Նորություններ
ԵՏՀ-ն փոխել է Գների պետական կարգավորման ներդրման հետ անհամաձայնության մասին ԵԱՏՄ երկրների դիմումների քննարկման կարգը
Գների պետական կարգավորման ներդրման ներկայումս գործող երկփուլ ընթացակարգի փոխարեն նոր մեխանիզմը նախատեսում է երեք փուլ: Առաջին փուլում անդամ պետությունը կարող է ինքնուրույն սահմանել գների պետական կարգավորում մինչև 90 օրացուցային օր ժամկետով: Հետագայում, անհրաժեշտության դեպքում, պետական կարգավորումը կարող է երկարաձգվել ևս 90 օրացուցային օրով։ Ե՛վ ներդրումը, և՛ երկարաձգումը ծանուցման բնույթ են կրում, այսինքն՝ բավարար է այդ մասին ժամանակին տեղեկացնել Հանձնաժողովին և մյուս կողմերին։
Գների պետական կարգավորման ժամկետի կրկնակի երկարաձգումը թույլատրվում է ևս 60 օրացուցային օրով, բայց արդեն Հանձնաժողովի հետ համաձայնեցմամբ։
Այսպիսով, սոցիալապես կարևոր որևէ ապրանքատեսակի համար գների պետական կարգավորման կիրառման առավելագույն ժամկետը չի կարող գերազանցել 240 օրացուցային օրը 12 ամսվա ընթացքում: Այս դեպքում կարգավորման ժամկետը կարող է լինել ինչպես ընդհատվող, այնպես էլ շարունակական։
Այս առնչությամբ կարգը մանրամասնում է նախկինում ներդրված գների կարգավորման ժամկետի երկարաձգման և մեկ այլ անդամ պետության կողմից գների պետական կարգավորման ներդրման կամ ժամկետի երկարաձգման մասին ընդունված որոշմամ հետ անհամաձայնության մասին ԵԱՏՄ պետությունների դիմումները Հանձնաժողովին ուղարկելու ընթացակարգը: Կարգը սահմանում է նաև Հանձնաժողովի կողմից նման դիմումների քննարկման և դրանց վերաբերյալ համապատասխան որոշումների ընդունման ընթացակարգը։
Ըստ ԵՏՀ մրցակցության և հակամենաշնորհային կարգավորման նախարար Բախիթ Սուլթանովի, նոր կարգը թույլ կտա օպտիմալացնել պետությունների կողմից այնպիսի բացառիկ միջոցի կիրառման հետ կապված ընթացակարգային հարցերը, ինչպիսին է գների պետական կարգավորումը։
«ԵՏՀ Կոլեգիայի այսօրվա որոշման ուժի մեջ մտնելը տեղի կունենա ոչ շուտ, քան Միության երկրներում ներկայումս վավերացման ընթացակարգ անցնող Արձանագրությամբ նախատեսված՝ ԵԱՏՄ մասին պայմանագրի փոփոխությունների ուժի մեջ մտնելը», - նշել է ԵՏՀ նախարարը։
