Навіны
Зацверджана новая рэдакцыя правілаў вызначэння паходжання тавараў з краін, якія развіваюцца, і найменш развітых краін
Савет Еўразійскай эканамічнай камісіі прыняў рашэнне мадэрнізаваць правілы вызначэння паходжання тавараў з краін, якія развіваюцца, і найменш развітых краін – карыстальнікаў адзінай сістэмы тарыфных прэферэнцый Еўразійскага эканамічнага саюза.
Абноўленая рэдакцыя змяшчае ў сабе пакет комплексных паправак, якія прадугледжваюць удасканаленне парадку дакументальнага пацвярджэння паходжання тавараў, спрашчэнне ўмоў для атрымання імпарцёрамі тарыфных прэферэнцый, аптымізацыю палажэнняў аб адміністрацыйным супрацоўніцтве з краінамі-бенефіцыярамі, а таксама шэраг іншых змяненняў, падрыхтаваных з улікам правапрымяняльнай практыкі, якая склалася за пяць гадоў.
У прыватнасці, на пастаяннай аснове фіксуецца магчымасць пацвярджаць паходжанне тавараў, якія прэтэндуюць на атрыманне тарыфных прэферэнцый, копіяй дакумента аб паходжанні тавару замест яго арыгінала. Акрамя таго, скасавана патрабаванне аб абавязковым набыцці тавараў выключна ў асоб, зарэгістраваных у краінах – карыстальніках адзінай сістэмы тарыфных прэферэнцый ЕАЭС.
«Прынятае рашэнне ўяўляе сабой дзейсную меру па адаптацыі правілаў, якія прымяняюцца ў Саюзе да сучасных умоў гандлю і мінімізацыі наяўных складанасцяў з пацвярджэннем мытным органам дзяржаў – членаў ЕАЭС прэферэнцыйнага паходжання тавараў, якія пастаўляюцца», – адзначыў міністр па гандлі ЕЭК Андрэй Сляпнёў.Ён дадаў, што названыя змяненні таксама з'яўляюцца працягам паслядоўнай працы Саюза па рэалізацыі мер падтрымкі найменш развітых краін, неабходнасць якіх рэгулярна абмяркоўваецца на пляцоўцы Сусветнай гандлёвай арганізацыі.
Рашэнне ўступіць у сілу па заканчэнні 60 каляндарных дзён ад даты яго афіцыйнага апублікавання.
Даведка
Правілы вызначэння паходжання тавараў з краін, якія развіваюцца, і найменш развітых краін зацверджаны Рашэннем Савета Еўразійскай эканамічнай камісіі ад 14 чэрвеня 2018 г. № 60.
Пералікі краін-карыстальнікаў адзінай сістэмы тарыфных прэферэнцый ЕАЭС устаноўлены Рашэннем Камісіі Мытнага саюза ад 27 лістапада 2009 г. № 130.
Пералік тавараў, у дачыненні да якіх прадастаўляюцца тарыфныя прэферэнцый, зацверджаны Рашэннем Савета Еўразійскай эканамічнай камісіі ад 13 студзеня 2017 г. № 8.
