Բակիտժան Սագինտաև. «ԵԱՏՄ երկրները վերածում են աշխատավորների կենսաթոշակային ապահովման ոլորտում փոխգործակցությունը էլեկտրոնային ձևաչափի»

Այս մասին սեպտեմբերի 28-ին Ալմաթիում (Ղազախստան)՝ Բարձր մակարդակի միջազգային կլոր սեղանի ընթացքում իր ելույթում ասել է Եվրասիական տնտեսական հանձնաժողովի էկոնոմիկայի և ֆինանսական քաղաքականության նախարար Բակիտժան Սագինտաևը։ Քննարկումը նվիրված էր կենսաթոշակային համակարգերի օպտիմալ և կայուն մոդելների որոնմանը, ինչպես նաև պարտադիր կուտակային և խառը համակարգերի զարգացման հեռանկարներին։ 

ԵՏՀ էկոնոմիկայի և ֆինանսական քաղաքականության նախարար Բակիտժան Սագինտաևը կլոր սեղանի մասնակիցներին պատմել է 2021 թվականի հունվարի 1-ից ուժի մեջ մտած Եվրասիական տնտեսական միության երկրների աշխատավորների կենսաթոշակային ապահովման մասին համաձայնագրի իրավակիրառ պրակտիկայի մասին։ Նա նշել է, որ ԵԱՏՄ երկրները ներկայումս ակտիվորեն աշխատում են աշխատավորների կենսաթոշակային ապահովման ոլորտում փոխգործակցությունը էլեկտրոնային ձևաչափի վերածելու ուղղությամբ, որը կիրականացվի Միության ինտեգրված տեղեկատվական համակարգի օգտագործմամբ։

«Այս աշխատանքի ավարտը զգալիորեն կպարզեցնի կենսաթոշակների նշանակման և վճարման հետ կապված բոլոր ընթացակարգերը, կապահովի տեղեկատվության պաշտպանության պատշաճ մակարդակի պահպանումը, ինչպես նաև կկրճատի կենսաթոշակների նշանակման և վճարման վերաբերյալ քաղաքացիների դիմումների քննարկման ժամկետները», - ընդգծել է Բակիտժան Սագինտաևը:

Միջոցառման ընթացքում կարևորվել է բնակչության սոցիալական պաշտպանության համակարգերի կատարելագործման հարցերում բոլոր շահագրգիռ կողմերի համագործակցության զարգացումը։

«ԵԱՏՄ-ում աշխատանքային միգրացիայի դրական դինամիկան թելադրում է աշխատանքային և սոցիալական երաշխիքների իրականացման հարցերի առաջնահերթությունը,- հայտնել է ԵՏՀ նախարարը։ - Այս առումով սոցիալական, այդ թվում՝ կենսաթոշակային ապահովության հարցերը կարևոր դեր են կատարում ԵԱՏՄ երկրների միջև ինտեգրացիոն գործընթացներում»։