Навіны

Савет Еўразійскай эканамічнай камісіі зацвердзіў план па ўкараненні справядлівых тарыфаў у дзяржавах Еўразійскага эканамічнага саюза. Дакумент падрыхтаваны ў рамках выканання ініцыятывы, агучанай Прэм'ер-міністрам Рэспублікі Казахстан Аскарам Маміным падчас пасяджэння Еўразійскага міжурадавага савета ў кастрычніку 2019 года. У працы над планам нараўне з дзяржаўнымі органамі актыўны ўдзел прынялі аператары сотавай сувязі краін Саюза. Блокам па канкурэнцыі і антыманапольным рэгуляванні Камісіі праведзены агляд заканадаўства краін ЕАЭС у сферы сувязі, вывучаны сусветны вопыт адмены роўмінгу, у тым ліку ў рамках рэгіянальных інтэграцыйных аб'яднанняў (Еўрапейскі Саюз, Андская супольнасць, НАФТА, Заходнеафрыканскі саюз і інш.).

Па словах міністра ЕЭК Армана Шакаліева, cвабода зносін – адна з ключавых асноў для рэалізацыі чатырох свабод еўразійскага праекта. Інтэграцыйныя аб'яднанні ва ўсім свеце імкнуцца да ліквідацыі дыскрымінацыі спажыўцоў у межах інтэграцыйнай прасторы, якія вымушаныя абмяжоўваць сябе ў зносінах з прычыны высокіх тарыфаў на паслугі сувязі ў роўмінгу.

«Мы правялі аналіз цэнаўтварэння на паслугі сотавай сувязі ў роўмінгу на тэрыторыях дзяржаў ЕАЭС, вывучылі магчымыя рызыкі, звязаныя з махлярствам, ацанілі магчымасць максімальнага набліжэння роўмінгавых тарыфаў да «хатніх», – пракаменціраваў ход працы над дакументам Арман Шакаліеў.

Мерапрыемствы плана ўключаюць у сябе комплекс мер, накіраваных на папярэджанне, выяўленне і спыненне махлярства, забеспячэнне прамога ўзаемадзеяння аператараў сувязі пры пропуску міжнароднага роўмінгавага трафіку, прапрацоўку магчымасці арганізацыі прамых стыкаў паміж сеткамі аператараў сувязі і іншыя.

Апрача іншага, планам прадугледжана распрацоўка правілаў добрасумленнага выкарыстання справядлівых тарыфаў, якія будуць уключаць у сябе ў тым ліку вызначэнне кроку тарыфікацыі і максімальнага аб'ёму (перыяду) аказання па справядлівых тарыфах паслуг сувязі ў роўмінгу.

Камісіяй будзе ажыццяўляцца маніторынг выканання мерапрыемстваў па плане. Пасля іх поўнай рэалізацыі Калегія ЕЭК прыме шэраг рэкамендацый для сотавых аператараў краін ЕАЭС, накіраваных на пераход з 2025 года на тарыф у роўмінгу, максімальна набліжаны да «хатняга».