17-18 қаңтарда Еуразиялық экономикалық комиссияның Кеден заңнамасы және құқық қолдану практикасы департаментінің директоры Сергей Владимировтың төрағалығымен Кедендік реттеу жөніндегі консультативтік комитет жанындағы екі жұмыс тобының бірлескен отырысы өтті.
Іс-шараға мемлекеттік органдар мен бизнес өкілдері, соның ішінде пошта операторлары мен экспресс-тасымалдаушылар қатысты.
Сыртқы электрондық сауданы реттеу бөлігінде Еуразиялық экономикалық одақтың Кеден кодексіне өзгертулер енгізу туралы хаттаманы дамытуға әзірленетін ЕЭК шешімдерінің жобалары талқыланды.
«Комиссияның бірқатар шешімдері, оның ішінде электрондық сауда тауарларына арналған декларацияға қатысты кедендік баждың бірыңғай мөлшерлемесінің мөлшері Хаттама күшіне енген сәттен бастап қолданыла бастауы тиіс. Бұл шешімдерсіз жаңа ережелерді қолдану мүмкін емес және біздің міндетіміз – бизнестің де, кеден органдарының да жаңа жағдайларға уақытылы дайын болуы үшін нормативтік базаны қалыптастыруды тезірек аяқтау», — деп атап өтті Сергей Владимиров.
Департамент директоры сондай-ақ осы бағыт бойынша жоспарлы және болжамды жұмысты қамтамасыз ету үшін Комиссияның аталған Хаттаманы дамытуға арналған актілерді әзірлеу бойынша тиісті кестені дайындап қойғанына назар аударды.
ЕЭК Алқасының электрондық сауда тауарларына арналған декларациясының үлгісін және оны толтыру тәртібін айқындайтын шешімінің жобасы қаралды, ол сарапшылар бұрын мақұлдаған тәсілдерді талқылау қорытындысы бойынша жасалған болатын.
Сонымен қатар жеке тұлғалар сатып алған электрондық сауда тауарларына қатысты кедендік баждың бірыңғай мөлшерлемесін айқындайтын Комиссия Кеңесі шешімінің жобасы және сарапшылардың осы мәселені пысықтауға алған қорытындылары бойынша электрондық сауда операторы үшін қамсыздандыру мөлшері талқыланды.
Анықтама
2023 жылғы 25 желтоқсанда Жоғары Еуразиялық экономикалық кеңесте сыртқы электрондық сауданы реттеу бөлігінде Одақтың Кеден кодексіне өзгертулер енгізу туралы хаттамаға қол қойылды.
Еуразиялық үкіметаралық кеңестің 2021 жылғы 19 қарашадағы № 10 шешімімен Еуразиялық экономикалық одақтың шеңберінде электрондық сауданы дамыту үшін қолайлы жағдайлар жасау жөніндегі іс-шаралар жоспары (жол картасы) бекітілді.
Еуразиялық экономикалық комиссияның жол картасының 2-тармағына сәйкес ЕАЭО мемлекеттерімен бірлесіп Комиссияның тиісті актілерін, оның ішінде электрондық сауда тауарларына арналған декларацияның үлгісін және оны толтыру тәртібін айқындайтын ЕЭК актісін дайындау қажет.
