Ապրիլի 19-ին Պեկինում Եվրասիական տնտեսական հանձնաժողովի առևտրի նախարար Անդրեյ Սլեպնևի և Չինաստանի Ժողովրդական Հանրապետության առևտրի փոխնախարար Լի Ֆեի համատեղ նախագահությամբ տեղի է ունեցել Եվրասիական տնտեսական միության և ՉԺՀ միջև առևտրատնտեսական համագործակցության մասին համաձայնագրի իրականացման հարցերով համատեղ հանձնաժողովի նիստը։
Կողմերը բարձր են գնահատել 2023 թվականին Համաձայնագրի կիրարկման ուղղությամբ կատարված աշխատանքը։
Մանրամասնորեն քննարկվել է նախորդ նիստին հաստատված՝ ԵԱՏՄ և ՉԺՀ միջև առևտրատնտեսական համագործակցության զարգացման ճանապարհային քարտեզի իրականացման ընթացքը։ Պայմանավորվածություն է ձեռք բերվել անթուղթ տեխնոլոգիայի օգտագործմամբ միջազգային փոխադրումների կազմակերպման վերաբերյալ Ռուսաստանի և Չինաստանի երկաթուղային փոխադրողների և նրանց հավաստագրման կենտրոնների միջև համաձայնագրերի ստորագրման աշխատանքների շուտափույթ ավարտի մասին, ինչը կնպաստի ԵԱՏՄ և ՉԺՀ միջև տրանսպորտային միջանցքների թվայնացման զարգացմանը:
Կողմերը կարևորել են կլիմայական օրակարգի, Միության և Չինաստանի զարգացման ռազմավարությունների, շուկայի պաշտպանության միջոցների և էլեկտրոնային առևտրի ոլորտներում ճանապարհային քարտեզի դրույթներով նախատեսված խորհրդատվությունների շարունակականությունը։ Նշվել է պետական գնումների և միջբորսայական համագործակցության ոլորտում կանոնավոր երկխոսության հաստատումը։
Բացի այդ, Համատեղ հանձնաժողովը քննարկել է տեխնիկական կարգավորման, ՍԲՍ միջոցների կիրառման, մաքսային և արդյունաբերական համագործակցության ոլորտներում փոխգործակցության ընդլայնման արդյունքներն ու հետագա քայլերը։ Առանձին նշվել է «Եվրասիական ագրոէքսպրես» նախագծի զարգացմանը նպաստելու մտադրությունը, որն ուղղված է ԵԱՏՄ-ից Չինաստան երկաթուղային տրանսպորտով պարենային արտադրանքի արագացված փոխադրումների իրականացմանը։
«Ներկայումս մեր Միության երկրների և ՉԺՀ միջև հարաբերությունները աննախադեպ բարձր մակարդակի վրա են, ինչը հաստատում են ապրանքաշրջանառության աճի տվյալները։ 2023 թվականին այս ցուցանիշը 2022 թվականի համեմատ աճել է գրեթե մեկ քառորդով։ Վստահ եմ, որ հաջորդ տարի, բացի առևտրի պարզեցման ավանդական հարցերից, ինչպես նաև կլիմայի և էլեկտրոնային առևտրի նոր ուղղություններից, մենք կքննարկենք նաև փոխգործակցության խորացման այլ ուղղություններ, որոնք բացահայտվել են առևտրատնտեսական համագործակցության զարգացման հեռանկարների վերաբերյալ ԵԱՏՄ և ՉԺՀ գիտական շրջանակների կողմից հանրության կատարված համատեղ ուսումնասիրության արդյունքում», — ամփոփել է Անդրեյ Սլեպնևը։
Այցի ընթացքում ԵՏՀ նախարարն այցելել է «Չինական երկաթուղիներ» պետական ընկերության կենտրոնակայան, որտեղ խորհրդակցություններ են տեղի ունեցել վերջինիս գլխավոր տնօրեն Գո Չժուսեի հետ, ինչպես նաև աշխատանքային հանդիպում ունեցել ԵԱՏՄ անդամ պետությունների դիվանագիտական ներկայացուցչությունների ղեկավարների հետ։
