Еуразиялық экономикалық комиссия Алқасы 2024 жылға арналған ет өнімдерінің жекелеген түрлеріне және сүт іріткілеріне қатысты тарифтік квоталарды белгілеу және бөлу туралы шешім қабылдады.
«Еуразиялық экономикалық одақ туралы шартқа сәйкес ЕЭК үшінші елдерден шығарылатын және ЕАЭО кедендік аумағына әкелінетін ауыл шаруашылығы тауарларының жекелеген санаттарына қатысты оларды мүше мемлекеттерде тұтыну мен өндіру тепе-теңдігін, сондай-ақ елдердің Дүниежүзілік сауда ұйымы алдындағы міндеттемелерін ескере отырып, тарифтік квоталарды белгілейді», — деп еске салды Еуразиялық экономикалық комиссияның Кедендік-тарифтік және тарифтік емес реттеу департаменті директорының орынбасары Наталья Самойлова.
Болжамға сәйкес, ағымдағы жылы өнім өндіру мен тұтыну көлемі арасында мынадай мөлшерде теріс айырмашылық күтілуде: ірі қара мал еті үшін – 204,5 мың тонна, шошқа еті үшін – 60 мың тонна, құс еті үшін – 210,8 мың тонна және сүт іріткісі үшін – 10,35 мың тонна.
Қазақстан Республикасы мен Ресей Федерациясы үшін 2024 жылға арналған тарифтік квоталар мемлекеттердің ДСҰ-ға қосылуы туралы хаттамаларда белгіленген мөлшерде белгіленген. Армения Республикасы, Беларусь Республикасы және Қырғыз Республикасы үшін тарифтік квоталар тараптар сұратқан көлемдер ескеріле отырып, тұтыну мен өндіріс арасындағы айырма шегінде айқындалған.
Мәселен, ірі қара малдың еті бойынша квоталар Армения Республикасы үшін 9 мың тоннаны, Қазақстан Республикасы үшін 21 мың тоннаны, Қырғыз Республикасы үшін 5 мың тоннаны және Ресей Федерациясы үшін 570 мың тоннаны құрайды. Шошқа еті үшін квоталар мынадай көлемде бөлінеді: Армения Республикасы үшін 12 мың тонна, Беларусь Республикасы үшін 20 мың тонна және Қырғыз Республикасы үшін 2 мың тонна.
Ет және құс еті бойынша квоталар Армения Республикасы үшін 39,1 мың тоннаны, Беларусь Республикасы үшін 10,9 мың тоннаны, Қазақстан Республикасы үшін 140 мың тоннаны, Қырғыз Республикасы үшін 58 мың тоннаны және Ресей Федерациясы үшін 364 мың тоннаны құрайды.
Сүт іріткісін әкелуге квота Армения Республикасы үшін 1,2 мың тонна көлемінде және Ресей Федерациясы үшін 15 мың тонна көлемінде белгіленген.
