Навіны
Андрэй Сляпнёў: «Неабходна актывізаваць сумесную працу з бізнесам на міжнародных рынках з улікам узмацнення канкурэнцыі»
З такім заклікам міністр па гандлі Еўразійскай эканамічнай камісіі Андрэй Сляпнёў звярнуўся да ўдзельнікаў Міжнароднага форуму «2025 – год новых магчымасцяў», арганізаванага Расійскім саюзам прамыслоўцаў і прадпрымальнікаў.
«Калі мы возьмем лічбы па гандлі ў 2024 годзе, то яны досыць красамоўныя. Унутрысаюзны гандаль вырас на 10%, і гэта пасля сур'ёзнага росту годам раней. Знешні гандаль ЕАЭС з трэцімі краінамі па тавараабароце практычна не змяніўся, пры гэтым экспарт дадаў 1,2%, а гандлёвае сальда – 17,3%», – адзначыў міністр ЕЭК.
Паводле яго слоў, такія лічбы паказваюць, што спробы ізаляваць, абмежаваць ці яшчэ неяк дэстабілізаваць гандаль у краінах Еўразійскага эканамічнага саюза хоць і адчувальныя, але мэты сваёй не дасягаюць. Гандаль развіваецца, бізнес ідзе наперад і знаходзіць шляхі, каб працягваць узаемадзеянне з партнёрамі.
Звяртаючыся да тэмы форуму, Андрэй Сляпнёў падкрэсліў, што новыя магчымасці, якія адкрываюцца цяпер, з'яўляюцца ў тым ліку і адказам на новыя выклікі. А гэтыя выклікі, на яго думку, можна звесці да двух асноўных пунктаў. Першы – спецыфічны для Расіі і Беларусі і заключаецца ў санкцыйным ціску. Другі звязаны з тым, што сусветная гандлёвая сістэма ўжо ў поўным аб'ёме ўвайшла ў стадыю глабальнай трансфармацыі. «Цяпер мы праходзім перыяды гандлёвых войнаў, і нам трэба разумець нашы перспектывы ў гэтым кантэксце», – звярнуў увагу міністр ЕЭК.
«Перш за ўсё хачу сказаць, што цікавасць міжнародных партнёраў да ўзаемадзеяння з Саюзам у гандлёвай сферы вельмі вялікая. Сёння мы займаемся імплементацыяй беспрэцэдэнтнага пагаднення аб свабодным гандлі з Іранам, актыўна вядуцца кансультацыі з Індыяй, чакаем падпісання пагаднення з ААЭ ўжо сёлета», – праінфармаваў Андрэй Сляпнёў.
Сярод іншых напрамкаў у якасці аднаго з ключавых ён вылучыў рынак Паўднёва-Ўсходняй Азіі. Там сітуацыя сёння вельмі хутка змяняецца, што звязана ў тым ліку з мерамі ЗША ў дачыненні да Кітая. У рэгіёне ўжо дзейнічае Пагадненне аб свабодным гандлі ЕАЭС з В'етнамам, паспяхова вядуцца перамовы з Інданезіяй.
«Канкурэнцыя будзе ўсё больш павялічвацца, таму нашы экспартныя намаганні павінны быць дадаткова актывізаваны, каб гэту канкурэнцыю вытрымаць і свае інтарэсы на гэтых рынках адстаяць. Гэта датычыцца і нас як рэгулятараў, і бізнес-супольнасці нашых краін», – сказаў на заканчэнне міністр.
