Обновлено: 29.01.2024 16:20)

ЕЭК пен ОАР бейінді министрліктері ынтымақтастықтың келешегін талқылады

25 қаңтарда Еуразиялық экономикалық комиссия делегациясы Оңтүстік Африка Республикасының Сауда және өнеркәсіп министрлігінің және Ауыл шаруашылығы, жер реформасы және ауылдық даму министрлігінің өкілдерімен келіссөздер өткізді.


ЕЭК Өнеркәсіптік саясат департаментінің директоры Николай Кушнарев пен ОАР Сауда және өнеркәсіп министрлігінің екіжақты қатынастар жөніндегі бас директоры Малозе Летсоало өнеркәсіптің басым салаларындағы бірлескен жұмысты, сондай-ақ Еуразиялық экономикалық одақ пен ОАР мемлекеттерінің өнеркәсіптік кешендерінің ерекшеліктері мен даму тенденцияларын талқылады. Тараптар ашық талдамалық ақпаратпен, оның ішінде негізгі инвестициялық мүмкіндіктер мен өнеркәсіптің түрлі салаларындағы әзірлемелермен өзара алмасу туралы келісті, сондай-ақ конструктивті өзара тиімді ынтымақтастықты дамыту үшін бірінші кезектегі қадамдарды белгіледі.

ОАР Сауда және өнеркәсіп министрлігінің жаңартылатын энергия көздері жөніндегі бас директоры Жерар Фурьемен Николай Кушнарев баламалы және жаңартылатын энергия көздеріне арналған жабдықтар, компоненттер мен материалдар саласындағы технологиялар трансферінің озық халықаралық тәжірибелерін қарастырды. ЕЭК өкілі Комиссияның Одақтағы жаңартылатын энергетика саласындағы өнеркәсіпті ынталандыру жөніндегі жұмысы туралы егжей-тегжейлі айтып берді.

ЕЭК Өнеркәсіптік саясат департаментінің директоры әріптестерімен Еуразиялық экономикалық одақтың өнеркәсіптік аймақтарын құру мәселелерін талқылады, олар мүше мемлекеттердің өндірушілері үшін ОАР нарығына ғана емес, бүкіл Африка континентіне де шығуы мүмкін. Сонымен қатар, келіссөздер барысында тараптар ЕАЭО және БРИКС мемлекеттерінің өнеркәсіп министрлерінің кездесуін ұйымдастыру мүмкіндігін қарастырды.

Кездесу барысында Армен Арутюнян және Оңтүстік Африка Республикасы Ауыл шаруашылығы, жер реформасы және ауылдық даму министрлігінің халықаралық қатынастар және сауда бас директоры Финдив Дингил ауыл шаруашылығы саласында өзара қызығушылық тудыратын мәселелердің кең түрін, атап айтқанда өсімдік шаруашылығын және тұқым шаруашылығын, органикалық өнімді сертификаттау, егіншілік, ауыл шаруашылығын цифрландыру, ауыл шаруашылығының тиімділігін арттыру үшін инновациялық технологияларды пайдалану, өсімдік шаруашылығы өнімдерінің бәсекеге қабілеттілігі жөніндегі мәселелерді талқылады.

Тараптар ақпарат алмасып, ОАР нарығына ауыл шаруашылығы өнімдерін жеткізуді ұлғайтудың және ЕАЭО мен ОАР елдеріне экспорттау үшін неғұрлым жоғары әлеуеті бар ауыл шаруашылығы тауарларының тізбесін жасаудың ықтимал тетіктерін зерделеу туралы келісті, бейнеконференциялар режимінде тақырыптық семинарлар мен конференциялар өткізу арқылы сауда-экономикалық ынтымақтастықты жандандыру мәселелері бойынша, оның ішінде ОАР мен Одақтың мемлекеттік құрылымдары мен іскер топтары арасында пікір алмасу қажеттігін растады.

Армен Арутюнян Одақты халықаралық деңгейдегі перспективалы сауда серіктесі ретінде жайғастыру мақсатында ЕАЭО-ның агроөнеркәсіптік кешен саласындағы қызметі туралы, ЕАЭО ауыл шаруашылығын орнықты дамыту бағдарламалары туралы, Одақ елдерінің Африка өңіріне ауыл шаруашылығы саласындағы технологиялар мен білімдерді алмасуға мүдделі екендігі туралы айтып берді.

Анықтама

ЕАЭО-ның Африка бағытындағы халықаралық ынтымақтастығын жандандыру жөніндегі жұмыс Еуразиялық экономикалық комиссия Кеңесінің 2023 жылғы 29 тамыздағы № 27 тапсырмасын орындау аясында ЕЭК алаңында жүргізілуде.