Навіны

На пасяджэнні Еўразійскага міжурадавага савета 19 лістапада кіраўнікі ўрадаў дзяржаў Еўразійскага эканамічнага саюза падпісалі Пагадненне аб парадку абмену звесткамі, якія ўваходзяць у склад крэдытных гісторый, у рамках ЕАЭС. Галоўная мэта дакумента – палегчыць грамадзянам і камерцыйным кампаніям Саюза доступ да крэдытных прадуктаў на ўсёй тэрыторыі ЕАЭС, а таксама даць камерцыйным банкам даступны і аб’ектыўны інструментарый для справядлівай ацэнкі крэдытнай рызыкі патэнцыяльных пазычальнікаў.

«Нам неабходна стварыць прававое поле і ўмовы для рэалізацыі механізмаў трансгранічнага абмену крэдытнымі справаздачамі суб’ектаў крэдытных гісторый і пры гэтым гарантаваць абарону правоў і інтарэсаў удзельнікаў крэдытных адносін, а таксама забяспечыць узаемадзеянне паміж крэдытнымі бюро, якія ўдзельнічаюць у трансгранічным абмене ў рамках Саюза», – адзначыў міністр па эканоміцы і фінансавай палітыцы ЕЭК Руслан Бекетаеў.

Пагадненне дае рэзідэнтам дзяржаў ЕАЭС магчымасць атрымліваць сваю крэдытную справаздачу падчас знаходжання ў іншай краіне Саюза. У дакуменце прапісаны механізм узаемадзеяння паміж крэдытнымі бюро, а таксама вызначаны паўнамоцтвы фінансавых рэгулятараў па рэгуляванні і наглядзе за трансгранічным абменам.

Пасля ўступлення пагаднення ў сілу грамадзяне і кампаніі краін Саюза атрымаюць магчымасць на роўных умовах звяртацца за атрыманнем банкаўскіх крэдытаў на тэрыторыі еўразійскай «пяцёркі», што надасць дадатковы імпульс развіццю трансгранічнага крэдытавання.