Жаңалықтар

09.02.2024 (Обновлено: 13.02.2024 09:54)

Гоар Барсегян ЕАЭО бизнесін жаңа қаржы механизмін іске асыруға белсенді қатысуға шақырды

Еуразиялық экономикалық одақта кооперациялық жобаларды қаржылық қолдау механизмін енгізу экономиканың нақты секторына еуразиялық интеграцияның жаңа деңгейіне шығуға мүмкіндік береді. Бұл туралы Еуразиялық экономикалық комиссияның өнеркәсіп және агроөнеркәсіптік кешен министрі Гоар Барсегян «Ресей – 2030 және жаңа әлемдік экономикалық тәртіп: бизнестің негізгі факторлары мен рөлі» атты халықаралық форумында мәлімдеді.

«Жаңа механизмді іске асыру ЕАЭО аясында экономикалық процестерді одан әрі дамыту туралы 2030 жылға дейінгі және 2045 жылға дейінгі кезеңге арналған  декларацияда көрсетілген өнеркәсіпті дамытудың негізгі міндеттерін шешуге ықпал ететін болады. Мәселе кооперациялық өзара іс-қимыл мен ынтымақтастықтың ортақ кеңістігін қалыптастыру, сондай-ақ ЕАЭО-ның ортақ нарығын негізгі тауарлармен қамтамасыз ету туралы болып отыр». – деді Гоар Барсегян.

Министр кооперациялық жобаларды қаржылай қолдаудың жаңа нысаны Одақ елдерінің инвестициялық тартымдылығын арттыратынын атап өтіп, іскер топтар мен бизнес өкілдерінің бірлестіктерін жаңа ұлттықтан жоғары құралды іс жүзінде іске асыруға белсенді қатысуға шақырды.

Сондай-ақ, Гоар Барсегян Жоғары Еуразиялық экономикалық кеңестің төрағасы, Армения Республикасының Премьер-министрі Никол Пашинян ЕАЭО-ға мүше мемлекеттердің басшыларына жасаған жолдауында Армения Республикасының Одақ органдарында төрағалық етуінің негізгі басымдықтары арасында азық-түлік қауіпсіздігі және агроөнеркәсіптік кешенді дамыту мәселелеріне ерекше назар аударғанын атап өтті.

«ЕАЭО елдерін азық-түліктің негізгі түрлерімен қамтамасыз ету деңгейі 93 пайызға жетті. Бұл мүше мемлекеттерге туындайтын сын-қатерлерге ұжымдық негізде тиімді қарсы тұруға мүмкіндік береді», – деп атап өтті ЕЭК министрі.

Қорытындылай келе, Гоар Барсегян мүше мемлекеттерге интеграция беретін артықшылықтарды тиімді пайдаланудың маңыздылығын атап өтті. Министрдің пікірінше, «бестік» елдері экономикаларының өзара толықтырылуы оларға қарапайым халықтың өмір сүру деңгейін арттыру үшін де, бүкіл еуразиялық кеңістіктегі іскерлік ортаны жақсарту үшін де ең өршіл мақсаттар қоюға мүмкіндік береді.

Анықтама

«Ресей – 2030 және жаңа әлемдік экономикалық тәртіп: бизнестің негізгі факторлары мен рөлі» атты халықаралық форумы Ресей бизнесі – 2024 апталығы аясында Ресей өнеркәсіпшілері мен кәсіпкерлер одағының алаңында өтті. Іс-шараға Ресей Федерациясы Үкіметі төрағасының орынбасары Алексей Оверчук, Ресей Федерациясының экономикалық даму министрі Максим Решетников, ЕЭК сауда министрі Андрей Слепнев, сондай-ақ ресейлік бизнес пен мемлекеттік құрылымдардың өкілдері қатысты.