Навіны
Максім Ермаловіч: «Узаемадзеянне Камісіі з Судом ЕАЭС у сферы канкурэнцыі спрыяе забеспячэнню аднастайнага прымянення права Саюза»
На пленарным пасяджэнні VII Міжнароднай канферэнцыі Суда Еўразійскага эканамічнага саюза ў Мінску 21 лістапада міністр па канкурэнцыі і антыманапольным рэгуляванні Еўразійскай эканамічнай камісіі Максім Ермаловіч прадставіў работу блока, які ён курыруе, па развіцці нарматыўна-прававой базы рэгулявання канкурэнцыі на трансгранічных рынках Саюза.
Міністр ЕЭК вылучыў падрыхтоўку праекта «IV Вялікага Пратакола», які прадугледжвае папраўкі ў Пратакол аб агульных прынцыпах і правілах канкурэнцыі. Паводле яго слоў, вядзецца праца над далейшым удасканаленнем дакументаў, якія рэгулююць парадак разгляду заяў (матэрыялаў), правядзення расследаванняў, разгляду спраў аб парушэнні агульных правіл канкурэнцыі на трансгранічных рынках.
Асобная ўвага на сесіі была нададзена ўнясенню змяненняў у Крытэрыі аднясення рынку да трансгранічнага, якія вызначаюць размежаванне кампетэнцый паміж Камісіяй і нацыянальнымі антыманапольнымі органамі. На думку Максіма Ермаловіча, «наяўнасць такіх наднацыянальных паўнамоцтваў сведчыць аб прававой прыродзе ЕАЭС як інтэграцыйнага аб'яднання». Дзякуючы стварэнню роўных канкурэнтных умоў забяспечваецца паўнавартасная рэалізацыя прынцыпу чатырох свабод.
Закранаючы ўзаемадзеянне камісіі з Судом ЕАЭС, Максім Ермаловіч падкрэсліў: «Мы ўважліва аналізуем практыку Суда Саюза і карэкціруем сваю правапрымяняльную і праватворчую дзейнасць. Наша ўзаемадзеянне ў сферы канкурэнцыі спрыяе забеспячэнню аднастайнага прымянення права Саюза». У прыватнасці, Камісія арганізавала падрыхтоўку змяненняў у Дагавор аб Саюзе для надзялення фізічных асоб правам на зварот у Суд ЕАЭС.
